الەم شاباندوزدارى باس قوسقان الامان

ەلوردا ءتورىن دۇبىرگە بو­لە­گەن ايتۋلى ءىس-شارا حا­لىق­ارالىق ات سپورتى فەدە­راتسياسىنىڭ (Fédération Équestre Internationale – FEI) قولداۋىمەن ءوتتى. ءتۋرنيردىڭ باستى ەرەكشەلىگى – ءبىر مەزەتتە ءۇش حالىقارالىق جارىستىڭ ۇيىمداستىرىلۋى. اتاپ ايتقاندا, FEI الەم كۋبوگىنىڭ كەزەڭى, FEI «World Cup Challenge» فينالى جانە CDI1*/CDI3* باعدارلامالارى بويىنشا سپورتشىلار ءوزارا مىقتىنى انىق­تادى.

بيىل گەرمانيانىڭ احەن قالا­سىندا ات سپورتىنان الەم چەمپيوناتى وتەدى. استاناداعى حالىقارالىق تۋرنير سول جاھاندىق دوداعا ىرىكتەۋ كەزەڭدەرىنىڭ ءبىرى سانالادى. وسىعان بايلانىستى وتاندىق سپورتشىلار حالىقارالىق رەيتينگتىك ۇپايلاردى ەندى شەتەلدەگى جارىستاردا عانا ەمەس, ەلىمىزدە وتكەن بەدەلدى تۋرنيردە دە جيناۋعا مۇمكىندىك الدى.

ەلىمىزدە تۇڭعىش رەت ۇيىم­داستىرىلعان حالىقارالىق دودادا جەرگىلىكتى سپورتشىلار برازيليا, كولۋمبيا, ءۇندىستان, ماروككو, جاڭا زەلانديا, وڭتۇستىك افريكا رەسپۋب­ليكاسى, مىسىر, ەكۆادور, رەسەي جانە وزبەكستاننان كەلگەن تاجىريبەلى قارسىلاستارىمەن باق سىناستى. بۇل جارىس وتاندىق ات سپورتىنىڭ حالىق­ارالىق دەڭگەيدەگى بايلانىسىن كەڭەيتىپ, شاباندوزدارىمىزدىڭ تاجىريبە الماسۋىنا جول اشتى.

جارىس باعدارلاماسىنا كونكۋر مەن اتپەن مانەرلەپ ءجۇرۋ (درەسساج) سايىستارى ەنگىزىلدى. قاتىسۋشىلار ءار باعدارلامادا جوعارى شەبەرلىك پەن تىڭعىلىقتى دايىندىعىن كورسەتتى. اسىرەسە بيىكتىگى 160 سانتيمەترگە دەيىنگى كەدەرگىلەردەن سەكىرۋ باسەكەسى كورەرمەندەردىڭ ەرەكشە قىزىعۋشىلىعىن تۋدىردى. الەم كۋبوگىنىڭ كەزەڭى مەن گران-پري جارىستارىنىڭ مارتەبەسى جوعارى بولعاندىقتان, ءاربىر شاباندوز جەڭىس جولىندا  ايانىپ قالعان جوق.

تۋرنير FEI «Jumping World Challenge Final» ىرىكتەۋ جارىسىمەن, CSI-W الەم كۋبوگى كەزەڭىمەن باس­تالدى. بيىكتىگى 125 سانتيمەتر­لىك كەدەرگىلەردەن سەكىرۋ سايىسىندا وزبەكستاندىق حۋرشيدبەك ءالىمجانوۆ «Champions League» تۇل­پارىمەن جەڭىسكە جەتتى. ءبىزدىڭ بەك­جان بايجان ۇلى «King Diamond» سايگ ۇلىگىمەن كۇمىس جۇلدەگە يە بول­سا, قىرعىزستاندىق رينات گاليموۆ ۇز­دىك ۇشتىكتى تۇيىندەدى.

