استانادا وتكەن قۇرىلتاي سەزىندە «ادىلەت» پارتياسىنىڭ رەسمي جۇمىسى باستالىپ, ۇيىم مەملەكەت باسشىسىنىڭ رەفورمالارىن قولدايتىنىن مالىمدەدى, دەپ حابارلايدى Egemen.kz.
استانادا «ادىلەت» ساياسي پارتياسىنىڭ قۇرىلتاي سەزى ءوتتى. جيىنعا ەلىمىزدىڭ بارلىق وڭىرىنەن مىڭعا جۋىق دەلەگات پەن پارتيا جاقتاستارى جينالدى. قۇرىلتاي بارىسىندا جاڭا ساياسي بىرلەستىكتى قۇرۋ, ونىڭ رەسمي اتاۋىن بەكىتۋ, جارعىسى مەن باعدارلاماسىن قابىلداۋ, سونداي-اق باسشىلىق جانە باقىلاۋ ورگاندارىن سايلاۋ ماسەلەلەرى قارالدى.
جاڭا پارتيا قۇرۋ تۋرالى شەشىم قابىلداندى
سەز بارىسىندا دەلەگاتتار «ادىلەت» پارتياسىن قۇرۋ تۋرالى شەشىمدى قولدادى. ءتيىستى شەشىمگە سەزگە قاتىسقان 931 دەلەگات داۋىس بەردى. سونىمەن قاتار پارتيانىڭ قازاق, ورىس جانە اعىلشىن تىلدەرىندەگى رەسمي اتاۋى بەكىتىلدى. بارلىق راسىمدەر «ساياسي پارتيالار تۋرالى» قازاقستان رەسپۋبليكاسىنىڭ زاڭى تالاپتارىنا سايكەس ءوتتى.
قۇرىلتايدا پارتيانىڭ نەگىزگى قۇجاتتارى – جارعىسى مەن باعدارلاماسى قابىلداندى. جيىننىڭ رەسمي بولىگى باستالماس بۇرىن قوناقتارعا ارناپ شاعىن كونتسەرتتىك باعدارلاما ۇيىمداستىرىلىپ, كەيىن دەلەگاتتار جاڭا ساياسي ۇيىمنىڭ الداعى باعىتتارىن تالقىلادى.
پارتيا باسشىسى بولىپ ايبەك دادەباي سايلاندى
سەز دەلەگاتتارىنىڭ شەشىمىمەن پارتيا توراعاسى قىزمەتىنە دادەباي ايبەك ارقاباي ۇلى سايلاندى. بۇعان دەيىن قۇرىلتاي بارىسىندا جاڭا ساياسي بىرلەستىكتىڭ ساياسي كەڭەسىنىڭ قۇرامى تانىستىرىلعان بولاتىن. تىزىمگە 30 ادام ەندى.
سەز بارىسىندا قاتىسۋشىلار ايبەك دادەبايدى پارتيا توراعالىعىنا ۇسىنۋ تۋرالى ۇسىنىستى قولدادى. ءوز كەزەگىندە دادەباي دەلەگاتتارعا سەنىم بىلدىرگەنى ءۇشىن العىس ايتىپ, بۇل شەشىمدى ۇلكەن جاۋاپكەرشىلىك دەپ قابىلدايتىنىن جەتكىزدى.
ء«بىزدىڭ نيەتتەستەرىمىز – ءدال وسىنداي ازاماتتار. ولار – بەلسەندى, جاۋاپكەرشىلىگى جوعارى, ەل دامۋىنا ۇلەس قوساتىن جاندار. ءبىز بىرگە ەڭبەك ەتەمىز, جۇمىستى اشىق, ادال ءارى قوعام الدىندا ەسەپ بەرە وتىرىپ جۇرگىزەمىز. جۇيەلى, جاۋاپتى جانە دايەكتى جۇمىس جۇرگىزۋگە ۋادە بەرەمىز», دەپ اتاپ ءوتتى ايبەك دادەباي.
جارعى – پارتيانىڭ جۇمىس ءتارتىبىن ايقىندايتىن نەگىزگى قۇجات
قۇرىلتايدا پارتيا جارعىسىنىڭ نەگىزگى قاعيداتتارى دا تانىستىرىلدى. ساياساتتانۋشى ءبورىحان نۇرمۇحامەدوۆتىڭ ايتۋىنشا, بۇل قۇجات جاي عانا ىشكى ەرەجە ەمەس, پارتيانىڭ بولاشاقتاعى جۇمىس باعىتىن ايقىندايتىن ماڭىزدى نەگىز.
