«مەنىڭ قازاقستانىم» ەلگە شىقتى

«ادامنىڭ باسشىسى – اقىل, شولۋشىسى – وي, جەتەكشىسى – تالاپ, قورعاۋشىسى – سابىر, سىناۋ­شىسى – حالىق, تاۋسىلمايتىنى – ارمان, ەڭ قىمباتتىسى – ار ساقتاۋ, بارىنەن ارداقتىسى – ءومىر ءسۇرۋ, سونىڭ ىشىندە ەڭ ءتاتتىسى – سىيلاستىق» دەگەن ەكەن تولە بي بابامىز. وسىنىڭ ىشىندەگى ەڭ ءتاتتىسى –دەپ وتىرعانى – سىيلاستىق, ول تەك ادامدار اراسىندا عانا ەمەس, سونداي-اق, ەل مەن ەل, ۇلت پەن ۇلت اراسىنداعى سىيلاستىق دەپ تۇسىنەتىن بولساق, وندا سول سىيلاستىققا سىزات تۇسىرمەي كەلە جاتقان قازاقستان حالقى اسسامبلەياسى دەر ەدىك. وسىدان جيىرما جىل بۇرىن ەلباسى نۇرسۇلتان نازارباەۆتىڭ قولداۋىمەن قۇرىلعان, ۇلت پەن ۇلىستى بايىرعى قازاق جەرىندە ءوزارا ىنتىماق پەن كەلىسىمگە ۇيىتقان اسسامبلەيا وتە كەڭ كولەمدەگى الەۋمەتتىك اكتسياسىن باستادى. قازاقستان حالقى اسسامبلەياسىنىڭ 20 جىلدىعى, ۇلى جەڭىستىڭ 70 جىلدىعى, كونستيتۋتسيانىڭ 20 جىلدىعىنا بايلانىستى «مەنىڭ قازاقستانىم» اتتى پويىز ەل ارالاۋدى استانادان باستادى. 23 ناۋرىز كۇنى استانا ۆوكزالىندا «مەنىڭ قازاقستانىم» پويىزىن شىعارىپ سالۋ سالتاناتى بولدى. سالتاناتتى شارادا ءسوز سويلەگەن قازاقستان حالقى اسسسامبلەياسى توراعاسىنىڭ ورىنباسارى, حاتشىلىق مەڭگەرۋشىسى ە.توعجانوۆ بۇل پويىزدىڭ ماقساتى تۋرالى بىلاي دەدى: «پويىز قۇرامىندا مادەنيەت جانە مەديتسينا سالاسىنىڭ, الەۋمەتتىك سالانىڭ قىزمەتكەرلەرىمەن بىرگە, بانك قىزمەتكەرلەرى دە بار. بۇل اكتسيانىڭ نەگىزگى ماقساتى – ەلگە ءتۇرلى كونسۋلتاتسيالىق قىزمەتتەر كورسەتۋ».ودان كەيىن ءسوز العان مادەنيەت جانە سپورت ءمينيسترى ا.مۇحامەدي ۇلى «مەنىڭ قازاقستانىم» پويىزىنا اق جول تىلەدى. ۇزاق جول العاشقى قادامنان باستالادى دەسەك, استانادان شىققان «مەنىڭ قازاقستانىم» پويىزى سولتۇستىك قازاقستان وبلىسىنىڭ تايىنشا اۋدانىنا اتباسىن تىرەدى. اۋدان جۇرتشىلىعى پويىز «جولاۋشىلارىن» ۇلكەن ىقىلاسپەن قارسى الدى. – قازاقستان رەسپۋبليكاسى پرەزيدەنتىنىڭ 2015 جىلدى قازاقستان حالقى اسسامبلەياسى جىلى دەپ جاريالاۋى بىرلىك پەن كەلىسىم جانە دوستىق, «ماڭگىلىك ەل» بابالار ارمانىنىڭ جۇزەگە اسىرىلۋىمەن ەرەكشەلەنىپ وتىر, – دەدى سالتاناتتى شارادا ءسوز سويلەگەن تايىنشا اۋدانىنىڭ اكىمى س.سالتىقوۆ.ودان كەيىن ءسوز العان «مەنىڭ قازاقستانىم» پويىزىنىڭ باستىعى ع.تەلەباەۆ, ءماجىلىس دەپۋتاتى ز.ساياپوۆا پويىزدىڭ ماقساتى تۋرالى ايتا كەلىپ, ونىڭ جۇمىسىنا تابىستار تىلەدى. قازاقستان حالقى اسسامبلەياسىنىڭ 20 جىلدىعىنا ارنالعان «مەنىڭ قازاقستانىم» پويىزىنداعى ماماندار تايىنشا اۋدانىنىڭ 95 تۇرعىنىنا ءتۇرلى سالا بويىنشا كەڭەس بەرىپ, 450-دەن اسا ادامعا مەديتسينالىق كومەك كورسەتتى. «مەنىڭ قازاقستانىم» پويىزىنىڭ ءبىزدىڭ اۋدانداعى جۇمىسى وتە بەلسەندى جۇرگىزىلدى. پويىزبەن كەلگەن ءتۇرلى سالانىڭ بىلىكتى ماماندارى كۇنى بويى زاڭدىق جانە الەۋمەتتىك, بيزنەستى ۇيىمداستىرۋ جانە جۇرگىزۋ, مەملەكەتتىك قىزمەت كورسەتۋ سالالارى بويىنشا اۋدان حالقىنا جان-جاقتى ءتۇسىندىرۋ جۇمىسىن جۇرگىزدى», دەدى اۋدان اكىمى س.