پرەمەر-مينيستر ولجاس بەكتەنوۆ «بايتەرەك» ۇلتتىق ينۆەستيتسيالىق حولدينگى» اق ديرەكتورلار كەڭەسىنىڭ وتىرىسىن وتكىزدى. وتىرىستا بىلتىرعى ينۆەستيتسيالىق ساياساتتى ورىنداۋ قورىتىندىلارى, سونداي-اق ەكونوميكانىڭ باسىم باعىتتارىن ودان ءارى قارجىلاندىرۋ ماسەلەلەرى قارالدى.
وتىرىستى اشقان پرەمەر-مينيستر ديرەكتورلار كەڭەسىنىڭ مۇشەلەرىن جانە شاقىرىلعانداردى ەلىمىزدىڭ جاڭا كونستيتۋتسياسىنىڭ قابىلدانۋىمەن قۇتتىقتاپ, وقيعانىڭ تاريحي ماڭىزدىلىعىن اتاپ ءوتتى.
«قازاقستان ءوزىنىڭ ساياسي, الەۋمەتتىك-ەكونوميكالىق جانە قوعامدىق دامۋىنىڭ جاڭا كەزەڭىنە اياق باستى. ءبىزدىڭ بارلىعىمىزدى ەلىمىزدىڭ اتا زاڭىندا ورنىققان قاعيداتتاردى, نورمالار مەن پوستۋلاتتاردى جۇزەگە اسىرۋ بويىنشا ۇلكەن جۇمىستار كۇتىپ تۇر», دەدى و.بەكتەنوۆ.
«بايتەرەك» ۇيح باسقارما توراعاسى رۋستام قاراعويشيننىڭ مالىمەتىنشە, بىلتىر ەنشىلەس ۇيىمدار ارقىلى ەكونوميكانىڭ شيكىزاتتىق ەمەس سالالارىن قارجىلاندىرۋ كولەمى 8 ترلن تەڭگەنى قۇرادى. بۇل الدىڭعى جىلعى دەڭگەيدەن 96% جوعارى. 7,1 ترلن تەڭگە سوماسىنداعى قولداۋ شامامەن 75 مىڭ كومپانيا مەن ۇيىمدارعا كورسەتىلدى. حولدينگتىڭ كومەگىنە يە بولعان كاسىپورىنداردىڭ ەكسپورت كولەمى 1,9 ترلن تەڭگەگە جەتتى. بۇل 2024 جىلعى كورسەتكىشتەن ەكى ەسە كوپ.
جيىندا اگروونەركاسىپ كەشەنىن (اوك) قولداۋعا باسا نازار اۋدارىلدى. بىلتىر اوك-ءتى قارجىلاندىرۋ 1,4 ترلن تەڭگەنى قۇراپ, وتكەن جىلمەن سالىستىرعاندا 31%-عا ارتتى. حولدينگتىڭ كومەگىمەن 11,5 مىڭنان استام اۋىل شارۋاشىلىعى تەحنيكاسى ساتىپ الىندى. حولدينگ قىزمەتىنىڭ ناتيجەسىندە 10 مىڭنان استام جاڭا جۇمىس ورنى اشىلدى.
مەملەكەت باسشىسىنىڭ اقمولا وبلىسىنداعى ەگىن جيناۋ ناۋقانى ماسەلەلەرى جونىندەگى جيىندا بەرگەن تاپسىرماسىن ورىنداۋ شەڭبەرىندە بيىلعى ەگىس ناۋقانىن ەرتە قارجىلاندىرۋ جۇمىسى جالعاسىپ جاتىر. ديرەكتورلار كەڭەسى «اگرارلىق نەسيە كورپوراتسياسى» ارقىلى كوكتەمگى دالا جانە ەگىن جيناۋ جۇمىستارىن قارجىلاندىرۋ ماقساتىندا 300 ملرد تەڭگەگە دەيىن وبليگاتسيالار شىعارۋدى ماقۇلدادى. سونداي-اق وتاندىق وندىرىستەگى اۋىل شارۋاشىلىعى تەحنيكاسىنىڭ ليزينگىن 150 ملرد تەڭگەگە دەيىن قارجىلاندىرۋ «قازاگروقارجى» ارقىلى جانە الەۋمەتتىك وسال توپتار مەن كەزەكتە تۇرعان ازاماتتار ءۇشىن 100 ملرد تەڭگەگە دەيىن يپوتەكالىق نەسيەلەۋدى «وتباسى بانك» ارقىلى جۇزەگە اسىرۋ ماقۇلداندى.
بيىل «بايتەرەك» حولدينگى ەكونوميكا سالالارىن قولداۋعا 8 ترلن تەڭگەگە دەيىن قارجى باعىتتاۋدى جوس-پارلاپ وتىر. باسىم باعىتتاردىڭ قاتارىندا ونەركاسىپ پەن ينفراقۇرىلىمدى قارجىلاندىرۋ, اگروسەكتوردى قولداۋ, ەكسپورتتى دامىتۋ مەن حالىقتى قولجەتىمدى تۇرعىن ۇيمەن قامتاماسىز ەتۋ بار.
پرەمەر-مينيستر ولجاس بەكتەنوۆ ەكونوميكانىڭ ناقتى سەكتورىن قولداۋدى ودان ءارى كۇشەيتۋدىڭ, شيكىزاتتىق ەمەس سالالاردى دامىتۋدىڭ جانە حولدينگ قۇرالدارىنىڭ تيىمدىلىگىن قامتاماسىز ەتۋدىڭ ماڭىزدىلىعىن اتاپ ءوتتى. جيىن قورىتىندىسىندا بىلتىرعى IV توقسانعا ارنالعان تاۋەكەلدەر بويىنشا كونسوليداتسيالىق ەسەپ, كورپوراتيۆتىك باسقارۋدى جەتىلدىرۋ ءىس-شارالارى جوسپارىن ورىنداۋ ناتيجەلەرى جانە ديرەكتورلار كەڭەسىنىڭ بىلتىرعى قىزمەتىن باعالاۋ ناتيجەلەرى دە بەكىتىلدى.