ەلىمىزدە اسكەري قىزمەتتى زامان تالابىنا ساي جاڭعىرتۋ باعىتىندا بىرقاتار باستاما قولعا الىنىپ جاتىر. سونىڭ ءبىرى – قورعانىس مينيسترلىگى جۇزەگە اسىرىپ وتىرعان «Sarbaz+» جوباسى. بۇل باستاما ساربازداردىڭ الەۋمەتتىك جاعدايىن جاقسارتۋعا, قىزمەت بارىسىن اشىق ءارى ءتيىمدى ەتۋگە جانە اسكەردىڭ تسيفرلىق ينفراقۇرىلىمىن دامىتۋعا باعىتتالىپ وتىر.
جوبا اياسىندا اسكەري قىزمەتتىڭ كوپتەگەن ۇدەرىسى اۆتوماتتاندىرىلىپ, تسيفرلىق فورماتقا كوشىرىلىپ جاتىر. ياعني ساربازدار تۋرالى دەرەكتەر, ولاردىڭ قىزمەت بارىسى, دەنساۋلىق جاعدايى مەن كۇندەلىكتى تىرشىلىگى ارنايى جۇيەلەر ارقىلى باقىلاۋعا الىنعان. بۇل كومانديرلەرگە دە, اتا-انالارعا دا ناقتى ءارى جەدەل اقپارات الۋعا مۇمكىندىك بەرمەك.
ىسكە اسىرىلا باستاعانىنا كوپ ۋاقىت وتە قويماسا دا «Sarbaz+» اتا-انا مەن اسكەر اراسىنداعى كوپىرگە اينالىپ ۇلگەردى. ويتكەنى بۇل جوبانىڭ ماڭىزدى تۇستارىنىڭ ءبىرى – اتا-انالارمەن اراعا ورناتىلعان بايلانىس. بۇرىن اسكەردەگى بالاسىنىڭ جاعدايىن ءبىلۋ قيىنعا سوقسا, قازىر ارنايى پلاتفورمالار ارقىلى اتا-انالار بالاسىنىڭ قانداي بولىمدە بورىشىن وتەپ جاتقانىن, جالپى جاعدايىن باقىلاپ وتىرا الادى. بۇل ءوز كەزەگىندە قوعامداعى اسكەرگە دەگەن سەنىمدى ارتتىرۋعا ىقپال ەتەدى.
دەگەنمەن «Sarbaz+» تسيفرلاندىرۋمەن عانا شەكتەلمەيدى. جوبا اياسىندا ساربازداردىڭ تۇرمىس جاعدايىن جاقسارتۋ, تاماقتانۋ ساپاسىن ارتتىرۋ, مەديتسينالىق قىزمەت كورسەتۋ دەڭگەيىن كوتەرۋ ماسەلەلەرى دە قامتىلعان. سونىمەن قاتار اسكەري قىزمەتشىلەردىڭ قۇقىقتارىن قورعاۋ جانە ولاردىڭ قاۋىپسىزدىگىن قامتاماسىز ەتۋ دە نازارعا الىنعان.
اشىقتىق پەن باقىلاۋعا نەگىزدەلگەن بۇل جوبا اسكەري بولىمدەردەگى اشىقتىقتى كۇشەيتۋگە مۇمكىندىك بەرەدى. ءاربىر ساربازدىڭ جاعدايى جۇيەلى تۇردە تىركەلىپ وتىرعاندىقتان, ءتۇرلى زاڭبۇزۋشىلىقتاردىڭ الدىن الۋ دا جەڭىلدەيدى. بۇل اسىرەسە قوعامدا ءجيى كوتەرىلەتىن اسكەردەگى قاۋىپسىزدىك ماسەلەلەرىن شەشۋگە باعىتتالعان ماڭىزدى قادام بولىپ وتىر.