FEI  «Jumping World Challenge ­Final 2026» باعدارلاماسىنىڭ العاش­قى ىرىكتەۋ كەزەڭىندە وزبەكستان­دىق بەكزود روزمۋحامەدوۆ ۇزدىك ناتيجە كورسەتتى. ەكىنشى ورىن برازيليا­لىق بەرناردو كراۋس گەرراعا بۇيىرسا, جاڭازەلانديالىق ەيمي كوللينسون ءۇشىنشى ورىننان كورىندى.

العاشقى كۇننىڭ ەڭ جاۋاپتى سىن­دارىنىڭ ءبىرى «CSI-W FEI Jumping World Cup» اياسىنداعى «Bank center credit equestrian cup» گران-پريىنە ىرىكتەۋ جارىسى بولدى. بيىكتىگى 140 سانتيمەترلىك كەدەرگىلەردەن سەكىرۋدە ءبىزدىڭ ولەگ سوكو­لەنكو «Cinderella» تۇلپارىمەن ۇزدىك ونەر كورسەتىپ, جەڭىمپاز اتاندى. بەيتاراپ مارتەبەدەگى سەرگەي پەتروۆ كۇمىس جۇلدە يەلەنسە, ولەسيا لۋكينا قولا مەدالعا قول جەتكىزدى.

حالىقارالىق تۋرنيرگە تىڭ­عى­لىقتى دايىندالعان وزبەكستاندىق بەكزود روزمۋحامەدوۆ «Challenge Final» باعدارلاماسىنىڭ ەكىن­شى ىرىكتەۋ جارىسىندا دا قارسىلاس­تا­رىنان وق بويى وزىق شىقتى. ماروك­كولىق نال زەرۋال ەكىنشى ورىن السا, بەرناردو كراۋس گەررا تاعى ءبىر مارتە جۇلدەگەرلەر قاتارىنان كورىندى. قازاقستاندىق ءانۋار دوسمايلوۆ ال­عاشقى بەستىكتەن ورىن الدى.

درەسساج باعدارلاماسىنداعى باسە­­كەلەردە دە جوعارى ناتيجە تىر­كەل­­دى. CDI 1* FEI Dressage باع­دار­لاماسىنىڭ St. George سىنىندا وزبەكستاندىق الينا شەۆتسوۆا توپ جاردى. قىرعىزستاندىق ەكاتەرينا كاركاۆتسەۆا كۇمىس جۇلدەگە يە بولسا, قازاقستاندىق داريا پوپوۆا ۇزدىك ۇشتىكتى قورىتىندىلادى.

سايىستىڭ ەكىنشى كۇنى وتكەن «CDI Intermediate I» باعدارلاماسىندا داريا پوپوۆا كۇمىس جۇلدەگەر اتاندى. ال Grand Prix «Bank center credit cup» CDI 3* جارىسىندا تاعى دا الينا شەۆتسوۆا جەڭىس تۇعىرىنىڭ ەڭ بيىك ساتىسىنا كوتەرىل­دى. ەكاتەرينا كاركاۆتسەۆا ءۇشىنشى ورىندى يەلەندى.

«CSI-W FEI Jumping World Cup» باعدارلاماسى بويىنشا 135 سانتيمەترلىك كەدەرگىلەردەن سەكىرۋدە ولەگ سوكولەنكو قولا مەدال جەڭىپ الدى. ال «Ultima yandex cup» جارىسىندا رايسا سوكولەنكو «Uran-nad Wigrami» تۇلپارىمەن تاماشا ونەر كورسەتىپ, قازاقستان قورجىنىنا التىن مەدال سالدى.

ءتۋرنيردىڭ ەڭ اسەرلى ساتتەرىنىڭ ءبىرى «Six Bar Jump-Off» سايىسى بولدى. بۇل باسەكەدە كەدەرگىلەردىڭ بيىك­­تىگى كەزەڭ-كەزەڭىمەن 170 سان­تي­مەترگە دەيىن كوتەرىلىپ وتىر­دى. ناتيجەسىندە, ءنۇريلا تۇرىسبە­كوۆا مەن ياسمين يبراگيموۆا ۇزدىك شى­عىپ, ەلىمىزگە تاعى ەكى التىن جۇلدە سىيلادى.

