الەمگە قازاق ونەرىن تانىتىپ جۇرگەن ءانشى, قازاقستاننىڭ حالىق ءارتىسى ديماش قۇدايبەرگەن تۋعان جەرى اقتوبەگە ساپارى بارىسىندا ءوزى ءبىلىم العان №32 مەكتەپ-گيمنازياعا بارىپ, ۇستازدارىمەن جانە وقۋشىلارمەن كەزدەستى.
ديماش ءوزى وقىعان مەكتەپتى ارالاپ, سىنىپتارعا كىرىپ, بالالىق شاعى وتكەن ورتامەن قايتا قاۋىشتى. مەكتەپ ساحناسىنا كوتەرىلىپ, وسى جەردە ونەر جولىنداعى العاشقى قادامى باستالعانىن ەسىنە الدى. وقۋشىلار قۇرمەتتى قوناققا كونتسەرتتىك باعدارلاما دايىنداپ, ديماشتىڭ اندەرىن ورىندادى. كەشتىڭ ەرەكشە ساتتەرىنىڭ ءبىرى – مەكتەپ وركەسترىمەن بىرگە ورىندالعان «اداي» كۇيى.
ء«بىلىم العان مەكتەبىم – №32 گيمنازيا. مۇندا كەلىپ وقىعان سىنىبىمدى, وتىرعان پارتامدى كوردىم. ماعان ساباق بەرگەن ۇستازدارىما دەگەن ساعىنىشىمدى وسىلايشا بىلدىرگىم كەلدى. بۇل گيمنازيا – ماعان ىستىق ۇيا. مەكتەپتە وتكىزگەن ءاربىر ءساتىم, العان ءبىلىمىم مەن تاربيەم ءاردايىم جۇرەگىمنىڭ تورىندە ساقتالادى», دەدى ءانشى. ول وقۋشىلارعا ءبىلىم مەن ۇلتتىق رۋحتى قاتار ءسىڭىرۋ كەرەگىن جەتكىزدى.
سىنىپ جەتەكشىسى روزا قۋانىشقىزى بالا ديماشتىڭ مىنەزىن بىلاي سيپاتتادى: «ديماش شاكىرتىم مەكتەپتە وقىپ جۇرگەندە-اق وزگەلەردەن وقشاۋ تۇراتىن. ونىڭ بويىنداعى ەڭ اسىل قاسيەت – كىشىپەيىلدىك پەن مەيىرىم».
سونداي-اق مۇعالىمدەرگە كومەكتەسىپ, اۋىر زاتتارىن كوتەرىپ جۇرەتىنىن, بىراق ونى ەشقاشان ماقتانىپ ايتپايتىنىن دا اتاپ ءوتتى.
ال باستاۋىش سىنىپتاعى جەتەكشىسى كلارا جانۇزاققىزى بۇل كەزدەسۋدە ەرەكشە تولقىعانىن جاسىرمادى. ونىڭ ايتۋىنشا, ديماش 1-سىنىپتان باستاپ بەلسەندىلىگىمەن كوزگە تۇسكەن. «ساباقتا دا, مەكتەپتەن تىس ءىس-شارالاردا دا بەلسەندى بولدى. «الىپپەمەن» قوشتاسۋ كەشىندە ابايدىڭ «جەلسىز تۇندە جارىق اي» ءانىن فورتەپيانودا ورىندادى. باستاۋىشپەن قوشتاسۋ كەشىندە «اق كوگەرشىن» ءانىن جاندى داۋىستا ايتتى. مەكتەپتەگى كوپتەگەن شارانى جۇرگىزدى. ءسوز سويلەۋ مادەنيەتى وتە جوعارى ەدى. كەزدەسۋدە ديماش مەنى قۇشاقتاعاندا توبەم كوككە جەتكەندەي قۋاندىم. ديماش بارلىق ۇستازىمەن جىلى امانداستى. وقۋشىلارعا دا ەرەكشە ىقىلاس تانىتتى. بالالاردىڭ قۋانىشىندا شەك بولعان جوق», دەپ ەسكە الدى ۇستازى.
ديانا ءادىلحان,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى