بۇگىن مۇسىلمان قاۋىمى قاسيەتتى قۇربان ايت مەرەكەسىن اتاپ ءوتىپ جاتىر. تاڭ سارىدەن مەشىتتەردە ايت نامازى وقىلىپ, تۇرعىندار ءبىر-بىرىنە اقجارما تىلەكتەرىن ارنادى. ايت مەيرامى قالا ىشىندە ەرەكشە قاربالاسپەن باستالدى. اسىرەسە مال بازارىندا حالىق قاراسى كوپ بولدى, دەپ حابارلايدى Egemen.kz.
تۇرعىندار قۇرباندىققا شالاتىن مالدى تاڭداپ, ساۋدا قىزا ءتۇستى. ساتۋشىلاردىڭ ايتۋىنشا, بيىل مال باعاسى وتكەن جىلمەن سالىستىرعاندا ءبىرشاما قىمباتتاعان. بۇعان جەم-ءشوپ پەن تاسىمال شىعىندارىنىڭ ءوسۋى سەبەپ بولدى. قازىر قوي باعاسى شامامەن 80 مىڭنان 120 مىڭ تەڭگەگە دەيىن جەتكەن. سوعان قاراماستان, قۇربان شالۋعا نيەتتى جانداردىڭ قاتارى ازايماعان. كوپشىلىك بۇل كۇندى تەك ءدىني مىندەت رەتىندە ەمەس, ساۋاپ پەن قايىرىمدىلىقتىڭ مەرەكەسى رەتىندە قابىلدايدى.
مەملەكەت باسشىسى ەل تۇرعىندارىن قۇربان ايت مەرەكەسىمەن قۇتتىقتادى
قازاقستان مۇسىلماندارى ءدىني باسقارماسىنىڭ شاريعات جانە ءپاتۋا ءبولىمىنىڭ مامانى مەدەت قۇرساقوۆ قۇرباندىق شالۋدىڭ نەگىزگى شارتتارىن ءتۇسىندىرىپ ءوتتى.
«قۇرباندىق شالۋ – جاعدايى كەلەتىن, داۋلەتى ساي ءاربىر مۇسىلمانعا مىندەت سانالادى. ال تۇرمىسى تومەن, بۇعان شاماسى جەتپەيتىن جاندارعا ءدىنىمىز ەشقانداي اۋىرتپالىق سالمايدى. سوندىقتان بۇل مەيرامداعى ەڭ باستى نارسە – مالدىڭ سانى نەمەسە باعاسى ەمەس, ادامنىڭ جۇرەگىندەگى شىنايى نيەتى مەن ىقىلاسى», دەيدى مەدەت قۇرساقوۆ.
حالقىمىزدىڭ ەجەلدەن كەلە جاتقان ىزگى ءداستۇرى بويىنشا, قۇرباندىققا شالىنعان مالدىڭ ەتى اعايىن-تۋىسقا, كورشى-قولاڭعا جانە الەۋمەتتىك كومەككە مۇقتاج وتباسىلارعا تاراتىلادى.
ناۋرىزباي قاجى تاعان ۇلى: قۇربان ايت – جاقسىلىقتا جارىساتىن مەرەكە
ايت كۇندەرى ادامداردىڭ ءبىر-بىرىنە قولداۋ كورسەتىپ, مەيىرىم مەن جاناشىرلىق تانىتۋى – ۇلتتىق بولمىسىمىزدىڭ اجىراماس بولشەگى. قۇربان ايت – تەك ءدىني مەرەكە عانا ەمەس, ەل ىشىندەگى بىرلىك پەن تاتۋلىقتى نىعايتاتىن ۇلكەن رۋحاني قۇندىلىق. بۇل مەيرامنىڭ باستى ەرەكشەلىگى – ادامداردى جاقسىلىققا, قايىرىمدىلىق پەن ادامگەرشىلىككە شاقىرادى.
جاناسىل زايتيمحان,ەۇۋ ستۋدەنتى