ىشكى ىستەر مينيسترلىگى ۇلتتىق قاۋىپسىزدىك كوميتەتىمەن جانە قاداعالاۋ ورگانىمەن, سونداي-اق چەحيانىڭ پوليتسياسىمەن بىرلەسىپ جۇرگىزگەن اۋقىمدى ارنايى وپەراتسيانىڭ ناتيجەسىندە قازاقستان مەن تمد ەلدەرىنىڭ ازاماتتارىنىڭ جەكە دەرەكتەرىن زاڭسىز تاراتۋمەن اينالىسقان حالىقارالىق ارنانى جويدى, دەپ حابارلايدى Egemen.kz.
Polisia.kz مالىمەتىنشە, جەدەل-ىزدەستىرۋ جۇمىستارى, مۇقيات جوسپارلاۋ جانە قۇقىق قورعاۋ ورگاندارىنىڭ ۇيلەستىرىلگەن ءىس-قيمىلدارىنىڭ ناتيجەسىندە حالىقارالىق دەڭگەيدە ارەكەت ەتكەن قىلمىستىق توپتىڭ قىزمەتى اشكەرەلەنىپ, جولى كەسىلدى.
ءىىم كيبەرقىلمىسقا قارسى ءىس-قيمىل دەپارتامەنتىنىڭ باستىعى جاندوس ءسۇيىنبايدىڭ ايتۋىنشا, قىلمىستىق ءىس بويىنشا كۇدىكتىلەردىڭ تۇرعىلىقتى جەرى بويىنشا, ياعني چەحيا رەسپۋبليكاسىنىڭ ۋستي-ناد-لابەم قالاسىندا, سونداي-اق استانا, الماتى جانە قاراعاندى قالالارىندا ءتىنتۋ جۇمىستارى جۇرگىزىلدى.
«تەرگەۋ ارەكەتتەرى بارىسىندا زاڭسىز قىزمەتتىڭ دالەلدەرىن قامتيتىن كوپتەگەن تسيفرلىق اقپارات تاسىمالداعىشتار, سونداي-اق قولما-قول اقشا تاركىلەندى», دەدى جاندوس ءسۇيىنباي.
جەكە دەرەكتەرىڭىز تارالىپ كەتتى مە؟ ەندى ونى ارنايى ءتىزىلىم ارقىلى تەكسەرۋگە بولادى
ءىىم مالىمەتىنشە, قىلمىستىق ارەكەتتەردى جۇزەگە اسىرۋ ءۇشىن كۇدىكتىلەر قازاقستان جانە كورشىلەس مەملەكەتتەردىڭ ازاماتتارىنا قاتىستى جەكە دەرەكتەر ورنالاستىرىلعان جابىق ينتەرنەت-رەسۋرس قۇرعان. توپ ىشىندە ناقتى يەرارحيالىق قۇرىلىم بولعان: ءاربىر قاتىسۋشى وزىنە جۇكتەلگەن مىندەتتى اتقارعان. ولار قىلمىستىق سحەمانى ۇيلەستىرۋشىلەردەن باستاپ, جەكە دەرەكتەردى زاڭسىز انىقتاۋعا قاتىستى تاپسىرىستاردى قابىلداپ, وڭدەيتىن وپەراتورلارعا دەيىنگى قىزمەتتەردى ورىنداعان. زاڭسىز جولمەن الىنعان قاراجاتتى قولما-قول اقشاعا اينالدىرۋ ءۇشىن دروپ-اككاۋنتتار پايدالانىلعان.
ء«ارتۇرلى زاڭسىز قىزمەت تۇرلەرىنە, ونىڭ ىشىندە ءبىر رەتتىك سۇرانىستار مەن رەسۋرسقا ابونەنتتىك قولجەتىمدىلىككە ارنالعان ارنايى باعا ءتىزىمى بەلگىلەنگەن. قىلمىستىق سحەمانى ۇيىمداستىردى دەگەن كۇدىككە ىلىنگەن ادامدار ۇستالىپ, ۋاقىتشا ۇستاۋ يزولياتورىنا قامالدى. تەرگەۋ جالعاسىپ جاتىر.
ىشكى ىستەر مينيسترلىگى كيبەرقىلمىسقا قارسى ءىس-قيمىلدى, جەكە دەرەكتەردى زاڭسىز تاراتۋدىڭ ارنالارى مەن كوزدەرىن انىقتاپ, جويۋدى, سونداي-اق ازاماتتاردىڭ قۇقىقتارى مەن قاۋىپسىزدىگىن قورعاۋ باعىتىنداعى كەشەندى شارالاردى ودان ءارى جالعاستىرادى» دەدى جاندوس ءسۇيىنباي.
جاڭا زاڭ: جەكە دەرەكتەردى زاڭسىز پايدالانعان نوتاريۋستار ليتسەنزياسىنان ايىرىلادى