جەتىسۋدا مىڭنان استام الاياقتىق سايت بۇعاتتالدى

پوليتسيا قىزمەتكەرلەرى 104 قىلمىستىق ءىستى اياقتاپ, ونىڭ 94-ءىن سوتقا جولدادى. سونىمەن قاتار 37 ەپيزودتان تۇراتىن كوپەپيزودتى قىلمىستىق ءىس تە سوت قاراۋىنا جىبەرىلدى.

2025 جىلدان باستاپ كيبەرقىلمىستاردىڭ الدىن الۋ ماقساتىندا جەتىسۋ وبلىسىنىڭ پروكۋراتۋراسى, پوليتسيا دەپارتامەنتى, «قازاقتەلەكوم», «قاينار-مەديا» جشس جانە «موبايل تەلەكوم-سەرۆيس» جشس اراسىندا ءۇش ىنتىماقتاستىق تۋرالى مەموراندۋمعا قول قويىلدى.

نەگىزگى ماقسات — ينتەرنەت-قىلمىستاردىڭ الدىن الۋ, انىقتاۋ جانە جولىن كەسۋ, سونداي-اق تۇرعىنداردىڭ تسيفرلىق ساۋاتتىلىعىن ارتتىرۋ.

پروفيلاكتيكالىق جۇمىستارعا «جاسقىران» ستۋدەنتتىك جاساعىنىڭ مۇشەلەرى, «Lider KZ» ەرىكتىلەرى, «قوسقاناتجەتىسۋ» قوعامدىق بىرلەستىگى مەن بلوگەرلەر بەلسەندى تۇردە تارتىلىپ كەلەدى.

تۇرعىندارعا ارنالعان ەسكەرتۋ سيپاتىنداعى بەينەماتەريالدارعا اپاراتىن QR-كودتارى بار ارنايى جادىنامالار ازىرلەندى. قوعامدىق ورىنداردا 58 مىڭعا جۋىق جادىناما مەن بروشيۋرا تاراتىلدى.

ينتەرنەت كەڭىستىگىن مونيتورينگتەۋ بارىسىندا 1000-عا جۋىق الاياقتىق سايت انىقتالىپ, بۇعاتتالدى. سونىمەن قاتار جىل باسىنان بەرى كيبەرپوليتسيا قىزمەتكەرلەرى 10 ادامنان تۇراتىن ەكى دروپپەرلەر توبىن ۇستادى. سوتقا سەگىز قىلمىستىق ءىس جولداندى.

«ينتەرنەت-الاياقتار ازاماتتاردى الداۋدىڭ تاسىلدەرىن ۇنەمى وزگەرتىپ وتىرادى. سوندىقتان ءبىزدىڭ باستى مىندەتىمىز — مۇنداي قىلمىستاردى اشۋمەن قاتار, ولاردىڭ الدىن الۋ. بۇگىندە پروفيلاكتيكاعا, تۇرعىنداردىڭ تسيفرلىق ساۋاتتىلىعىن ارتتىرۋعا جانە الاياقتىق سحەمالاردى جەدەل انىقتاۋعا ەرەكشە كوڭىل بولىنۋدە. ازاماتتاردى ساق بولۋعا, جەكە دەرەكتەرى مەن بانك رەكۆيزيتتەرىن بوگدە ادامدارعا بەرمەۋگە شاقىرامىز», دەپ اتاپ ءوتتى كيبەرپوليتسيا قىزمەتكەرلەرى.

پوليتسيا جەتىسۋ وبلىسىنىڭ تۇرعىندارىن تسيفرلىق قاۋىپسىزدىك تالاپتارىن ساقتاۋعا جانە جەكە ءارى بانكتىك مالىمەتتەرىن بوگدە ادامدارعا بەرمەۋگە شاقىرادى.

ايتا كەتەيىك, مادەنيەت جانە اقپارات مينيسترلىگى مۇددەلى مەملەكەتتىك ورگاندارمەن بىرلەسىپ جازعى كەزەڭدە بالالاردىڭ قاۋىپسىزدىگىن ارتتىرۋ بويىنشا 59 پۋنكتتەن تۇراتىن ارنايى مەديا جوسپار ازىرلەدى.