باتىس قازاقستان وبلىسىندا ۇلتتىق سپورت كۇنىنە ارنالعان مەرەكەلىك شارا مەن «بابالار ىزىمەن» ۇلتتىق سپورت ليگاسىنىڭ اشىلۋىنا ارنالعان سالتاناتتى كەش ءوتتى دەپ حابارلايدى Egemen.kz.
سوڭعى جىلدارى ەلىمىزدە ۇلتتىق سپورت كۇنى ناۋرىز مەيرامىنىڭ اجىراماس بولىگىنە اينالدى. بيىلعى ناۋرىزدىڭ 20-سى باتىس قازاقستان وڭىرىندە ۇلتتىق ءداستۇر مەن زاماناۋي ۇردىستەردى ۇشتاستىرعان تاعىلىمدى شارا ۇيىمداستىرىلىپ, «بابالار ىزىمەن» ۇلتتىق سپورت ليگاسىنىڭ سالتاناتتى اشىلۋى ءوتتى.
بىرنەشە بولىمنەن تۇرعان اۋقىمدى مەرەكەلىك باعدارلاماعا ەكى مىڭعا جۋىق قوناق پەن سپورتشى قاتىسىپ, ءتول مۇرانى دارىپتەۋدىڭ جارقىن ۇلگىسى كورسەتتى.
شارا اياسىندا ۇيىمداستىرىلعان «NatRoboCom» اتتى روبوتتار جارىسى تىڭ باستامانىڭ ءبىرى بولدى. مەملەكەت باسشىسى بەكىتكەن تسيفرلاندىرۋ جانە جاساندى ينتەللەكت جىلىنا ورايلاستىرىلعان جارىستا روبوتتار ءوزارا ارقان تارتىسىپ, اسىق اتىپ سىنعا ءتۇستى. سونداي-اق «روبوقىزقۋ» مەن «روبواقسۇيەك» ويىندارىنىڭ كورسەتىلىمى ۇسىنىلىپ, تسيفرلىق تەحنولوگيا ارقىلى ۇلتتىق ويىنداردىڭ جاڭا تىنىسى اشىلدى.
ارينە, بۇل كۇنى ناعىز ۇلتتىق سپورت تۇرلەرى دە قىزدى. كىر تاسىن كوتەرىپ, قازاق كۇرەسىنەن كۇش سىناسقان پالۋاندار, ءداستۇرلى ساداقتان نىسانا كوزدەگەن مەرگەندەر, اسىق اتقان العىرلار, توعىزقۇمالاقتى تەز ويناپ, مي شىنىقتىرعان مىقتىلار مايدانعا ءتۇستى. ودان بولەك قولونەر كورمەسى ۇيىمداستىرىلىپ, قامشى ءورۋ, ات تاعالاۋ, ۇلتتىق بۇيىمدار جاساۋ بويىنشا شەبەرلىك ساعاتتارى وتكىزىلدى. قوناقتارعا قازاقتىڭ ۇلتتىق تاعامى ۇسىنىلىپ, ناۋرىزدىڭ بەرەكەلى داستارحانى جايىلدى.
«ناۋرىز – جاڭارۋ مەن جاڭعىرۋدىڭ, ىرىس پەن ىنتىماقتىڭ, بەرەكە مەن بىرلىكتىڭ مەيرامى. مەملەكەت باسشىسى قاسىم-جومارت توقاەۆتىڭ باستاماسىمەن بيىل ءۇشىنشى جىل قاتارىنان ناۋرىزناما ونكۇندىگىن وتكىزىپ كەلەمىز. وسى ناۋرىزناما اياسىندا ءوتىپ جاتقان ۇلتتىق سپورت كۇنى جاس ۇرپاقتىڭ بويىندا ۇلتتىق رۋحتى ۇستەم ەتۋگە باعىتتالعان ماڭىزدى قادام. بۇل – ءبىزدىڭ تاريحىمىز, سالت-ءداستۇرىمىز, رۋحاني قۇندىلىعىمىز. ۇلتتىق ويىنداردى ۇلىقتاپ, ءتول سپورتتى تورگە وزدىرۋ – ءبارىمىزدىڭ ورتاق مىندەتىمىز, بابالار اماناتىنا ادالدىق. ايماقتا بۇل باعىتتاعى جۇمىس جۇيەلى تۇردە جالعاسىپ جاتىر», دەدى وبلىس اكىمى ناريمان تورەعالي ۇلى «بابالار ىزىمەن» ۇلتتىق سپورت ليگاسىنىڭ سالتاناتتى اشىلۋ راسىمىندە.
ايتا كەتەيىك, «بابالار ىزىمەن» ۇلتتىق سپورت ليگاسى – حالقىمىزدىڭ ءداستۇرلى ويىندارى مەن سپورت تۇرلەرىن جاڭعىرتۋعا باعىتتالعان ماڭىزدى جوبا.
ۇيىمداستىرۋشىلاردىڭ پىكىرىنشە, بۇل باستاما ۇلتتىق قۇندىلىقتاردى دارىپتەپ قانا قويماي, جاس ۇرپاقتى رۋحاني مۇراعا جاقىنداتا تۇسپەك.