ەلورداداعى جاقسىلىق ۇشكەمپىروۆ اتىنداعى جەكپە-جەك سارايىندا «كەلەشەك مەكتەپتەرى» جوباسىنا قاتىساتىن 7-8 سىنىپ وقۋشىلارى اراسىندا وتكەن فۋتزالدان رەسپۋبليكالىق تۋرنير مارەسىنە جەتتى. اۋقىمدى جارىس ۇلتتىق مەكتەپ ليگاسىنىڭ رەسمي اشىلۋىمەن تۇسپا-تۇس كەلىپ, ۇلكەن سپورت مەرەكەسىنە ۇلاستى, دەپ جازادى Egemen.kz.
جۇلدەگەرلەردى ماراپاتتاۋ راسىمىنە وقۋ-اعارتۋ ءمينيسترى جۇلدىز سۇلەيمەنوۆا قاتىسىپ, جاس سپورتشىلارعا ىزگى تىلەگىن ءبىلدىردى. شاراعا سونداي-اق قازاقستان فۋتبول فەدەراتسياسىنىڭ پرەزيدەنتى مارات وماروۆ تا قاتىستى.
مينيستر ءوز سوزىندە «كەلەشەك مەكتەپتەرى» جوباسىنىڭ مەملەكەت باسشىسى قاسىم-جومارت توقاەۆتىڭ تاپسىرماسىمەن جۇزەگە اسقان ماڭىزدى باستاما ەكەنىن اتاپ ءوتتى.
«بۇل جوبا – ەل بولاشاعىنا باعىتتالعان ەرەكشە قادام. مەملەكەت باسشىسى سىزدەرگە ۇلكەن سەنىم ارتادى. بۇگىنگى جەڭىمپازداردى شىن جۇرەكتەن قۇتتىقتايمىن. تۋرنير وقۋشىلاردى بىرىكتىرىپ, دوستىقتى نىعايتىپ, كوماندالىق رۋحتى قالىپتاستىرۋعا ىقپال ەتتى», دەدى جۇلدىز سۇلەيمەنوۆا.
«كەلەشەك مەكتەپتەرى» بارلىق مەكتەپتىڭ دامۋىنا نەگىز بولادى
وقۋ-اعارتۋ مينيسترلىگىنىڭ مالىمەتىنشە, جارىستىڭ نەگىزگى ماقساتى – مەكتەپ سپورتىنىڭ دەڭگەيىن كوتەرۋ, سالاۋاتتى ءومىر سالتىن ناسيحاتتاۋ جانە وقۋشىلار ءۇشىن قولجەتىمدى سپورتتىق ورتا قالىپتاستىرۋ. ءۇش كۇنگە سوزىلعان دوداعا ەلىمىزدىڭ ءار وڭىرىنەن كەلگەن 20 كوماندا قاتىستى.
تۋرنير قورىتىندىسى بويىنشا استانا قالاسىنىڭ كومانداسى چەمپيون اتاندى. ەكىنشى ورىندى قىزىلورداداعى «كەلەشەك مەكتەبىنىڭ» كومانداسى يەلەنسە, تۇركىستان قۇراماسى ۇزدىك ۇشتىكتى تۇيىندەدى.
سونىمەن قاتار جارىس بارىسىندا وقۋشىلار «ۇزدىك قاقپاشى», «ۇزدىك شابۋىلشى», «ۇزدىك سۇرمەرگەن» اتالىمدارى بويىنشا ماراپاتتالدى. جاس سپورتشىلاردى تاربيەلەپ جۇرگەن جاتتىقتىرۋشىلاردىڭ ەڭبەگى دە نازاردان تىس قالعان جوق.
«كەلەشەك مەكتەپتەرى»: ەلىمىزدە 217 زاماناۋي ءبىلىم وشاعى اشىلدى
وسىلايشا, «كەلەشەك مەكتەپتەرى» اياسىنداعى تۋرنير جاسوسپىرىمدەر سپورتىنا سەرپىن بەرىپ, ەل وڭىرلەرىنەن كەلگەن وقۋشىلاردىڭ ءوزارا تاجىريبە الماسۋىنا مۇمكىندىك جاسادى.