ۆلاديمير پۋتين ءوز ماقالاسىندا رەسەي مەن قازاقستان ءىرى ساۋدا سەرىكتەستەرى ەكەنىن اتاپ ءوتتى, دەپ جازادى Egemen.kz.
«رەسەي مەن قازاقستان – ءىرى ساۋدا سەرىكتەستەرى. ەلدەرىمىز بىرنەشە جىل قاتارىنان ەكسپورت پەن يمپورت كولەمىنىڭ جوعارى دەڭگەيىن تۇراقتى ساقتاپ كەلەدى. الىس-بەرىستىڭ باسىم بولىگىن ۇلتتىق ۆاليۋتا ارقىلى جۇزەگە اسىرىپ جاتىرمىز. رەسەيدىڭ قازاقستان ەكونوميكاسىنا سالعان كاپيتالىنىڭ جالپى كولەمى – شامامەن 30 ميلليارد دوللار. ال قازاقستانداعى شەتەلدىك كاپيتالى بار زاڭدى تۇلعالاردىڭ 40 پايىزدان استامى – رەسەيلىك سەرىكتەستەرمەن بىرلەسىپ قۇرعان كومپانيالار. رەسپۋبليكادا رەسەي ينۆەستورلارىنىڭ قاتىسۋىمەن 70-كە جۋىق ءىرى جوبا ىسكە اسىرىلىپ جاتىر. سونىڭ ىشىندە اۆتوكولىك قۇراستىرۋ, اۋىر ماشينا جاساۋ, حيميا ونەركاسىبى جانە باسقا دا تەحنولوگيالىق سالالارعا قاتىستى تىڭ جوبالار بار. سونىڭ ارقاسىندا قازىردىڭ وزىندە 60 مىڭنان استام جاڭا جۇمىس ورنى اشىلدى», دەيدى پۋتين.
سونىمەن قاتار ەكى ەلدىڭ ەنەرگەتيكا سالاسىنداعى ىنتىماقتاستىعى دا قارقىندى دامىپ كەلە جاتقانىن اتاپ ءوتتى.
«قازاقستاننىڭ الەمدىك نارىققا باعىتتالعان مۇناي ەكسپورتىنىڭ 80 پايىزدان استامى كاسپي قۇبىر كونسورتسيۋمى (كقك), ياعني رەسەي اۋماعى ارقىلى وتەدى. رەسپۋبليكانى ەنەرگيامەن تۇراقتى قامتاماسىز ەتۋ ءۇشىن «گازپروم» كومپانياسىنىڭ قاتىسۋىمەن ۇلتتىق گاز تاسىمالداۋ ينفراقۇرىلىمىن وڭتايلاندىرۋدى جانە كەڭەيتۋدى جوسپارلاپ وتىرمىز. سونىمەن قاتار رەسەيدىڭ بيزنەس وكىلدەرى قازاقستانداعى سەرىكتەستەرىنە بالامالى جانە «تازا» ەنەرگەتيكا سالاسىنا قاجەتتى بىرەگەي ازىرلەمەلەر مەن تەحنولوگيالاردى ۇسىنىپ وتىر», دەدى رەسەي پرەزيدەنتى.
ايتا كەتەيىك, ۆلاديمير ءپۋتيننىڭ قازاقستانعا مەملەكەتتىك ساپارى قارساڭىندا «ەgemen Qazaqstan» گازەتىنە ماقالاسى جاريالاندى.