قاسىم-جومارت توقاەۆ ەلىمىزدىڭ دامۋىنا ەلەۋلى ۇلەس قوسقان بىرقاتار ازاماتقا مەملەكەتتىك ناگرادالار تابىس ەتتى, دەپ حابارلايدى Egemen.kz اقوردا دەرەگىنە سىلتەمە جاساپ.
ەسكە سالايىق, بۇگىن قاسىم-جومارت توقاەۆ جۇمىس ساپارىمەن تۇركىستان وبلىسىنا باردى. پرەزيدەنتتىڭ وڭىرگە ساپارى تۇركى الەمىنىڭ ەڭ ۇلى رۋحاني ءارى تاريحي-مادەني قاسيەتتى ورىندارىنىڭ ءبىرى — قوجا احمەت ياساۋي كەسەنەسىن زيارات ەتۋدەن باستالدى. بۇل نىسان يۋنەسكو-نىڭ دۇنيەجۇزىلىك مۇرالار تىزىمىنە ەنگىزىلگەن.
كەيىن تۇركىستان وبلىسىنىڭ جۇرتشىلىعىمەن كەزدەسۋدە پرەزيدەنت تۇركىستاننىڭ باۋىرلاس تۇركى حالىقتارى ءۇشىن قاسيەتتى مەكەن ەكەنىن اتاپ ءوتتى. سونداي-اق قالا قازاق حالقىنىڭ تاعدىرىنداعى تاريحي رولىنە توقتالدى.
بۇدان بولەك, قاسىم-جومارت توقاەۆ رەفەرەندۋمعا بەلسەندى قاتىسقان قازاقستاندىقتارعا العىس ءبىلدىرىپ, جاڭا كونستيتۋتسيا ەڭ الدىمەن ءوسىپ كەلە جاتقان ۇرپاقتىڭ يگىلىگى ءۇشىن قابىلدانعانىن ايتتى.
بۇعان دەيىن مەملەكەت باسشىسى قازاقستاندىقتاردى ناۋرىز مەيرامىمەن قۇتتىقتاعان بولاتىن.