شىمكەنتتە 14 جاستاعى بالانى سارىشايان شاعىپ, وعان شۇعىل مەديتسينالىق كومەك قاجەت بولدى. جاندىكتىڭ ۋىنان كەيىن بالانىڭ اياق-قولدارى جانسىزدانىپ, تىنىس الۋى قيىنداعان. ۋاقىت جوعالتۋدىڭ قاۋىپتى ەكەنىن تۇسىنگەن اتا-اناسى ۇلىن ءوز كولىگىمەن اۋرۋحاناعا جەتكىزۋگە شەشىم قابىلداعان, دەپ حابارلايدى Egemen.kz.
جولدا ولارعا پوليتسيا قىزمەتكەرلەرى كومەك كورسەتىپ, كولىكتى مەديتسينالىق مەكەمەگە دەيىن الىپ جۇرگەن. دارىگەرلەردىڭ جەدەل ارەكەتىنىڭ ارقاسىندا ءجاسوسپىرىمنىڭ جاعدايى تۇراقتانىپ, قازىر ونىڭ ومىرىنە ەشقانداي قاۋىپ ءتونىپ تۇرعان جوق.
ت.ورىنباەۆ اتىنداعى قالالىق گيپەرباريالىق وكسيگەناتسيا ورتالىعىنىڭ باس دارىگەرى مادينا ەرماحانبەتوۆانىڭ ايتۋىنشا, ناۋقاس 29 مامىر كۇنى ورتاشا اۋىر حالدە توكسيكولوگيا بولىمىنە جاتقىزىلعان. قاجەتتى ەم-دوم جۇرگىزىلگەننەن كەيىن ونىڭ جاعدايى ايتارلىقتاي جاقسارىپ, كەلەسى كۇنى ۇيىنە شىعارىلعان.
مامانداردىڭ مالىمەتىنشە, بيىلعى ماۋسىم باستالعالى بەرى سارىشايان شاققان 37 ادام ستاتسيونارلىق ەم قابىلداسا, تاعى 102 تۇرعىن امبۋلاتوريالىق تۇردە ەمدەلگەن.
دارىگەرلەر سارىشايان شاققان كەزدە قاتتى اۋىرسىنۋ پايدا بولاتىنىن ايتادى. مۇنداي جاعدايدا الدىمەن زارداپ شەككەن ادامدى قاۋىپسىز جەرگە شىعارىپ, جارانى تازا سۋمەن جۋىپ, سۋىق باسۋ قاجەت. سونداي-اق ۋدىڭ اعزاعا تارالۋىن باياۋلاتۋ ءۇشىن زاقىمدانعان قولدى نەمەسە اياقتى قوزعالتپاي بەكىتكەن ءجون.
اقمولا وبلىسىندا كەنە شاققان ءجاسوسپىرىم جانساقتاۋ بولىمىنە ءتۇستى
ماماندار بالالارعا, ەگدە جاستاعى ادامدارعا جانە سوزىلمالى اۋرۋى بار ازاماتتارعا سارىشايان ۋىنىڭ اسەرى ەرەكشە قاۋىپتى ەكەنىن ەسكەرتەدى. ۋلانعان ادامدا باس اينالۋ, قۇسۋ جانە قاتتى باس اۋرۋى بايقالۋى مۇمكىن. دارىگەر كەلگەنگە دەيىن اۋىرسىنۋدى باساتىن ءدارى قابىلداۋعا رۇقسات ەتىلەدى.
قاۋىپتىڭ الدىن الۋ ءۇشىن قالىڭ ءشوپ وسكەن جەرلەردە اباي بولىپ, جابىق اياق كيىم كيۋ ۇسىنىلادى. سونداي-اق دالادا قالعان كيىم مەن اياق كيىمدى كيمەس بۇرىن مۇقيات تەكسەرۋ قاجەت. ءۇي ماڭىن قوقىستان تازارتىپ, قابىرعالارداعى جارىقتاردى ۋاقىتىلى بىتەۋ دە سكورپيونداردىڭ ءۇي ماڭىنا كەلۋ قاۋپىن ازايتادى.