«بۇل – ۇلكەن جاۋاپكەرشىلىك ءساتى. ءبىزدىڭ پارتيانىڭ ەرتەڭ قانداي بولاتىنى ءدال وسى كەزەڭگە بايلانىستى. ۇسىنىلعان قۇجات – اۋقىمدى, تەرەڭ ءارى مۇقيات جۇرگىزىلگەن جۇمىستىڭ ناتيجەسى. ول قازاقستان رەسپۋبليكاسىنىڭ كونستيتۋتسياسى مەن قولدانىستاعى زاڭناماسىنا تولىق سايكەس كەلەدى. بىراق ونىڭ ماڭىزى بۇدان دا كەڭ. بۇل – پارتيانىڭ ساياسي جۇيەنىڭ تولىققاندى قاتىسۋشىسىنا اينالۋىنا, ازاماتتاردىڭ مۇددەسىن قورعاۋىنا جانە مەملەكەتتىك ساياساتتىڭ قالىپتاسۋىنا ىقپال ەتۋىنە مۇمكىندىك بەرەتىن جۇمىس قۇرالى», دەدى ول.
ونىڭ سوزىنشە, جارعىنىڭ نەگىزىندە اشىقتىق, جاۋاپكەرشىلىك جانە ازاماتتاردىڭ قاتىسۋى قاعيداتتارى جاتىر. پارتيا سەزى ۇيىمنىڭ ەڭ جوعارى ورگانى رەتىندە بەلگىلەنىپ, ساياسي كەڭەس پەن بيۋرو ۇزدىكسىز جۇمىستى قامتاماسىز ەتەتىن قۇرىلىمدار رەتىندە قاراستىرىلدى.
ادامي كاپيتال مەن ادىلەت قاعيداتى: باعدارلامادا نە ايتىلدى؟
قۇرىلتاي سەزىندە «ادىلەت» پارتياسىنىڭ رەسمي باعدارلاماسى دا بەكىتىلدى. قۇجاتتا ادامي كاپيتالدى دامىتۋ, زاڭ ۇستەمدىگىن كۇشەيتۋ, وڭىرلەردىڭ تەڭگەرىمدى دامۋى جانە ادىلەتتى قوعام قۇرۋ ماسەلەلەرى نەگىزگى باسىمدىق رەتىندە ايقىندالعان.
پارتيا ۇستانىمىندا ادىلدىك, وتانشىلدىق, جاۋاپكەرشىلىك, ەڭبەكقورلىق پەن دامۋ باستى قۇندىلىق رەتىندە كورسەتىلگەن. باعدارلامادا دەنساۋلىق ساقتاۋ, ءبىلىم بەرۋ, عىلىم, مادەنيەت جانە كرەاتيۆتى يندۋستريالاردى دامىتۋ ارقىلى قوعام ساپاسىن ارتتىرۋعا ەرەكشە ءمان بەرىلگەن.
ساياساتتانۋشى مارات شيبۇتوۆ قۇرىلتاي بارىسىندا پارتيانىڭ باعدارلامالىق ۇستانىمدارىنا توقتالىپ, ۇيىم ءوز جۇمىسىن ادىلدىك, جاۋاپكەرشىلىك, ناقتى ارەكەت پەن ينستيتۋتسيونالدىق قاعيداتتارعا نەگىزدەيتىنىن ايتتى. ونىڭ سوزىنشە, «ادىلەت» پارتياسى ادىلدىك يدەولوگياسىنا جانە جاڭا كونستيتۋتسيا قۇندىلىقتارىنا سۇيەنەدى.
