بيزنەس پەن مەملەكەتتىك ورگاندار تجار جۇيەسىن قولدانۋ ءتارتىبىن تالقىلادى

تالقىلاۋدى ۇيىمداستىرۋ باستاماسىن قازاقستاندىق تاراپ كوتەردى. ءىس-شاراعا ەۋرازيالىق ەكونوميكالىق وداققا (ەاەو) مۇشە مەملەكەتتەردىڭ مەملەكەتتىك ورگاندارىنىڭ وكىلدەرى, بيزنەس قاۋىمداستىقتار مەن سالالىق بىرلەستىكتەر قاتىستى. جالپى جيىنعا ەكونوميكانىڭ ءتۇرلى سالالارىنىڭ 100-دەن استام وكىلى قاتىستى.

كەڭەس بارىسىندا رەسەي فەدەراتسياسىنىڭ فەدەرالدىق سالىق قىزمەتى مەن فەدەرالدىق كەدەن قىزمەتىنىڭ وكىلدەرى جاڭا جۇيەنى ەنگىزۋ جانە قولدانۋ ءتارتىبى جونىندە ءتۇسىندىرۋ جۇمىستارىن جۇرگىزىپ, رەسەي اۋماعىنا تاۋار جەتكىزۋگە قاتىستى پراكتيكالىق ماسەلەلەر بويىنشا قاتىسۋشىلاردىڭ سۇراقتارىنا جاۋاپ بەردى.

تجار — ەاەو ەلدەرىنەن رەسەي فەدەراتسياسىنا تاۋار تاسىمالداۋ كەزىندە قولدانىلاتىن تاۋار جەتكىزىلىمىن الدىن الا راستاۋدىڭ ۇلتتىق جۇيەسى. جۇيە اياسىندا جەتكىزىلىمدى الدىن الا تىركەۋ, تاۋاردىڭ الداعى جەتكىزىلىمى تۋرالى قۇجاتتى (دوپپ) راسىمدەۋ, جاناما سالىقتار بويىنشا كەپىلدىك تولەم ەنگىزۋ, سونداي-اق جۇيەدە قاجەتتى مالىمەتتەردىڭ تىركەلگەنىن راستايتىن QR-كود الۋ كوزدەلگەن.

تجار جۇيەسى رەسەي فەدەراتسياسىنىڭ 2026 جىلعى 17 ساۋىردەگى №101-فز «تاۋار جەتكىزىلىمىن الدىن الا راستاۋدىڭ ۇلتتىق جۇيەسى تۋرالى» فەدەرالدىق زاڭى جانە رەسەيدىڭ سالىق زاڭناماسىنا ەنگىزىلگەن ءتيىستى وزگەرىستەر نەگىزىندە ەنگىزىلدى. 2026 جىلدىڭ 1 ساۋىرىنەن باستاپ جۇيە پيلوتتىق رەجيمدە جۇمىس ىستەپ كەلەدى, ال 2026 جىلدىڭ 1 ماۋسىمنان باستاپ ونى مىندەتتى تۇردە قولدانۋ جوسپارلانعان.

رەسەي تاراپىنىڭ مالىمەتىنشە, اتالعان جۇيەنى ەنگىزۋدىڭ نەگىزگى ماقساتى — تاۋار اينالىمىنىڭ اشىقتىعىن ارتتىرۋ, جاناما سالىقتاردىڭ تولىق ءارى ۋاقىتىلى تولەنۋىن قامتاماسىز ەتۋ جانە تاۋار قوزعالىسىن بارلىق كەزەڭدە ءتيىمدى قاداعالاۋ. سونىمەن قاتار باقىلاۋ راسىمدەرىنىڭ نەگىزگى بولىگى شەكارادان وتپەي تۇرىپ جۇزەگە اسىرىلاتىن بولادى.

تالقىلاۋ بارىسىندا بيزنەس وكىلدەرى جۇيەدە تىركەلۋ ءتارتىبى, قۇجاتتاردى راسىمدەۋ مەرزىمدەرى, كەپىلدىك تولەمدەردى قولدانۋ ەرەكشەلىكتەرى, سونداي-اق جاڭا تالاپتاردىڭ لوگيستيكا مەن جەتكىزۋ مەرزىمدەرىنە ىقپالى جونىندە بىرقاتار سۇراق كوتەردى. قاتىسۋشىلارعا بارلىق ماسەلەلەر بويىنشا ءتيىستى تۇسىنىكتەمەلەر بەرىلدى.

سونىمەن قاتار رەسەي فەدەراتسياسىنىڭ فەدەرالدىق كەدەن قىزمەتى جاڭا تالاپتاردى كەزەڭ-كەزەڭىمەن جانە بارىنشا جەڭىلدەتىلگەن تارتىپتە ەنگىزۋ كوزدەلىپ وتىرعانىن اتاپ ءوتتى. اتاپ ايتقاندا, جۇيەنى ەنگىزۋ پروتسەسىن سۇيەمەلدەۋ ءۇشىن قازاقستان–رەسەي باعىتى بويىنشا 30 وتكىزۋ بەكەتىندە, سونداي-اق بەلارۋس–رەسەي شەكاراسىنداعى 11 ۋچاسكەدە ءموبيلدى توپتار قۇرىلىپ, ولار سىرتقى ەكونوميكالىق قىزمەتكە قاتىسۋشىلارعا كونسۋلتاتسيالىق جانە پراكتيكالىق قولداۋ كورسەتەتىن بولادى.

قازاقستان مەن رەسەي اراسىنداعى ءوزارا ساۋدا كولەمىنىڭ اۋقىمدىلىعىن ەسكەرسەك, تجار جۇيەسىنىڭ جۇمىسى نارىق قاتىسۋشىلارىنىڭ كەڭ اۋقىمى ءۇشىن ماڭىزدى. 2025 جىلدىڭ قورىتىندىسى بويىنشا قازاقستاننىڭ رەسەيگە ەكسپورتى شامامەن 8,1 ملرد اقش دوللارىن قۇرادى. جەتكىزىلىمدەردىڭ باسىم بولىگى اۆتوموبيل كولىگى ارقىلى جۇزەگە اسىرىلادى, سوندىقتان جاڭا جۇيەنىڭ تالاپتارى وسى تاسىمال تۇرىنە تىكەلەي اسەر ەتەدى.

كەڭەس قورىتىندىسىندا قاتىسۋشىلار ەاەو اياسىنداعى ءوزارا ساۋدانىڭ جاڭا تالاپتارىنا سىرتقى ەكونوميكالىق قىزمەتكە قاتىسۋشىلاردىڭ دەر كەزىندە بەيىمدەلۋىن قامتاماسىز ەتۋ ءۇشىن مەملەكەتتىك ورگاندار مەن بيزنەس قاۋىمداستىق اراسىنداعى اشىق ءارى تۇراقتى ديالوگتى جالعاستىرۋدىڭ ماڭىزدىلىعىن اتاپ ءوتتى.