مەيرامگۇل يماشەۆا, استانا قالاسى اكىمدىگى «ەڭبەك موبيلدىلىگى ورتالىعى» جۇمىس بەرۋشىلەرمەن بايلانىس ءبولىمىنىڭ باسشىسى:
«مەملەكەت جۇمىسسىز ازاماتتارعا كوپ قولداۋ كورسەتەدى. سونى پايدالانىپ, ەڭبەك نارىعىندا ءوز ورنىن تابۋدى ويلاعاندار «جۇمىسسىز» ەكەنىن راستاپ, جۇمىسپەن قامتۋدى قولداۋدىڭ مەملەكەتتىك شارالارىنا قول جەتكىزۋگە جۇمىس ىزدەپ جۇرگەن ادام رەتىندە تىركەۋدەن ءوتۋى قاجەت. وسىدان كەيىن عانا جۇمىسسىز ازامات جۇمىسىنان ايىرىلعانىنا وراي الەۋمەتتىك تولەم الۋعا, وزىنە لايىقتى بوس جۇمىس ورىندارىن ىزدەپ, جۇمىسقا ورنالاسۋعا جاردەمدەسۋدىڭ مۇمكىندىگىن تولىق پايدالانا الادى. ول از دەسەڭىز, مەملەكەت سۋبسيديالايتىن ۋاقىتشا جۇمىس ورىندارىنا بارۋعا مۇمكىندىك تۋادى. وسىنداي جوبالاردىڭ بىرنەشەۋىنە از-كەم توقتالا كەتەيىك.
جىل سايىن 18-35 جاس ارالىعىنداعى جاستار مەن الەۋمەتتىك وسال توپتارعا جاڭا بيزنەس يدەيالاردى ىسكە اسىرۋعا 400 اەك (1 476 800 تەڭگە) كولەمىندە قايتارىمسىز گرانت بەرىلەدى. ونى الۋعا جۇمىسسىز رەتىندە تىركەلمەسە بولمايدى. تىركەلگەن سوڭ «باستاۋ بيزنەس» كۋرسىنان ءوتىپ, ءوزىنىڭ بيزنەس-جوسپارىن قورعاۋى قاجەت. وتىنىشتەر business.enbek.kz پورتالى ارقىلى ونلاين قابىلدانادى. گرانت قايتارىمسىز نەگىزدە بەرىلەدى. بىراق ازاماتتاردان قاراجاتتى تەك بيزنەس-جوسپاردا كورسەتىلگەن ماقساتتارعا پايدالانۋ تالاپ ەتىلەدى.
جۇمىسىنان ايىرىلعان جاعدايدا تولەنەتىن الەۋمەتتىك تولەمگە مىندەتتى الەۋمەتتىك ساقتاندىرۋ جۇيەسىنىڭ قاتىسۋشىلارى, مەملەكەتتىك الەۋمەتتىك ساقتاندىرۋ قورىنا الەۋمەتتىك اۋدارىمدارى بار ازاماتتار ۇمىتكەر بولا الادى. جۇمىسىنان ايىرىلعان ازاماتتارعا الەۋمەتتىك تولەمنىڭ ۇزاقتىعى 6 ايعا دەيىن جالعاسۋى مۇمكىن. تولەمنىڭ مولشەرى تابىستىڭ ورتاشا ايلىق كولەمىنە, مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە بايلانىستى.
مەملەكەت سۋبسيديالايتىن ۋاقىتشا جۇمىس ورىندارىنا قاتىستى دا بىرنەشە جوبا بار. ايتالىق, «كۇمىس جاس» جوباسى. وعان زەينەت جاسقا تولماعان, 50 جاستان اسقان تۇلعالار قاتىسا الادى. جۇمىستىڭ ۇزاقتىعى 36 ايدان اسپايدى. تاعى ءبىر ۇلكەن ارتىقشىلىعى, جوبانىڭ مەرزىمى وتكەن سوڭ, وعان قاتىسقان تۇلعاعا زەينەتكە شىققانشا تۇراقتى جۇمىس ورنى بەرىلەدى. قوعامدىق جۇمىستى مانساپ ورتالىقتارى جۇمىسسىزداردى ۋاقىتشا جۇمىسپەن قامتاماسىز ەتۋ ماقساتىندا ۇيىمداستىرادى. قوعامدىق جۇمىستار قىزمەتكەردىڭ الدىن الا كاسىپتىك دايارلاۋدان ءوتۋىن تالاپ ەتپەيدى ءارى الەۋمەتتىك پايدالى باعىتتا بولادى. سول سەكىلدى «جاستار پراكتيكاسى» جوباسىمەن تاجىريبە شىڭداپ, كەيىن تۇراقتى جۇمىسقا ورنىققان ازاماتتاردىڭ شوعىرى قالىپتاستى. باعدارلامانىڭ يگىلىگىن كورگەن تولقىننىڭ العاشقى لەگى بۇگىندە ەڭبەك نارىعىندا ءوز ورنىن تاۋىپ, ورنىعىپ ۇلگەردى. وسىعان ۇقساس «العاشقى جۇمىس ورنى» جوباسىنا دا 35 جاسقا دەيىنگى تۇلعالار قاتىسا الادى. وسىنداي, مەملەكەت سۋبسيديالايتىن باستامالاردىڭ ىشىندە «الەۋمەتتىك جۇمىس ورىندارى», «ۇرپاقتار كەلىسىمشارتى» سىندى تيىمدىلىگىن كورسەتكەن جوبالار بار.
بىلتىر تەك استانا قالاسىندا 10 مىڭنان استام ازامات جۇمىسسىز رەتىندە تىركەلدى. ونىڭ ىشىندە 8 مىڭنان استامى تۇراقتى جانە ۋاقىتشا جۇمىسقا ورنالاستى. بۇل قاتاردا مۇگەدەكتىگى بار 720 ادام جۇمىسپەن قامتىلدى. ءبىر سوزبەن ايتقاندا, جوبالار جەمىسىن بەرىپ جاتىر. مەملەكەتتەن كورسەتىلەتىن قولداۋلاردىڭ شاپاعاتىن كورگىسى كەلەتىن جۇمىسسىز ازامات Enbek.kz پورتالى ارقىلى جەكە كابينەت اشىپ, «جۇمىس ىزدەپ جۇرگەن ادام رەتىندە تىركەلۋ» بولىمىندە ونلاين ءوتىنىم بەرۋى كەرەك. جۇمىسسىز رەتىندە تىركەلەتىن ازاماتتاردىڭ تۇراقتى جۇمىسى, تابىسى بولماۋعا ءتيىس.