2026 جىلدىڭ قاڭتار-ناۋرىز ايلارىنىڭ قورىتىندىسى بويىنشا قازاقستان مەن رەسەي اراسىنداعى تاۋار اينالىمى 6,46 ملرد اقش دوللارىن قۇراپ, وتكەن جىلدىڭ وسى كەزەڭىمەن سالىستىرعاندا 16,1% ارتتى, دەپ حابارلايدى Egemen.kz
2025 جىلدىڭ العاشقى توقسانىندا بۇل كورسەتكىش 5,56 ملرد اقش دوللارىن قۇراعان بولاتىن. رەسەي قازاقستاننىڭ نەگىزگى ساۋدا سەرىكتەستەرىنىڭ ءبىرى رەتىندەگى ورنىن ساقتاپ, ءوزارا ساۋدا كولەمى بويىنشا ەكىنشى ورىندا تۇر. سونىمەن قاتار, رەسەي يمپورت پەن ونەركاسىپتىك كووپەراتسيا باعىتىنداعى ماڭىزدى نارىقتىڭ ءبىرى.
قازاقستاننان رەسەيگە ەكسپورت نەگىزىنەن مەتاللۋرگيا جانە شيكىزات ونىمدەرى ەسەبىنەن قالىپتاستى. نەگىزگى ەكسپورتتىق تاۋارلار قاتارىندا ىستىقتاي يلەكتەلگەن لەگيرلەنبەگەن جالپاق پروكات (131,8 ملن اقش دوللارى), تەمىر كەنى مەن كونتسەنتراتتارى (77,8 ملن دوللار), قاپتالعان جالپاق پروكات (77 ملن دوللار), سۋىقتاي يلەكتەلگەن جالپاق پروكات (73,3 ملن دوللار), اليۋميني وكسيدتەرى مەن گيدروكسيدتەرى (60,5 ملن دوللار), تاس كومىر (40 ملن دوللار), سونداي-اق وڭدەلمەگەن مىرىش (39,5 ملن اقش دوللارى) بار.
2026 جىلدىڭ العاشقى توقسانىندا رەسەيدەن قازاقستانعا يمپورت كولەمى 28,5%-عا ءوسىپ, 4,96 ملرد اقش دوللارىنا جەتتى. يمپورت ءوسىمى ستراتەگيالىق ماڭىزى بار تاۋارلار مەن ونەركاسىپ ونىمدەرىنىڭ جەتكىزىلىمىنىڭ ارتۋىمەن بايلانىستى. اسىرەسە, ۋران يمپورتىنىڭ كولەمى ايتارلىقتاي ءوسىپ, 2486 ەسەگە ارتىپ, 258,5 ملن اقش دوللارىن قۇرادى. تابيعي گاز يمپورتى 93,4%-عا ءوسىپ, 499 ملن دوللارعا جەتسە, وڭدەلمەگەن جانە جارتىلاي وڭدەلگەن التىن يمپورتى 36,5 ەسەگە ۇلعايىپ, 211,2 ملن دوللاردى قۇرادى. سونىمەن قاتار, مۇناي ونىمدەرى, بيداي, باعالى مەتالدار كەندەرى مەن كونتسەنتراتتارى, سونداي-اق تەمىرجول ۆاگوندارى يمپورتى بويىنشا دا ءوسىم تىركەلدى.
ءوزارا ساۋدانىڭ وڭ ديناميكاسى قازاقستان مەن رەسەي اراسىنداعى ەكونوميكالىق ىقپالداستىقتىڭ جوعارى دەڭگەيىن, وندىرىستىك كووپەراتسيانىڭ كەڭەيۋىن جانە ەكى ەلدىڭ نەگىزگى سالالارى ونىمدەرىنە دەگەن تۇراقتى سۇرانىستى كورسەتەدى.