جوبانىڭ العاشقى قاناتقاقتى الاڭى رەتىندە الماتى وبلىسىنداعى 78460 اسكەري ءبولىمى تاڭدالعان ەكەن. «Sarbaz+» مەرزىمدى اسكەري قىزمەتكە دەگەن كوزقاراستى ترانسفورماتسيالاۋ اياسىندا جۇزەگە اسىرىلىپ, ساربازداردى دايارلاۋدىڭ نەعۇرلىم سانالى ءارى دامۋعا باعىتتالعان جۇيەسىن كوزدەيدى. قورعانىس ۆيتسە-ءمينيسترى دارحان احمەديەۆتىڭ ايتۋىنشا, مۇنداعى نەگىزگى ماقسات – ساربازداردىڭ ءبىر جىلدىق اسكەري قىزمەتىن بارىنشا ءتيىمدى, مازمۇندى ءارى پايدالى وتكىزۋىنە جاعداي جاساۋ.
– «Sarbaz+» جوباسى ءبىزدىڭ مەرزىمدى اسكەري قىزمەتتەگى ساربازداردى جانداندىرۋعا باعىتتالعان جوبا. ياعني نەگىزگى ماقساتى – ساربازداردىڭ ءبىر جىلدىق اسكەري قىزمەتىن مۇمكىندىگىنشە ءتيىمدى وتكىزۋ. باسقاشا ايتقاندا, وسى ءبىر جىل ىشىندە ساربازدار ۋاقىت وتكىزىپ قانا قويماي, وزدەرىن دامىتىپ, ناقتى داعدىلاردى مەڭگەرىپ شىعۋعا ءتيىس. جوبا اياسىندا اسكەري بولىمدەردە ءتۇرلى مۇمكىندىكتەر قاراستىرىلعان. وزدەرىڭىز كورگەندەي, درون ارەناسى, بايلانىس كابينەتتەرى بار. سونىمەن قاتار فيتنەس-براسلەتتەر ەنگىزىلىپ جاتىر, ساربازدار سپورتپەن تۇراقتى تۇردە شۇعىلدانادى. اپتاسىنا ءۇش رەت دجيۋ-دجيتسۋ ساباقتارى وتكىزىلىپ, رازرياد بەرىلەدى. بۇعان قوسا ەلەكتروندىق تير, فۋتبول الاڭى, ستريتبول جانە ۆوركاۋت الاڭدارى جۇمىس ىستەيدى. ياعني ساربازداردىڭ ۋاقىتىن ءتيىمدى وتكىزۋىنە تولىق جاعداي جاسالعان. ناتيجەسىندە, ءبىر جىل ىشىندە اسكەري قىزمەتشىلەر اعىلشىن ءتىلىن ۇيرەنىپ شىعا الادى, شاحماتتان بەلگىلى ءبىر دەڭگەيگە جەتەدى, سپورتپەن كۇندەلىكتى اينالىسادى. جالپى العاندا, ساربازدار بۇل ۋاقىتتى جان-جاقتى دامۋعا پايدالانا الادى, – دەيدى ۆيتسە-مينيستر.
جوبا اياسىندا وتاندىق ءىرى ۇلتتىق جانە جەكە كومپانيالارمەن مەموراندۋمدار جاسالعان. اسىرەسە بۇل بايلانىس پولكى بولعاندىقتان, بايلانىس سالاسىندا جۇمىس ىستەيتىن ءىرى كومپانيالارمەن ارىپتەستىك ورناتىلعان. سونىڭ ناتيجەسىندە, وسى اسكەري بولىمنەن شىققان ساربازدار اتالعان كومپانيالاردا جۇمىسقا ورنالاسۋ مۇمكىندىگىنە يە بولادى. ياعني ولار اسكەري قىزمەت بارىسىندا قاجەتتى اقپارات پەن داعدىلاردى مەڭگەرىپ, كەيىن سول مەكەمەلەرگە بارىپ, تاجىريبەدەن ءوتىپ, ءارى قاراي تۇراقتى جۇمىسقا تۇرا الادى. بۇل بۇرىننان بار ۇبت تاپسىرماي گرانت الۋ مۇمكىندىگىنەن بولەك, قوسىمشا مۇمكىندىك رەتىندە ۇسىنىلىپ وتىر.