ءۇشىنشى جارىس كۇنى «FEI Jum­ping World Challenge Final» جەڭىم­پازدارى انىقتالدى. «Final Compe­tition – Challenge Final» (120 سم) باعدارلاماسىندا برازيليالىق بەر­نار­دو كراۋس گەررا جەڭىسكە جەتتى. كۇمىس جۇلدە بەكزود روزمۋحامەدوۆ­كە بۇيىرسا, كولۋمبيالىق نيكو­لاس رود­ريگەس پوسادا ۇزدىك ۇشتىكتى تۇيىندەدى.

بۇل باعدارلامادا جەرلەستەرىمىز جوعارى ناتيجە كورسەتە الماعانى­مەن, «CSI-W AEF/Mantena Cup» ­(135 سم) سايىسىندا ەسەسىن قايتار­دى. ولەگ سوكولەنكو «Shenanigan» تۇلپا­رىمەن جەڭىمپاز اتانىپ, «Selly Blue» سايگ ۇلىگىمەن تاعى ءبىر مارتە كۇمىس جۇلدەگە قول جەتكىزدى. ال قىز­دار اراسىنداعى باسەكەدە ءنۇريلا تۇرىسبەكوۆا قولا مەدال ەنشىلەدى.

ءتۋرنيردىڭ شارىقتاۋ شەگى سانالاتىن «Grand Prix Maxima Masters Eurasia Cup CSI-W» (160 سم) جارىسى دا جوعارى دەڭگەيدە ءوتتى. بۇل سىندا بەيتاراپ مارتەبەدەگى بوگدان ۆاسكوۆسكي «Emilion fonroque» تۇلپارىمەن جەڭىسكە جەتتى. كسەنيا حايرۋلينا كۇمىس جۇلدەگەر اتانسا, قىرعىزستاندىق كاميل سابيتوۆ قولا مەدال يەلەندى.

درەسساج باعدارلاماسىنداعى «Inter­mediate i freestyle aef/Mantena CUP» سايىسىندا داريا پوپوۆا قولا جۇلدەگە يە بولدى. ال «grand prix freestyle CDI 3* باع­دارلاماسىندا الينا شەۆتسوۆا تاعى دا ءوزىنىڭ جو­عارى دەڭگەيىن دالەلدەپ, جارىستىڭ جەڭىمپازى اتاندى.

ەلورداداعى حالىقارالىق تۋرنير قازاقستاننىڭ حالىقارالىق ات سپورتى فەدەراتسياسى اياسىن­داعى بە­دەلدى جارىستاردى جوعارى دەڭگەيدە ۇيىم­داستىرا الاتىنىن تاعى ءبىر مارتە كورسەتتى. ءۇش كۇنگە سوزىلعان باسەكە قو­رىتىندىسىندا قازاقستان قۇرا­ما­سى 14 مەدال جەڭىپ الدى. بۇل ناتي­جە وتاندىق ات سپورتىنىڭ قارقىن­دى دا­مىپ كەلە جاتقانىن, وتاندىق سپورت­شىلاردىڭ حالىقارالىق ارەنا­داعى باسەكەگە قابىلەتتىلىگىن ايقىن اڭعارتتى.

ولەگ سوكولەنكو, رايسا سوكو­لەنكو, ءنۇريلا تۇرىسبەكوۆا, ياسمين يبراگيموۆا, داريا پوپوۆا, بەك­جان بايجان ۇلى باستاعان شابان­دوزدار­دىڭ تابىستى ونەرى جان­كۇيەرلەر­دىڭ كوڭىلىنەن شىقتى. ەندى ولار الدا­عى حالىقارالىق جارىستاردا دا ەل نامىسىن ابىرويمەن قور­عاپ, جوعارى ناتي­جەلەرگە قول جەتكىزەدى دەگەن سەنىم مول.