كەشە باتىس قازاقستان وبلىستىق قازاقستان حالقى اسسامبلەياسى حاتشىلىعى ۇيىمداستىرعان دوڭگەلەك ۇستەل بيىلعى 26 ساۋىردە وتەتىن پرەزيدەنتتىك سايلاۋدىڭ باستى ءمانى مەن ماڭىزىن ارقاۋ ەتتى. جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىندە «داعدارىسقا قارسى ساياسات جانە بيىلعى پرەزيدەنتتىك سايلاۋدىڭ ماڭىزى» دەگەن تاقىرىپتا ورىستەگەن وي-پىكىرلەر توعىسىنا ءوڭىر عالىمدارى مەن ستۋدەنتتەر, قازاقستان حالقى اسسامبلەياسى جاستار قاناتىنىڭ مۇشەلەرى, كاسىپكەرلەر مەن ازاماتتىق اليانس وكىلدەرى قاتىستى.
دوڭگەلەك ۇستەل ءماجىلىسى ۇستىندە باس قوسقاندار ەلباسى بۇعان دەيىن شەگەلەپ, بەلگىلەپ بەرگەن داعدارىسقا قارسى ساياساتتىڭ تيىمدىلىگى مەن قازاقستان قوعامىنا يكەمدىلىگى جونىندە جان-جاقتى اڭگىمەلەر ورىستەتتى. سونداي-اق, ولار الەمدىك قارجى-ەكونوميكالىق داعدارىستىڭ قۋاتتى تولقىندارى سوققانىنا قاراماستان, بۇگىنگى كۇنى ەلىمىزدە جان-جاقتى ويلاستىرىلعان داعدارىسقا قارسى ءىس-قيمىلداردىڭ ناتيجەسىندە ونىڭ اسەرى مەن زاردابى ايتارلىقتاي بايقالىپ وتىرماعانى جونىندە تياناقتى تۇجىرىمدار جاسادى. وسىنداي ويلى ورامنىڭ ءبىرى باتىس قازاقستان وبلىستىق كاسىپكەرلەر پالاتاسىنىڭ توراعاسى كەڭەس ءابساتيروۆتىڭ تاراپىنان ايتىلدى.
باسقوسۋ كەزىندە جاڭگىر حان اتىنداعى باتىس قازاقستان ارگارلىق-تەحنيكالىق ۋنيۆەرسيتەتىنىڭ ءۇشىنشى كۋرس ستۋدەنتى, پرەزيدەنتتىك شاكىرتاقى يەگەرى ايگەرىم ەرلانوۆا مەن «دوستىق» كلۋبىنىڭ مۇشەسى كيريلل دەنيسوۆ پرەزيدەنتتىك سايلاۋ وتكىزۋ مەرزىمى بۇگىنگى الەمدەگى كۇردەلى كەزەڭنىڭ ەرەكشەلىگىنە وراي ەرتە دە ەمەس, كەش تە ەمەس, ءدال ءوز ۋاقىتىندا بەلگىلەنگەنىن ايتا كەلىپ, باتىسقازاقستاندىق ستۋدەنتتەر مەن جاستار اتىنان ەلباسىنىڭ بيىلعى سايلاۋعا تۇسۋگە كەلىسىم بەرۋىن جاقتايتىندارىن جەتكىزدى.
سونداي-اق, ەكونوميكا عىلىمدارىنىڭ دوكتورى, پروفەسسور راۋشان عابدۋاليەۆانىڭ پىكىرىنشە, ەلباسى بەلگىلەپ بەرگەن داعدارىسقا قارسى ساياسات بيىلعى پرەزيدەنتتىك سايلاۋدىڭ قاجەتتىلىگى مەن ماڭىزدىلىعىن كوتەرە تۇسەدى. ءارى وعان جاڭاشا مازمۇن مەن ءتۇر بەرەدى. بۇل ەكى ۇعىمداردىڭ اراسىندا تۇرعان «قىتاي قورعانى» جوق. ەكەۋى ءبىر-بىرىمەن ۇندەس, ساباقتاس. ءارى ءبىرىن-ءبىرى بايىتىپ, تولىقتىرىپ تۇرا الادى. مۇنداي ويلى پىكىردى ءدوڭگەلەك ۇستەلدىڭ وزگە قاتىسۋشىلارى دا قولدادى.
تەمىر قۇسايىن,
«ەگەمەن قازاقستان».
ورال.