– جوبا تەك ءبىلىم مەن داعدى بەرۋمەن شەكتەلمەيدى. قاۋىپسىزدىك ماسەلەسىنە دە ەرەكشە نازار اۋدارىلعان. قازىرگى تاڭدا ساربازداردىڭ كۇندەلىكتى قاۋىپسىزدىگى – ەڭ وزەكتى ماسەلەلەردىڭ ءبىرى. وسىعان بايلانىستى اسكەري بولىمدەرگە جاڭا, «اقىلدى» كامەرالار ورناتىلىپ, بەينەاناليتيكا جۇيەسى ەنگىزىلگەن. بارلىق كامەرا ءبىر جۇيەگە بىرىكتىرىلىپ, اسكەري بولىمدەگى جاعدايدى ءبىر ەكراننان باقىلاۋعا مۇمكىندىك بار. بۇل اقپارات ءبولىم كومانديرىنە جانە شتاب باسشىسىنا تىكەلەي جەتكىزىلىپ وتىرادى, – دەيدى د.احمەديەۆ.
مينيستر ورىنباسارىنىڭ ايتۋىنشا, وفيتسەرلەر مەن سەرجانتتار ارنايى ترانسفورماتسيالىق كۋرستاردان وتكەن. بۇل كۋرستار اياسىندا ولار كوشباسشىلىق قاسيەتتەردى دامىتۋ, ساربازدارمەن ءتيىمدى قارىم-قاتىناس ورناتۋ, پسيحولوگيالىق تۇرعىدا دۇرىس جۇمىس ىستەۋ داعدىلارىن مەڭگەرىپتى. ياعني جاڭا فورماتتاعى كوشباسشىلىق پەن كوممۋنيكاتسيا مادەنيەتى قالىپتاستىرىلىپ جاتىر.
پسيحولوگيالىق قولداۋ باعىتىندا دا جاڭاشىلدىقتار بار. اسكەري بولىمدەردە العاش رەت پسيحولوگيالىق دەمالىس كابينەتتەرى اشىلىپ, وندا ويىن پريستاۆكالارى, سونىڭ ىشىندە PlayStation 5 ورناتىلعان. بۇل ساربازداردىڭ ەموتسيونالدىق جۇكتەمەسىن ازايتۋعا مۇمكىندىك بەرەدى.
– الداعى ۋاقىتتا «Sarbaz+» باسقا دا اسكەري بولىمدەرگە كەزەڭ-كەزەڭىمەن ەنگىزىلەدى. جالپى, جىل سايىن ەكىدەن باستاپ ونعا دەيىن اسكەري ءبولىم قوسىلىپ, جوبانىڭ اۋقىمى كەڭەيە بەرەدى, – دەيدى ۆيتسە-مينيستر.
جوبادا قازىرگى ەڭبەك نارىعىنداعى وزگەرىستەر دە ەسكەرىلگەن ەكەن. بۇگىندە بارلىق ماماندىق ديپلومدى تالاپ ەتە بەرمەيدى, اسىرەسە ءىت سالاسىندا ناقتى داعدى ماڭىزدى. مىسالى, Google سياقتى كومپانيالار ادامنىڭ قابىلەتىنە باسىمدىق بەرەدى. وسىعان بايلانىستى, ەگەر سارباز قاجەتتى داعدىلاردى مەڭگەرسە, ديپلومسىز-اق جۇمىسقا ورنالاسۋ مۇمكىندىگى قاراستىرىلعان. سونىمەن قاتار جوبا اياسىندا اسكەري دايارلىق باعدارلاماسى قايتا قارالىپ, ۋاقىتتى بارىنشا ۇنەمدى پايدالانۋ قاعيداتى ەنگىزىلگەن.
