ەلگە قورعان بولار ساربازداردى وتان قورعاۋعا باۋلىپ جۇرگەن وفيتسەردىڭ ءبىرى – كاپيتان ايدار نەگاەۆ. قازىر اتىراۋداعى بارلاۋشىلار باتالونىندا روتا كومانديرىنىڭ ورىنباسارى بولىپ قىزمەت اتقارادى.
ايدار حايدار ۇلى – باتىس قازاقستان وبلىسىنىڭ جاڭاقالا اۋدانىنداعى مۇقىر اۋىلىنىڭ تۋماسى. كوپبالالى وتباسىندا دۇنيەگە كەلگەن. اكەسى تراكتورشى-ماشينيست, اناسى بالا تاربيەسىنە ءمان بەرىپ, ءۇي شارۋاسىندا بولعان.
«بالا كەزىمنەن اسكەري سالاعا قىزىعاتىن ەدىم. باستاپقىدا اسكەري ادامنىڭ فورماسى قىزىقتىراتىن ەدى. كەيىن وتاندى قورعاۋ ءۇشىن قارۋلى كۇشتەر قاتارىندا قىزمەت اتقارۋدى ماقسات ەتتىم», دەيدى ا.نەگاەۆ.
ونىڭ نەگىزگى ماماندىعى – پەداگوگ-پسيحولوگ. باتىس قازاقستان گۋمانيتارلىق ۋنيۆەرسيتەتىندە جوعارى ءبىلىم العان. الايدا بالا كەزدەگى ارمانى اسكەري سالاعا الىپ كەلدى.
«روتا كومانديرىنىڭ ورىنباسارى رەتىندە ماعان جۇكتەلگەن مىندەت بار. بۇل – جەكە قۇرامدى قارۋمەن, وق-دارىمەن قامتاماسىز ەتۋ, ساقتالۋىن قاداعالاۋ. بىراق مۇنىمەن شەكتەلۋگە بولمايدى. قارۋلى كۇشتەر قاتارىنداعى بارشا وفيتسەردىڭ مىندەتى – ەلدىڭ قورعانىس سالاسىن جەتىلدىرۋ, اسكەرگە شاقىرىلعان جاستاردىڭ ەل قورعانى بولاتىنداي مىقتى سارباز رەتىندە قالىپتاسۋىنا اتسالىسۋ», دەيدى ول.
قازاق وفيتسەرى بىلتىرعى ساۋىردە گولان جوتالارىنان ورالدى. ول 2024 جىلعى كوكتەمدە بۇۇ-نىڭ بىتىمگەرشىلىك ميسسياسى (UNDOF) اياسىندا قازاقستاننان اتتانعان دەربەس بىتىمگەرلىك كونتينگەنتىنىڭ قۇرامىندا ءبىر جىل ءبىر اي بولدى. ەل بىتىمگەرلەرى سيريا اراب رەسپۋبليكاسىنىڭ اۋماعىنداعى گولان جوتالارىندا بۇۇ-نىڭ اجىراتۋ ايماعىن باقىلاۋ ميسسياسىنا, اسكەري قاقتىعىستى توقتاتۋ رەجىمىن قامتاماسىز ەتۋگە قاتىستى. ناقتىسىندا باقىلاۋ بەكەتتەرىن كۇزەتتى. سول كەزدە ايدار نەگاەۆ زىمىران-ارتيللەريالىق قارۋ-جاراق وفيتسەرى مىندەتىن اتقاردى.
«بۇل ميسسيا قازاقستان بىتىمگەرلەرىنىڭ العاشقى دەربەس وپەراتسياسى ەدى. قاقتىعىس ايماعىندا بىتىمگەرلىك ميسسياسىن اتقارۋ وڭاي ەمەس. ءبىز تاۋەلسىز ءارى بەيبىت ەلدە ءومىر ءسۇرىپ جاتقانىمىزعا قۋاندىق. تاۋەلسىزدىكتىڭ قادىرىن تەرەڭ سەزىندىك», دەيدى وفيتسەر.
اتىراۋ وبلىسى