ەلىمىزدە ءبىلىم جۇيەسىنە جاساندى ينتەللەكت قۇرالدارىن ەنگىزۋ جونىندەگى ۇلتتىق جوبا باستالدى. باستاما OpenAI كومپانياسىمەن بىرلەسىپ ۇيىمداستىرىلىپ وتىر. ونىڭ اياسىندا 165 مىڭ پەداگوگ ءبىلىم بەرۋ ماقساتتارىنا ارنايى ازىرلەنگەن ChatGPT-ءدىڭ نۇسقاسى, ياعني ChatGPT Edu جۇيەسىنە قول جەتكىزە الادى. جوبانىڭ دەمەۋشىسى − Freedom Holding Corp., ال تەحنولوگيالىق ينتەگراتسيا بويىنشا سەرىكتەسى – Bilim Group IT حولدينگى, دەپ حابارلايدى Egemen.kz.
Bilim Group ءباسپاسوز قىزمەتىنىڭ حابارلاۋىنشا, Freedom Holding Corp. OpenAI كومپانياسىمەن جاسالعان كەلىسىمشارت اياسىندا ەلىمىزدەگى پەداگوگتەرگە ChatGPT Edu-ءدىڭ ءبىر جىلعا ارنالعان 165 مىڭ ليتسەنزياسىن ساتىپ العان. وسى ارقىلى جوبا ءبىلىم سالاسىنا جاساندى ينتەللەكتىنى ەنگىزۋ بويىنشا مەملەكەتتىك دەڭگەيدە قولداۋ تاپقان الەمدەگى ەڭ ءىرى باستامالاردىڭ بىرىنە اينالىپ وتىر.
«جي نەگىزىندەگى وزىق تەحنولوگيالاردىڭ كومەگىمەن ءار ادامنىڭ الەۋەتىن ارتتىرۋدا ءبىلىم سالاسىنىڭ اتقاراتىن ءرولى وراسان. قازاقستان مەن OpenAI اراسىنداعى سەرىكتەستىك پەداگوگتەرگە پايدالى قۇرالدار ۇسىنىپ, پراكتيكالىق قولداۋ مەن وقۋعا دەگەن قولجەتىمدىلىكتى ارتتىرۋ ارقىلى جي ماشىقتارىن مەڭگەرۋدەگى الشاقتىقتى قالاي ەڭسەرە الاتىنىن كورسەتتى. مۇنداي قادام بۇكىل ءبىلىم بەرۋ جۇيەسىنىڭ بولاشاعىنا ۇزاقمەرزىمدى ىقپال ەتۋگە كومەكتەسەدى», دەيدى OpenAI وكىلى كەۆين ميللس.
ChatGPT Edu ليتسەنزيالارى ءبىلىم جۇيەسىنىڭ بارلىق دەڭگەيىندە, اتاپ ايتقاندا, مەكتەپكە دەيىنگى ۇيىمدار, مەكتەپتەر, كوللەدجدەر مەن جوعارى وقۋ ورىندارىنىڭ, سونداي-اق عىلىمي-زەرتتەۋ ينستيتۋتتارى مەن Astana Hub اراسىندا تاراتىلادى. جوبا جاساندى ينتەللەكت جانە تسيفرلىق دامۋ مينيسترلىگى, وقۋ-اعارتۋ مينيسترلىگى جانە عىلىم جانە جوعارى ءبىلىم مينيسترلىكتەرىنىڭ قاتىسۋىمەن جۇزەگە اسىپ وتىر. جوباعا قاتىسۋشىلار ءۇشىن ليتسەنزيالار تەگىن ۇسىنىلادى, ال ولاردى ىسكە قوسۋ وتاندىق BilimClass پلاتفورماسى نەگىزىندە ازىرلەنگەن ai.bilimclass.kz ارنايى سەرۆيسى ارقىلى جۇرگىزىلەدى.
قازاقشا سويلەيتىن جي: ISSAI زەرتحاناسىنداعى ءبىر كۇن
«ChatGPT Edu – تەك تەحنولوگيالىق قۇرال ەمەس, قازاقستاننىڭ ادامي كاپيتالىنا سالىنعان ينۆەستيتسيا. جوبانىڭ نەگىزگى ماقساتى − پەداگوگتەرگە جي مۇمكىندىكتەرىن مەڭگەرۋگە جانە ونى كۇندەلىكتى جۇمىستا ءتيىمدى پايدالانۋعا جاعداي جاساۋ. تەحنولوگيا پەداگوگتەردىڭ جۇكتەمەسىن ازايتىپ, ءبىلىم ساپاسىن ارتتىرۋعا جانە كاسىبي دەڭگەيىن شىڭداۋعا سەپتىگىن تيگىزەدى. ءبىز ۇستازدارعا ەڭ ماڭىزدى ىسكە − ءبىلىم الۋشىلارمەن جۇمىسقا كوبىرەك ۋاقىت بولۋگە مۇمكىندىك بەرەتىن ءتيىمدى قۇرال ۇسىنىپ وتىرمىز», دەپ اتاپ ءوتتى Bilim Group IT-حولدينگىنىڭ باس ديرەكتورى الەكساندر ساۆچەنكو.
ChatGPT Edu – ءبىلىم مەكەمەلەرى ءۇشىن ارنايى ازىرلەنگەن ChatGPT نۇسقاسى. بۇل جۇيە وقۋ ورىندارىنا جاساندى ينتەللەكتىنىڭ وزىق مۇمكىندىكتەرىن پايدالانۋعا جول اشادى. سونىمەن قاتار دەرەكتەردىڭ قاۋىپسىزدىگى مەن قۇپيالىعىن ساقتاپ, جۇمىستى ءتيىمدى باسقارۋعا مۇمكىندىك بەرەدى.
ChatGPT Edu كومەگىمەن پەداگوگتەر ساباق جوسپارىن ازىرلەپ, تاپسىرمالار مەن تەست سۇراقتارىن دايىنداۋعا, سونىمەن قاتار وقۋ ماتەريالدارىن ءار ءبىلىم الۋشىنىڭ دەڭگەيى مەن قاجەتتىلىگىنە قاراي بەيىمدەۋگە مۇمكىندىك الادى. جوبا ناتيجەسىندە پەداگوگتەردىڭ ساباققا دايىندالۋعا, تاپسىرمالاردى تەكسەرۋگە, ەسەپ بەرۋگە جانە باسقا دا ءبىرىزدى جۇمىسقا كەتەتىن ۋاقىتى ەداۋىر قىسقارماق.
Smart Grid مەن جي-ينجەنەرلەرى: ەلىمىزدە جاڭا ماماندىقتار پايدا بولادى