سالتىقوۆ. وسى پويىزدىڭ مۇشەسى, پارلامەنت ءماجىلىسىنىڭ دەپۋتاتى ز.ساياپوۆانىڭ ايتۋىنشا, «قحا-نىڭ 20 ىزگى ءىسى» اكتسياسى اياسىندا تايىنشا قالاسىنداعى «نادەجدا» ينتەرنات ۇيىندە وتكەن قايىرىمدىلىق شاراسى باعىتىمىزدىڭ ايقىن, الەۋمەت ءۇشىن كومەگى مول ەكەنىن دالەلدەي ءتۇستى. «وسى پويىزدىڭ ەڭ باستى ماقساتى – ەلىمىزدىڭ بارلىق وڭىرىندە ۇلتتىق بىرلىكتىڭ ءدانىن ەگۋ. بۇل «ماڭگىلىك ەل» دەگەن جالپىۇلتتىق قۇندىلىعىمىزدىڭ نەگىزگى قۇرىلىمى دەۋگە بولادى. جانە بۇگىنگى «نادەجدا» ينتەرنات ۇيىندە وتكەن قايىرىمدىلىق شاراسى بارىسىندا قارتتارىمىزدىڭ ريزاشىلىعى وسى باعىتىمىزدىڭ دۇرىستىعىن دالەلدەدى», دەدى ز.ساياپوۆا. ايتپاقشى, كەشكە تايىنشانىڭ قالىڭ جۇرتشىلىعى ۇلكەن كونتسەرت تاماشالادى. «مەنىڭ قازاقستانىم» پويىزىمەن كەلگەن ونەر قايراتكەرلەرى ە.حا­سانعاليەۆ, ن.ءنۇسىپجانوۆ, ن.ەس­قاليە­ۆا, ج.سەيدوللا ۇلى, ت.زابيروۆا, ا.جو­را­باەۆا, د.احماديەۆا جانە باسقالار ءوز ونەرلەرىن اۋدان جۇرتشىلىعىنا ۇسىندى. * * * 25 ناۋرىز كۇنى دە اتباسار تەمىرجول ۆوكزالىنىڭ باسى دۋمانعا تولى بولدى. اۋدان جۇرتشىلىعى «مەنىڭ قازاقستانىم» پويىزىن ۇلكەن سالتاناتپەن قارسى الدى. مەرەكەسى مەن بەرەكەسى تاسىعان وسى تويدا ءسوز سويلەگەن اقمولا وبلىستىق قحا حاتشىلىعىنىڭ مەڭگەرۋشىسى م.توقاەۆا: «اسسامبلەيا جىلى – ەلىمىزدەگى ۇلتارالىق تاتۋلىق پەن بەيبىتشىلىك مودەلىنىڭ سالتانات قۇرعان جىلى. تاۋەلسىزدىك العالى بەرى ءبىزدىڭ قول جەتكىزگەن ەڭ ۇلكەن قۇندىلىعىمىز ءدال وسى بىرلىك پەن تاتۋلىق بولىپ قالا بەرمەك», دەپ تەبىرەنە سويلەدى. ودان كەيىن ءسوز العان اتباسار اۋدانى ءماسليحاتىنىڭ حاتشىسى ب.بورانباەۆ, دەلەگاتسيا جەتەكشىسى, «مەنىڭ قازاقستانىم» پويىزىنىڭ باسشىسى ع.تەلەباەۆ جينالعان كوپشىلىككە كوڭىلدەگى سوزدەرىن ايتتى. «مەنىڭ قازاقستانىم» پويىزىنىڭ اتباسارداعى جۇمىسى دا ۇلكەن جەتىستىكتەرمەن اياقتالدى. بۇل جەردە قوعامدىق كەلىسىم كەڭەسىنىڭ قابىلداۋى جۇمىس ىستەدى. الەۋمەتتىك ماسەلەگە, زاڭ سالاسىنا, كاسىپكەرلىك جانە اۋىل شارۋاشىلىعى سالاسىنا قاتىستى 200 اتباسارلىق كەڭەس الىپ ۇلگىردى. سونداي-اق, 240 ادامعا مەديتسينالىق تەكسەرۋ جۇرگىزىلدى. «ەلىمىزدەگى عىلىمنىڭ دامۋى مەن بولاشاعىنىڭ جاعدايى تۋرالى» سەمينارعا 86 ادام قاتىسسا, جاستاردىڭ پاتريوتتىق اكتسياسىنا 500 ادام قاتىستى. «مەنىڭ قازاقستانىم» پويىزىنىڭ قاتىسۋشىلارى باسقا دا شارالار وتكىزدى. اتباسار جۇرتى كەشكە ونەرپازداردىڭ ونەرىنە ءتانتى بولدى. «مەنىڭ قازاقستانىم» پويىزىنىڭ ەندىگى باعىتى – كيەلى ارقالىق ءوڭىرى. شارافاددين ءامىروۆ, ءومىر ەسقالي, «ەگەمەن قازاقستان». سۋرەتتى تۇسىرگەن تالعات تانىباەۆ.