قازاقستان مۇسىلماندارى دىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى قۇربان ايت مەرەكەسىندەگى امالدار تۋرالى ايتتى, دەپ جازادى Egemen.kz.
«شىن مانىندە, قۇربان ايت – جالاڭ قۇرباندىق ەمەس, ول – ىشكى جان-دۇنيەڭدى تازارتۋ مەن رۋحاني تۇرعىدان جاڭعىرۋ دەگەن ءسوز. سۇلتانماحمۇت تورايعىروۆ بابامىز ءبىر سوزىندە ءدىن شىن اقىل, عىلىممەن بىرلىك ەتسە عانا شىن ءدىن بولاتىنىن, قۇر كوڭىلگە سەنىپ, قۇلشىلىق ەتۋ دۇرىس ەمەس ەكەنىن ايتقان. راسىندا «قۇربان» ءسوزى «جاقىن بولۋ», «جاقىنداۋ» دەگەن ۇعىمدى بىلدىرەدى. بۇل – شىنايى نيەت پەن اللاعا دەگەن سۇيىسپەنشىلىكتى پاش ەتەتىن مەيرام. ۇلىق مەرەكەنىڭ تاربيەلىك ءمانى مەن ماعىناسى وسىندا جاتىر» دەيدى باس ءمۇفتي.
ناۋرىزباي قاجى تاعان ۇلى ءوز سوزىندە, ماتەريالدىق مۇمكىندىگى بار ءəرى جولاۋشى ەمەس مۇسىلمانعا قۇرباندىق شالۋ – ءۋəجىپ, مۇسىلماندىق مىندەت ەكەنىن ايتادى. سونداي-اق شاماسى كەلمەگەن ادامعا اللا تاعالا مۇنداي مىندەت جۇكتەمەگەنىن ايت كۇندەرى از دا بولسا ساداقا بەرىپ, قاراۋسىز قالعان قارتتارعا, جەتىمدەر مەن كوپبالالى وتباسىلارعا كوڭىل ءبولۋ – ساۋاپتى ءىس ەكەنىن جەتكىزدى.
«قۇربان ايت تەك قۇربان شالۋمەن شەكتەلمەيدى. بۇل – اعايىن اراسىن جاقىنداتا تۇسەتىن كۇن. ارازداسقان ادامدار تاتۋلاسىپ, ءوزارا كەشىرىم جولىن ۇستانادى. ايت كۇندەرى تۋىسقاننىڭ باسىن قوسىپ, قارىم-قاتىناستى كۇشەيتكەن ابزال. قۇربان ايت – وتباسى قۇندىلىعىن ارتتىراتىن مەرەكە. اتا-انامىزعا, بالا-شاعامىزعا سىيلىق بەرىپ, ولارعا ارنايى كوڭىل ءبولىپ, بارىنشا قۋانتايىق» دەدى ناۋرىزباي قاجى تاعان ۇلى.
سونداي-اق وسى امالدان كەيىن وسكەلەڭ ۇرپاق قۇربان ايتتىڭ قادىرى مەن ساۋابىن سەزىنىپ, ىزگىلىككە ۇمتىلىپ, مەرەكەنى اسىعا كۇتەتىنىن ايتتى.
«قوجا احمەت ياساۋي بابامىز ءبىر دانالىق سوزىندە حاققا قىزمەت حالىققا قىزمەت ەتۋدەن باستالاتىنىن ايتقان. بۇل – حالىقتىڭ رازىلىعى – حاقتىڭ رازىلىعىندا دەگەن ءسوز. وسى رەتتە ەلىمىزدەگى بارشا شارۋا قوجالىقتارىنىڭ قوجايىندارىن مال قۇنىن قولدان كوتەرمەي, حالىققا وڭتايلى باعانى ۇسىنۋعا شاقىرامىن» دەدى باس ءمۇفتي.
ايتا كەتەيىك, مەملەكەت باسشىسى ەل تۇرعىندارىن قۇربان ايت مەرەكەسىمەن قۇتتىقتادى.