«ەڭ الدىمەن, باعدارلامامىزدىڭ ەرەكشەلىگىنە توقتالعان ءجون. «ادىلەت» پارتياسى ءوزىنىڭ ادىلدىك يدەولوگياسىنا جانە جاڭا كونستيتۋتسيا قۇندىلىقتارىنا سۇيەنەتىنىن ايرىقشا اتاپ وتەدى. وسى ارقىلى ناقتى مىندەتتەمەلەردى ءوز موينىنا الادى. بۇل دەگەنىمىز – باعدارلاما بولاشاقتىڭ نەگىزىنە اينالۋى ءتيىس قاعيداتتارعا قۇرىلىپ وتىر دەگەن ءسوز. پارتيانىڭ نەگىزگى تىرەكتەرى رەتىندە ادىلدىك, وتانشىلدىق, ەڭبەكقورلىق, جاۋاپكەرشىلىك پەن پروگرەسس ايقىندالعان», دەپ اتاپ ءوتتى ساياساتتانۋشى.
پارتيانىڭ ساياسي باعىتى
پارتيا توراعاسى ايبەك دادەباي سەزدە مالىمدەمە جاساپ, جاڭا ساياسي بىرلەستىكتىڭ يدەولوگيالىق نەگىزدەرى مەن باستى باعىتتارىن تانىستىردى. ونىڭ ايتۋىنشا, پارتيا قىزمەتى زاڭدىلىق, ءتارتىپ جانە قوعامدىق جاۋاپكەرشىلىك قاعيداتتارىنا سۇيەنەدى.
ء«بىزدىڭ پارتيامىزدىڭ نەگىزى زاڭ ۇستەمدىگى مەن ءتارتىپ قاعيداتتارىنا قۇرىلادى. حالىقتىڭ زاڭ ۇستەمدىگىنە دەگەن سەنىمى – مەملەكەتتىڭ باستى رەسۋرسى ءارى تىرەگى. سوندىقتان ءبىزدىڭ نەگىزگى مىندەتىمىز – ادىلدىكتى جاريالاۋ عانا ەمەس, ونى ورتاق مادەنيەتىمىزدىڭ اجىراماس بولىگىنە ءارى كۇندەلىكتى ءومىرىمىزدىڭ شارتىنا اينالدىرۋ. باسقاشا ايتقاندا, ادىلدىك ۇلتتىق سانا مەن بولمىستىڭ ايرىقشا سيپاتىنا اينالۋعا ءتيىس. مەملەكەت باسشىسى قاسىم-جومارت توقاەۆ ءوز نازارىن ۇنەمى ءدال وسى باعىتقا اۋدارىپ كەلەدى», دەدى ايبەك دادەباي.
ول پارتيانىڭ نەگىزگى مىندەتتەرىنىڭ ءبىرى مەملەكەت پەن ازاماتتار اراسىنداعى سەنىمدى نىعايتۋ, ديالوگ پەن جاۋاپكەرشىلىككە نەگىزدەلگەن ساياسي مادەنيەت قالىپتاستىرۋ ەكەنىن اتاپ ءوتتى.
«ادىلەت» پرەزيدەنتتىڭ رەفورمالارىن قولدايدى
جاڭا ساياسي ۇيىم مەملەكەت باسشىسىنىڭ رەفورمالارىن قولدايتىنىن دا جاريا ەتتى. پارتيا ءوز جۇمىسىن زاڭ ۇستەمدىگى مەن قوعامدىق تارتىپكە, ءتيىمدى مەملەكەتتىك ينستيتۋتتاردى قالىپتاستىرۋعا, وڭىرلەردىڭ الەۋەتىن كۇشەيتۋگە جانە «حالىق ۇنىنە قۇلاق اساتىن مەملەكەت» قاعيداتىن ءىس جۇزىندە جۇزەگە اسىرۋعا نەگىزدەمەك.
سونىمەن قاتار ۇيىم ادىلەتتى ءارى باسەكەگە قابىلەتتى ەكونوميكانى دامىتۋعا, الەۋمەتتىك ىنتىماق پەن ناقتى قولداۋدى كۇشەيتۋگە, ادامي كاپيتالدى ارتتىرۋعا, تسيفرلىق مەملەكەتتى جەتىلدىرۋگە, «تازا قازاقستان» باستاماسىن قولداۋعا, جاۋاپتى ورتا دەرجاۆا قاعيداتىن ۇستانۋعا جانە جاڭا گەوساياسي ەتيكانى قالىپتاستىرۋعا باسىمدىق بەرەدى.
