ەلىمىزدە ۇلى جەڭىستىڭ 81 جىلدىعى قارساڭىندا سوعىس ارداگەرلەرى مەن تىل ەڭبەككەرلەرىنە اۋقىمدى الەۋمەتتىك قولداۋ كورسەتىلىپ جاتىر. بيىل ءبىر رەتتىك تولەمدەرگە 32,9 مىڭعا جۋىق ادامعا 3,3 ميلليارد تەڭگەدەن استام قارجى ءبولىندى. ولاردىڭ قاتارىندا تىل ەڭبەككەرلەرى, قازا تاپقان جاۋىنگەرلەردىڭ جەسىرلەرى جانە سوعىس سالدارىنان مۇگەدەكتىك العان ازاماتتار بار, دەپ حابارلايدى Egemen.kz.
قازىرگى تاڭدا قازاقستاندا 57 ۇلى وتان سوعىسىنىڭ ارداگەرى تۇرادى. ولاردىڭ ارقايسىسىنا تۇرعىلىقتى وڭىرىنە قاراماستان 5 ميلليون تەڭگەدەن تولەندى.
ارداگەرلەرگە كورسەتىلەتىن ماتەريالدىق كومەك كولەمى بويىنشا قازاقستان ايماقتاعى جەتەكشى ەلدەردىڭ ءبىرى سانالادى. 2026 جىلى قازاقستانداعى تولەم كولەمى 5 ميلليون تەڭگەگە جەتسە, وزبەكستاندا بۇل كورسەتكىش شامامەن 1,1 ميلليون تەڭگە, ال بەلارۋستە 715–825 مىڭ تەڭگە شاماسىندا بولدى.
ۇلى وتان سوعىسىنىڭ ارداگەرى كەنجەباي مادەنوۆكە «حالىق قاھارمانى» اتاعى بەرىلدى
رەسەيدە فەدەرالدىق تولەم كولەمى شامامەن 61 مىڭ تەڭگەنى قۇرايدى. كەي وڭىرلەردە قوسىمشا ۇستەماقىلار قاراستىرىلعانىمەن, جالپى كولەمى قازاقستانداعى تولەمنەن الدەقايدا تومەن.
مەملەكەت قارجىلاي كومەكتەن بولەك, ارداگەرلەرگە ەرەكشە قۇرمەت كورسەتۋدى دە جالعاستىرىپ كەلەدى. ەل باسشىلىعى سوعىس جانە ەڭبەك ەرلەرىنىڭ ەرلىگى مەن ەڭبەگىن ۇمىتپاي, ولاردىڭ ەسىمىن ۇلىقتاۋ ماڭىزدى ەكەنىن اتاپ وتۋدە.