امانگەلدى اۋىلىنداعى ا.يمانوۆ اتىنداعى مەموريالدىق مۋزەيدە تورعاي ءوڭىرىنىڭ ارعى-بەرگى تاريحىنا قاتىستى 5800-دەن اسا جادىگەر ساقتاۋلى تۇر. سونىڭ ىشىندە امانگەلدى باتىردىڭ بالا كەزىندە جاتقان توسەگى دە بار. قۇندى جادىگەر باتىردىڭ اناسى قالامپىردان قالعان.
ءحىح عاسىردا بەلگىسىز شەبەردىڭ قولىنان شىققان توسەكتىڭ جاقتاۋى سول داۋىرگە ءتان ويۋ-ورنەكپەن ناقىشتالعان.
«بۇل توسەكاعاشتىڭ توسەنىشى, كورپە-جامىلعىسى, اعاشتان جاسالعان جاستىعى تۇگەل ساقتالعان. استىڭعى توسەنىشى قالىڭ قامىستان جاسالعان. بۇل بىزگە وتكەن عاسىردىڭ 70-جىلدارى وبلىستىق تاريحي-ولكەتانۋ مۇراجايىنان كەلگەن», دەيدى مۋزەيدىڭ قور ساقتاۋشىسى دانا سەيداعاليەۆا.
توسەكاعاشتىڭ ۇستىندە شاعىن قالاق دومبىرا بار. جانىندا باتىردىڭ ۇرپاقتارىنا تيەسىلى جەلبەگەي, امانگەلدىنىڭ نەمەرە ءىنىسى راحىمقۇل ەسەتاي ۇلىنان الىنعان قالىڭ شاپان, تورعايداعى ۇلت-ازاتتىق كوتەرىلىستە مىڭباسى بولعان ءالجان قاراباي ۇلىنىڭ كىسە بەلبەۋى ءىلۋلى تۇر.
قوستاناي وبلىسى