جۋىردا ەلىمىزدىڭ قورعانىس ۆەدومستۆوسىنىڭ باسشىسى, اۆياتسيا گەنەرال-لەيتەنانتى داۋرەن قوسانوۆ پەن پارلامەنت دەپۋتاتتارى الماتى گارنيزونىنا ساپارى بارىسىندا 78460 اسكەري ءبولىمىنىڭ بازاسىندا ىسكە قوسىلعان «Sarbaz+» يننوۆاتسيالىق جوباسىمەن تانىسىپ قايقان-تىن. قوناقتارعا Rtel راديوبايلانىس ماماندارىن, ۇشقىشسىز باسقارىلاتىن Ashik Aspan قۇرىلعىلارىنىڭ وپەراتورلارىن جانە Eltex تەحنولوگيالىق جۇيەلەرىن دايارلاۋدىڭ وقۋ سىنىپتارى كورسەتىلدى. مينيسترلىكتىڭ ءباسپاسوز قىزمەتىنىڭ اقپاراتىنا سۇيەنسەك, جوباعا قاتىسى بار TechOrda باعدارلاماسى بويىنشا Astana Hub-پەن ورناتىلعان ىنتىماقتاستىق اقپاراتتىق قاۋىپسىزدىك تالداۋىن, دەرەكتەردى قورعاۋدى جانە ۇۇا باسقارۋ ءۇشىن جاساندى ينتەللەكت تەحنولوگيالارىن ۇيرەنۋگە مۇمكىندىك بەرەدى.
– اي-سۇلۋ تەلەگرام-بوتى جانە Armia.kz اقپاراتتىق پلاتفورماسى سىندى تسيفرلىق سەرۆيستەر دە وسى جوبانىڭ اياسىندا ءوز قىزمەتىن كورسەتىپ جاتىر. «Sarbaz+» تەحنولوگيانى, ينفراقۇرىلىمدى دامىتىپ, ادام كۇشىن سانالى جۇمساۋعا باعىتتالعان. ءبىز قىزمەتتىڭ زامان تالابىنا ساي جانە اسكەري قىزمەتشىلەردىڭ كاسىبي ءوسۋى ءۇشىن مۇمكىندىكتەر جاسايمىز, – دەيدى د. قوسانوۆ.
ال سەنات دەپۋتاتى عالياسقار سارىباەۆ وتاندىق قورعانىس سالاسى تاريحىنداعى بىرەگەي جوباعا وڭ باعاسىن بەرىپ, وسىنداي جەتىستىكتەر ارقىلى بۇگىنگى بۋىننىڭ قارۋلى كۇشتەرىمىزگە دەگەن سەنىمىنىڭ ارتا تۇسەتىنىن اتاپ ءوتتى.
– «Sarbaz+» ارميانى مودەرنيزاتسيالاۋعا جۇيەلى كوزقاراستىڭ مىسالى بولا الادى جانە ادام كاپيتالىن دامىتۋدىڭ ستراتەگيالىق مىندەتتەرىنە جاۋاپ بەرەدى. ءبىز مەرزىمدى قىزمەت تەك ءتارتىپ پەن پاتريوتيزم مەكتەبىنە عانا ەمەس, زامان تالابىنا ساي قۇزىرەتتەرى بار الاڭعا اينالعانىن كورىپ وتىرمىز. اتالعان جوبا باسەكەگە قابىلەتتى مامانداردى قالىپتاستىرىپ, جاستاردىڭ قارۋلى كۇشتەرگە دەگەن سەنىمىن ارتتىرادى, – دەيدى سەناتور.
بۇگىنگى تاڭدا جوبانىڭ پايدالى بولاتىنى جايلى ءبىراز مىسال كەلتىرۋگە بولادى. ماسەلەن, Myarmy.kz پورتالى ارقىلى 268 ءوتىنىم بەرىلىپ, 90 سارباز ىرىكتەلگەن. بۇل – ءبىر ورىنعا 3 ادام تالاستى دەگەن ءسوز. دەمەك, الداعى ۋاقىتتا جاستاردىڭ جوباعا دەگەن قىزىعۋشىلىعى ارتاتىنى ءسوزسىز.
جالپى العاندا, «Sarbaz+» – اسكەردى جاڭا دەڭگەيگە كوتەرۋگە باعىتتالعان كەشەندى جوبا. ول اسكەري قىزمەتتىڭ اشىقتىعىن ارتتىرىپ قانا قويماي, ساربازداردىڭ ءال-اۋقاتىن جاقسارتۋعا جانە قوعام مەن اسكەر اراسىنداعى بايلانىستى نىعايتۋعا ىقپال ەتەدى. الداعى ۋاقىتتا بۇل باستاما تولىق ىسكە اسقان جاعدايدا, ەلىمىزدىڭ قارۋلى كۇشتەرى زاماناۋي, اشىق ءارى سەنىمدى ينستيتۋتقا اينالارى حاق.