پارتيا يدەولوگياسىنىڭ وزەگىندە قازاقستاننىڭ بولاشاعى ءار ازاماتتىڭ بۇگىنگى ارەكەتىنە بايلانىستى دەگەن ۇستانىم جاتىر. بۇل – ادال ەڭبەك ەتۋ, زاڭدى قۇرمەتتەۋ جانە قوعام ومىرىنە بەيجاي قاراماي, ەل ىسىنە بەلسەندى ارالاسۋ دەگەندى بىلدىرەدى.
«قارسىلاستىق ەمەس, ءوز قۇندىلىقتارىمىز ماڭىزدى»
«استانا» حالىقارالىق قارجى ورتالىعىنىڭ باسقارۋشىسى, پارتيانىڭ جەتەكشى توبىنىڭ مۇشەسى رەنات بەكتۇروۆ جاڭا ساياسي ۇيىمنىڭ قۇندىلىقتارى مەن جۇمىس تاسىلدەرىنە توقتالدى. ونىڭ ايتۋىنشا, «ادىلەت» پارتياسى ءوزىن ساياسي تەكەتىرەستىڭ قۇرالى رەتىندە قاراستىرمايدى جانە باستى نازاردى ءوز باعدارلامالىق ماقساتتارى مەن يدەولوگياسىنا اۋدارماق.
ونىڭ سوزىنشە, پارتيانىڭ ەرەكشەلىگى ونىڭ باستاماشىلارى مەن قولداۋشىلارىنىڭ بۋىنىمەن دە بايلانىستى. بەكتۇروۆ پارتيا مۇشەلەرىنىڭ كوپشىلىگىنىڭ دۇنيەتانىمى تاۋەلسىز قازاقستان كەزەڭىندە قالىپتاسقانىن اتاپ ءوتتى.
راۋان كەنجەحان ۇلى: «پارتيا قوعامداعى وزگەرىسكە دەگەن سۇرانىسقا جاۋاپ بەرەدى»
قۇرىلتاي سەزىندە ءسوز سويلەگەن «قازاق ءتىلى» حالىقارالىق قوعامىنىڭ پرەزيدەنتى, باستاماشىل توپتىڭ مۇشەسى راۋان كەنجەحان ۇلى «ادىلەت» پارتياسى ادىلەت قاعيداتىن باستى قۇندىلىق رەتىندە ۇستاناتىنىن ايتتى. ونىڭ سوزىنشە, پارتيا قوعامداعى وزگەرىسكە دەگەن سۇرانىسقا جاۋاپ بەرىپ, ءار ازامات ءوز ومىرىندە ادىلەتتىلىكتى سەزىنەتىن ورتا قالىپتاستىرۋدى ماقسات ەتەدى.
ول پارتيا ءوز قىزمەتىن وزگە ساياسي كۇشتەرمەن قارسىلاستىققا قۇرمايتىنىن ايتىپ, باستى نازار قوعامدىق ديالوگ پەن مەملەكەت پەن ازاماتتار اراسىنداعى سەنىمدى كۇشەيتۋگە اۋدارىلاتىنىن جەتكىزدى.
«ادىلەتتىڭ» نەگىزگى تىرەگى جاستار بولماق
پارتيا باستاماشىلارىنىڭ ءبىرى تالانت وماربەكوۆ «ادىلەت» پارتياسىن قۇرۋعا 700 ادام باستاماشى بولعانىن ايتتى. ونىڭ سوزىنشە, ۇيىم قۇرىلعاننان كەيىن پارتيانىڭ باعدارلاماسى مەن جارعىسى ازىرلەنىپ, مۇشەلىككە ونلاين تىركەلۋگە مۇمكىندىك بەرەتىن ارنايى تسيفرلىق پلاتفورما ىسكە قوسىلعان.
سونداي-اق قىسقا ۋاقىت ىشىندە پارتياعا 9 مىڭنان استام ادامنىڭ تىركەلگەنى ايتىلدى. باستاماشىل توپ وكىلىنىڭ پىكىرىنشە, پارتياعا قىزىعۋشىلىق تانىتىپ وتىرعانداردىڭ باسىم بولىگى – جاستار.
«جاستارعا الەۋمەتتىك ليفت پەن جاڭا وزگەرىستەر قاجەت. قازىر ساياساتقا ارالاساتىن ۋاقىت كەلگەنىن جاستاردىڭ ءوزى دە ءتۇسىنىپ وتىر», دەدى ول.