قاسىم-جومارت توقاەۆ تۇركىستان وبلىسى جۇرتشىلىعىمەن كەزدەسۋدە وڭىردەگى بۋ-گاز قوندىرعىسىنىڭ قۇرىلىسى سوزىلىپ كەتكەنىن اتاپ ءوتىپ, ۇكىمەت پەن «سامۇرىق-قازىناعا» جوبانى جەدەلدەتىپ, قاتاڭ باقىلاۋعا الۋدى تاپسىردى, دەپ حابارلايدى Egemen.kz.
«70 جىلدان بەرى جوندەۋ جۇمىستارى جاسالماعان كەنتاۋ جىلۋ ەنەرگيا ورتالىعىن جاڭعىرتۋعا قوماقتى قارجى ءبولىندى.
سونداي-اق تاعى ءبىر ماڭىزدى ماسەلە. وبلىستا سالىنىپ جاتقان بۋ-گاز قوندىرعىسىنىڭ قۇرىلىسىن تەزدەتۋ كەرەك. جۇمىس سوزىلىپ كەتتى. ۇكىمەتكە جانە «سامۇرىق-قازىناعا» وسى ماسەلەنى قاتاڭ باقىلاۋعا الۋدى تاپسىرامىن», دەدى مەملەكەت باسشىسى.
پرەزيدەنتتىڭ ايتۋىنشا, جالپى, ايماقتا ءتۇرلى ءوندىرىس كاسىپورىندارى اشىلىپ, جۇزدەگەن ادام بىرتىندەپ جۇمىسپەن قامتىلىپ جاتىر. مۇنىڭ ءبارى دە – ەل ىشىندە بولىپ جاتقان ناقتى جۇمىستىڭ كورىنىسى.
«مەن ءاردايىم ايتىپ جۇرەمىن: ايماقتارىمىز قۋاتتى بولسا, مەملەكەت تە مىقتى بولادى. بۇل ءبىزدىڭ جەتىستىكتەرىمىزدىڭ نەگىزگى فورمۋلاسى دەپ ايتساق, ارتىق بولمايدى. سوندىقتان وڭىرلەردىڭ ەكونوميكاسىن نىعايتىپ, حالىقتىڭ ءال-اۋقاتىن جاقسارتۋ مەملەكەتتىڭ باستى نازارىندا تۇراتىن ستراتەگيالىق ماقسات بولىپ قالا بەرمەك», دەدى ق.توقاەۆ.
ايتا كەتەيىك, بۇگىن مەملەكەت باسشىسى قاسىم-جومارت توقاەۆ تۇركىستان وبلىسىنا جۇمىس ساپارىمەن بارىپ, قوجا احمەت ياساۋي كەسەنەسىنە زيارات ەتتى.
سونىمەن قاتار قاسىم-جومارت توقاەۆ تۇركىستان وبلىسى جۇرتشىلىعىمەن كەزدەسۋدە تۇركىستاننىڭ تاريحي ءارى رۋحاني ماڭىزىنا توقتالىپ, بۇل وڭىرگە ەرەكشە ىقىلاسى بار ەكەنىن اتاپ ءوتتى.