بۇگىن قر عىلىم جانە جوعارى ءبىلىم مينيسترلىگى مەن حالىقارالىق دزيۋدو فەدەراتسياسى (IJF) اراسىندا ىنتىماقتاستىق تۋرالى مەموراندۋمعا قول قويىلدى. قۇجاتقا قر عىلىم جانە جوعارى ءبىلىم ءمينيسترى ساياسات نۇربەك پەن IJF پرەزيدەنتى ماريۋس ۆيزەر قول قويدى, دەپ حابارلايدى Egemen.kz
مەموراندۋم ستۋدەنتتەر اراسىندا دزيۋدونى دامىتۋ مەن كەڭىنەن ناسيحاتتاۋعا باعىتتالعان بىرلەسكەن باستامالاردى جۇزەگە اسىرۋدى كوزدەيدى. سونىمەن قاتار قۇجات سپورتتىق ينفراقۇرىلىمدى جەتىلدىرۋدى, سپورتتىق رەزەرۆ دايارلاۋدى, دەنە شىنىقتىرۋ جانە سپورت سالاسىنداعى وقىتۋشىلار مەن مامانداردىڭ بىلىكتىلىگىن ارتتىرۋدى قامتيدى.
ىنتىماقتاستىق اياسىندا دزيۋدو باعدارلامالارىن جوعارى وقۋ ورىندارى مەن كوللەدجدەردىڭ ءبىلىم بەرۋ ۇدەرىسىنە كەزەڭ-كەزەڭىمەن ەنگىزۋ, جارىستار ۇيىمداستىرۋ, ستۋدەنتتىك ليگالار قۇرۋ جانە سپورتتىق ينفراقۇرىلىمدى دامىتۋ جوسپارلانىپ وتىر.
ءبىلىم بەرۋ ۇيىمدارىنىڭ ماتەريالدىق-تەحنيكالىق بازاسىن نىعايتۋعا, سپورتتىق قۇرال-جابدىقتارمەن, تاتاميمەن جانە دزيۋدومەن اينالىسۋعا ارنالعان ارنايى ەكيپيروۆكامەن قامتاماسىز ەتۋگە ەرەكشە نازار اۋدارىلادى.
باعدارلامانىڭ وپەراتورى رەتىندە Jenys International Sports Foundation قورى ايقىندالدى. قور جوبانى قارجىلاندىرىپ, ونى ىسكە اسىرۋ جۇمىستارىن ۇيلەستىرەدى.
تاراپتار مەموراندۋمدى ىسكە اسىرۋ بۇقارالىق سپورتتى دامىتۋداعى ماڭىزدى قادام بولاتىنىن جانە جاستاردى دزيۋدومەن اينالىسۋعا ءارى سالاۋاتتى ءومىر سالتىن ۇستانۋعا ىنتالاندىراتىن قوسىمشا مۇمكىندىكتەر قالىپتاستىراتىنىن اتاپ ءوتتى.