پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا ەلىمىزدە اتاپ وتىلەتىن انالار كۇنىنە وراي بارشا انالارعا اقجارما تىلەگىن ارنادى, دەپ حابارلايدى Egemen.kz.
مينيستر مامىر ايىنىڭ ەكىنشى جەكسەنبىسىندە تويلاناتىن بۇل مەرەكەنىڭ ءمان-ماعىناسىنا توقتالىپ, انانى مەيىرىم مەن ىزگىلىكتىڭ شۋاعى, وتباسى بەرەكەسىنىڭ التىن دىڭگەگى دەپ اتادى.
«انا – ءار ادام ءۇشىن ەڭ قىمبات ۇعىم. مەيىرىمنىڭ باستاۋى, ىزگىلىكتىڭ شۋاعى, وتباسىنىڭ بەرەكەسى مەن ۇرپاق تاربيەسىنىڭ التىن دىڭگەگى.
قازاق دۇنيەتانىمىندا انا بەينەسى قاشاندا ايرىقشا قاستەرلەنگەن. انانىڭ اقىلى مەن ونەگەسى, سابىرى مەن مەيىرىمى ارقىلى ۇرپاقتان ۇرپاققا قۇرمەت, ىزەت, جاناشىرلىق, جاۋاپكەرشىلىك سياقتى اسىل قۇندىلىقتار جالعاسىپ كەلەدى. بۇل قۇندىلىقتار – حالقىمىزدىڭ رۋحاني تۇتاستىعى مەن ەلدىگىمىزدىڭ بەرىك نەگىزى», دەدى ايدا بالاەۆا.
سونىمەن قاتار مينيستر مەملەكەت تاراپىنان جۇزەگە اسىرىلىپ جاتقان انا مەن بالانى قولداۋ شارالارىنا دا توقتالدى. بۇگىندە ەلىمىزدە وتباسى ينستيتۋتىن نىعايتۋعا باعىتتالعان مەملەكەتتىك ساياسات جۇيەلى ءجۇرىپ جاتقانىن, وتباسىن قولداۋ ورتالىقتارى مەن انالار كەڭەسىنىڭ جۇمىسى ناتيجەلى ەكەنىن تىلگە تيەك ەتتى.
«وسى ايتۋلى كۇنى بارشا انالارعا دانالىعى, ءتوزىمى, مەيىرىمى مەن اق نيەتى ءۇشىن شىن جۇرەكتەن العىس ايتامىن. انالارىمىز امان, شاڭىراقتارىمىز شاتتىققا تولى بولسىن!
انامىزبەن بىرگە وتكىزگەن ءاربىر ءساتتىڭ قادىرىن تەرەڭ سەزىندىرەتىن مەرەكەمەن بارشاڭىزدى شىن جۇرەكتەن قۇتتىقتايمىن!
وتباسىلارىڭىزعا جىلۋلىق, ماحاببات, بەرەكە-بىرلىك پەن اماندىق تىلەيمىن!», دەدى ايدا بالاەۆا.