استاناداعى «Zodiak» كلۋبىندا بيلياردتان قوعام قايراتكەرلەرى مەن باق وكىلدەرى اراسىندا اقسەلەۋ سەيدىمبەك اتىنداعى تۋرنير ءوتتى. بۇل شارادا باس-اياعى الپىسقا جۋىق ەلگە تانىمال ازامات باق سىنادى.
بيىلعى شارانىڭ ەرەكشەلىگى – « ۇلى دالانىڭ اقسەلەۋى» اتتى كىتاپتىڭ جارىق كورۋى. جارىستىڭ اشىلۋ سالتاناتىندا ءسوز العان قويشىعارا سالعارا ۇلى كىتاپ جايلى جان-جاقتى تارقاتىپ ايتىپ بەرسە, «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆ اقسەلەۋ سەيدىمبەك تۋرالى ايتا كەلىپ, كىتاپتا كەلتىرىلگەن ءابىش كەكىلباەۆتىڭ ادەمى سوزىمەن تۇيىندەدى.
تۋرنير شارتىنا سايكەس, قاتىسۋشىلار جاسى الپىستان اسقاندار – «اعالار» توبى, الپىسقا دەيىنگىلەر – «جاستار مەن جاسامىستار» توبى بولىپ ەكىگە ءبولىندى. «اعالار» توبىندا تولەن ابدىك, قويشىعارا سالعارا ۇلى, نامازالى وماشەۆ, ءجۇرسىن ەرمان سىندى جيىرماعا جۋىق اقىن-جازۋشى مەن قوعام قايراتكەرلەرى ونەر كورسەتتى.
ال «جاستار مەن جاسامىستار» توبىندا شارحان قازىعۇل, شۇكىر شاحاي, داۋلەتكەرەي كاپ ۇلى سىندى قىرىققا جۋىق بەلگىلى جۋرناليست-قالامگەر شەبەرلىكتەرىن پاش ەتتى. ويىنشىلاردى جەكەلەي توپتارعا ءبولۋ ءۇشىن ارنايى جەرەبە دە تارتىلدى.
ناتيجەسىندە, «اعالار» توبىنان ءبىرىنشى ورىندى فينالدا جازۋشى قويشىعارا سالعارا ۇلىن جەڭگەن پروفەسسور نامازالى وماشەۆ يەمدەنسە, ۇزدىك ۇشتىكتى قوعام قايراتكەرى تولەن ابدىك قورىتىندىلادى.
«جاستار مەن جاسامىستار» توبىندا دا باسەكەلەستىك وتە جوعارى ءوتتى. جىل سايىن اتالمىش ءتۋرنيردىڭ جەڭىمپازى بولىپ جۇرگەن شۇكىر شاحاي فينالدا ءسۇرىندى. ونىڭ جولىن بۇل جولى جاس ايتىسكەر اقىن ەركەبۇلان قاينازاروۆ كەستى. ءبىر قىزىعى, بىلتىر گازەتىمىزدىڭ 95 جىلدىق مەرەيتويىنا وراي ۇيىمداستىرىلعان تۋرنيردە قاينازاروۆ, ءتىپتى, توپتىق باسەكەدەن اسا الماعان ەدى. سول كەزدە ول اقسەلەۋ سەيدىمبەك اتىنداعى تۋرنيرگە تىڭعىلىقتى دايىندالىپ كەلەمىن دەگەن-ءدى. مىنە, ۋادەسىندە تۇرىپ, بۇل جولى تۋرنير جەڭىمپازى اتاندى. ال ءۇشىنشى ورىن تاعى ءبىر ايتىسكەر اقىن كوپجاسار الدابەرگەنوۆكە بۇيىردى.
ناتيجەسىندە, جەڭىمپازدار باعالى سىيلىقتارمەن ماراپاتتالىپ, ولارعا كۋبوك پەن مەدال تابىس ەتىلدى. سونىمەن قاتار, قاتىسۋشىلار ءتۋرنيردىڭ «ەڭ سىيلى قاتىسۋشىسى», «ەڭ مادەنيەتتى ويىنشىسى», «جەڭىمپاز بولۋعا ەرەكشە ۇمتىلىس تانىتقانى ءۇشىن» سەكىلدى اتالىمدار بويىنشا ماراپاتتالدى.
الماس ماناپ,
«ەگەمەن قازاقستان».