قاسىم-جومارت توقاەۆ ەلىمىزدىڭ وركەنيەت جولىنا شىعۋى ءۇشىن ەشقانداي كەدەرگىگە مويىماي, جاستاردىڭ بولمىسىن جوعارى تەحنولوگيالارعا بەيىمدەپ, جاساندى ينتەللەكتى سەكىلدى وزىق سالادا جەتىستىككە جەتۋ قاجەتتىگىن ايتتى, دەپ حابارلايدى Egemen.kz.
«تۇبەگەيلى جاڭعىرعان اتا زاڭىمىزدىڭ پرەامبۋلاسىندا ايتىلعانداي, ءبىز حالىق كونستيتۋتسياسىن كەلەشەك ۇرپاق الدىنداعى جاۋاپكەرشىلىگىمىزدى تەرەڭ سەزىنە وتىرىپ قابىلدادىق. بىراق بۇل – ۇلكەن جولدىڭ باسى عانا.
ءبىز ەشقانداي كەدەرگى مەن قيىندىققا قاراماي, ەلىمىزدى وركەنيەت جولىنا شىعارۋىمىز كەرەك. حالقىمىزدىڭ تاريحي تاعدىرى – ءوزىمىزدىڭ قولىمىزدا. قازاقستاننان باسقا وتانىمىز جوق. شىندىقتى ايتساق, قازاقستاننىڭ دامۋى مەن ورلەۋى بىزدەن باسقا ەشكىمگە كەرەك جوق. سوندىقتان قازىرگى ۇرپاق وتانىمىزدىڭ باياندى بولاشاعى ءۇشىن بارلىق جاعدايدى جاساۋى كەرەك», دەدى مەملەكەت باسشىسى.
پرەزيدەنت قازاق حالقىنىڭ وتكەن تاريحىن قاسىرەتكە تولى كۇردەلى تاريح دەپ كۇمانسىز ايتۋعا بولاتىنىن جەتكىزدى. بىراق, مەملەكەت باسشىسىنىع ايتۋىنشا, قازىرگى زاماندا بۇل تاقىرىپتى قايتا-قايتا ايتىپ, قارا بۇلتتى ءتوندىرۋدىڭ, مۇڭعا باتۋدىڭ قاجەتى جوق.
قاسىم-جومارت توقاەۆ ەلىمىزدىڭ جاستارىنا زور ءۇمىت ارتاتىنىن ايتتى
«حالقىمىز تەك قانا العا قاراي زور ۇمىتپەن قاراپ, ىلگەرىلەۋ زامانىنا ساي ءوز بولمىسىن وزگەرتىپ, بەيىمدەپ ءومىر ءسۇرۋى كەرەك. مۇڭدى حالىق ەشقاشان باقىتتى, تابىستى بولمايدى. بۇل دا – ءومىر زاڭى جانە اقيقات.
جاستاردىڭ بولمىسىن جوعارى تەحنولوگيالارعا, تەحنيكاعا بۇرۋ كەرەك. سەبەبى قازىرگى زامانداعى مەملەكەت دامۋىنىڭ كىلتى – تەحنيكا مەن وزىق تەحنولوگيادا, سونىڭ ىشىندە ەڭ الدىمەن جاساندى ينتەللەكتىدە. ءبارىمىز ءبىر ۇلت بولىپ, ءبىر ەل بولىپ وسى ۇلى تاريحي جورىقتا مىندەتتى تۇردە جەڭىسكە جەتۋىمىز قاجەت. بۇل – ءبىزدىڭ ەڭ باستى مىندەتىمىز, ميسسيامىز», دەدى ق.توقاەۆ.
ايتا كەتەيىك, بۇگىن مەملەكەت باسشىسى قاسىم-جومارت توقاەۆ تۇركىستان وبلىسىنا جۇمىس ساپارىمەن بارىپ, قوجا احمەت ياساۋي كەسەنەسىنە زيارات ەتتى.