پرەزيدەنت جانىنداعى ۇلتتىق عىلىم اكادەمياسى تۇران ۋنيۆەرسيتەتىنىڭ بازاسىندا « ۇلى دالا: تۇران وركەنيەتى» حالىقارالىق زەرتتەۋ ورتالىعىن اشتى, دەپ حابارلايدى Egemen.kz.
حالىقارالىق زەرتتەۋ حابى مەن زامانعا يكەمدى عىلىمي ينفراقۇرىلىم جەلىسىن قۇرۋدى ماقسات ەتەتىن ورتالىق اكادەميالىق كەڭىستىكتى قامتيتىن الاڭعا اينالماق.
سالتاناتتى جيىندا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ا.بالاەۆانىڭ قۇتتىقتاۋ ءسوزى وقىلدى.
« ۇلى دالانىڭ وركەنيەتتىك مۇراسىن زەرتتەۋگە جانە حالىقارالىق عىلىمي ىنتىماقتاستىقتى دامىتۋعا ەلەۋلى ۇلەس قوساتىنىنا سەنىم ءبىلدىرىپ, « ۇلى دالا: تۇران وركەنيەتى» حالىقارالىق زەرتتەۋ ورتالىعىنىڭ اشىلۋى وتاندىق گۋمانيتارلىق عىلىمنىڭ جاڭا كەزەڭىن ايقىندايتىن ماڭىزدى وقيعا ەكەنىن جەتكىزدى. بۇل باستاما العاش رەت 2025 جىلدىڭ جەلتوقسانىندا اكادەميكتەرمەن وتكەن كەزدەسۋدە ۇسىنىلىپ, قىسقا ۋاقىت ىشىندە حالىقارالىق زەرتتەۋ ورتالىعىنا اينالىپ وتىر» دەلىنگەن قۇتتىقتاۋدا.
پرەزيدەنت جانىنداعى ۇلتتىق عىلىم اكادەمياسىنىڭ پرەزيدەنتى ا.كۇرىشباەۆتىڭ ايتۋىنشا, جاڭا كونستيتۋتسيانىڭ پرەامبۋلاسىنداعى ء«بىز, ءبىرتۇتاس قازاقستان حالقى, بايىرعى قازاق جەرىندە مەملەكەتتىلىكتى نىعايتا وتىرىپ, ۇلى دالانىڭ مىڭداعان جىلدىق تاريحىنىڭ ساباقتاستىعىن ساقتاپ...» دەگەن سوزدەر مەملەكەتىمىزدىڭ تەرەڭ تاريحي جانە وركەنيەتتىك نەگىزىن ايقىندايدى.
استانادا ساراپشىلار جەردىڭ توزۋىن تەجەيتىن عىلىمي تاسىلدەردى تالقىلادى
الەمدىك تاجىريبەدە تيىمدىلىگى دالەلدەنگەن كونفۋتسي, گەتە جانە يۋنۋس ەمرە ينستيتۋتتارىن مىسالعا كەلتىرە وتىرىپ, ورتالىق ءۇش دەڭگەيلى مودەل نەگىزىندە جۇمىس ىستەيتىنىن اتاپ ءوتتى.
«ۇلتتىق عىلىم اكادەمياسى باسقاراتىن ورتالىق عىلىمي حاب, ەل ىشىندەگى ۋنيۆەرسيتەتتەر مەن عىلىمي ۇيىمداردى بىرىكتىرەتىن ۇلتتىق جەلى, سونداي-اق شەتەلدىك الاڭداردا قۇرىلاتىن «تۇران ورتالىقتارى» مەن «تۇران كافەدرالارى». سونىمەن قاتار ول «Turan Civilization Digital Atlas» پلاتفورماسى, تسيفرلىق ارحيۆتەر مەن جاڭا ءبىلىم بەرۋ باعدارلامالارى ارقىلى GIS, جاساندى ينتەللەكت جانە ينتەراكتيۆتى كارتوگرافيانى گۋمانيتارلىق زەرتتەۋلەرگە ەنگىزۋ كوزدەلەتىنىن, بۇل عىلىمي ناتيجەلەردىڭ كەڭ قولجەتىمدىلىگىن قامتاماسىز ەتەتىنىن اتاپ ءوتتى. بۇل باستاما قازاقستاننىڭ حالىقارالىق گۋمانيتارلىق بەدەلىن ارتتىرىپ, ۇلى دالا وركەنيەتىن جاھاندىق عىلىمي كەڭىستىكتە تانىمال برەندكە اينالدىرۋ ارقىلى ەلدىڭ زياتكەرلىك ءيميدجىن نىعايتادى» دەدى ۇعا پرەزيدەنتى.
«ورتالىقتىڭ قۇرىلۋى – ۇلى دالانى تۇتاس وركەنيەتتىك كەڭىستىك رەتىندە عىلىمي تۇرعىدان زەردەلەۋگە, ورتالىق ەۋرازيانىڭ تاريحي-مادەني مۇراسىن جاڭاشا پايىمداۋعا جانە زاماناۋي تەحنولوگيالاردى گۋمانيتارلىق زەرتتەۋلەرمەن ۇشتاستىرۋعا باعىتتالعان ماڭىزدى قادام. اتالعان باستاما عىلىم, ءبىلىم جانە ساراپتامالىق قىزمەتتىڭ ءوزارا ىقپالداسۋىن كۇشەيتىپ, وتاندىق عىلىمنىڭ دامۋىنا جاڭا سەرپىن بەرەدى» دەدى عىلىم جانە جوعارى ءبىلىم ءمينيسترى س.نۇربەك.
ءىس-شاراعا قىرعىزستان, وزبەكستان, تۇرىكمەنستان رەسپۋبليكاسى, تۇركيانىڭ كونسۋلدارى مەن ديپلوماتيالىق وكىلدەرى, سونداي-اق حالىقارالىق ۇيىمداردىڭ وكىلدەرى, جوعارى وقۋ ورىندارى مەن عىلىمي ۇيىمداردىڭ باسشىلارى, اكادەميكتەر مەن جەتەكشى ساراپشىلار قاتىستى.
ەلىمىزدە عىلىم قالاشىقتارى مەن عىلىمي-تەحنولوگيالىق پاركتەر قۇرىلادى
عالىمدار ۇلى دالانى تۇتاس وركەنيەتتىك ايماق رەتىندە پانارالىق تۇرعىدان زەرتتەۋ ماسەلەلەرىن تالقىلاپ, «تۇران وركەنيەتى» عىلىمي پاراديگماسىنىڭ ادىسنامالىق نەگىزدەرىن ايقىندادى. ورتالىق ەۋرازيانىڭ تاريحي-مادەني مۇراسىن, وركەنيەتتىك ساباقتاستىقتى, تاريحي جادىنى تسيفرلاندىرۋدى, گۋمانيتارلىق زەرتتەۋلەرگە زاماناۋي تەحنولوگيالاردى ەنگىزۋدى, سونداي-اق عىلىم, ءبىلىم جانە ساراپتامالىق قىزمەتتى ىقپالداستىرۋ ماسەلەسىنە نازار اۋداردى.
الماتى