تايلاند استاناسى — بانگكوكتە بوكس-تان 19 جاسقا دەيىنگى ەرلەر مەن قىزدار اراسىندا حالىقارالىق تۋرنير ءوتىپ جاتىر. Futures Cup دوداسى بەل ورتاسىنان اۋىپ, جەكپە-جەكتەر قىزا ءتۇستى. ەرلەر اراسىندا ارمان ءمىرسابيت گرۋزين شالۆا بەليدزەنى 2-راۋندتا تەحنيكالىق نوكاۋتپەن جەڭىپ, كەلەسى كەزەڭگە ءوتتى. قىزدار اراسىندا جاسمين ابراميان (60 كگ) پولشا بوكسشىسى ماريا گورزەلاننانى 4:1 ەسەبىمەن ەڭسەردى. وكىنىشكە قاراي, 51 كگ سالماقتا سىنعا تۇسكەن ايىم تاڭقىباەۆا وزبەكستاندىق نازوكات ماردونوۆاعا ەسە جىبەردى. مارال تولەپبەرگەن (54 كگ) ۇندىستاندىق دجويشيري دەۆي شيرومنىڭ قارىمىنا توتەپ بەرە الماي, 3-راۋندتا جەكپە-جەك توقتاتىلدى. اسىلاي مۇرات (48 كگ) وزبەكستاندىق مافتۋنا مۋسۋرمونوۆاعا قارسى جەكپە-جەگىندە جارىستان شەتتەتىلدى. وزگە قىز-جىگىتتەر تۋرنيردەگى جەكپە-جەكتەرىن جالعاستىرۋدا. ءدۇبىرلى دودا 15 ناۋرىزدا مارەسىنە جەتەدى.
تۇركيانىڭ انتاليا قالاسىندا سپورتتىق گيمناستيكادان الەم كۋبوگىنىڭ كەزەڭى باستالدى. ەلىمىزدىڭ نامىسىن التى سپورتشى قورعايدى. اتاپ ايتقاندا, پاريج جازعى وليمپياداسىنىڭ كۇمىس جۇلدەگەرى ناريمان قۇربانوۆ, زەينوللا ىدىرىسوۆ, رومان مامەنوۆ, نۇرتان ىدىرىسوۆ, دامەلى مۇقىشەۆا, امينا حاليماردەن دوداعا تۇسەدى.
استانادا سەمسەرلەسۋدەن الەم كۋبوگىنىڭ كەزەڭى وتەدى. ەل سپورتىنىڭ تاريحىندا تۇڭعىش رەت سەمسەرلەسۋدىڭ شپاگا سايىسىنان جاھاندىق دودا 26–29 ناۋرىز ارالىعىندا QAZAQSTAN جەڭىل اتلەتيكا سپورت كەشەنىندە تۇڭلىگىن تۇرەدى. جارىسقا 96 ەلدەن 600-دەن استام سپورتشى قاتىسادى دەپ كۇتىلىپ وتىر. تۋرنيردە جۇلدەلەر ەرلەر, ايەلدەر اراسىندا, سونداي-اق كوماندالىق سا-يىستا ساراپقا سالىنادى. بۇل باسەكە – حالىقارالىق سەمسەرلەسۋ فەدەراتسياسى (FIE) كۇنتىزبەسىنە ەنگەن بەدەلدى دودانىڭ ءبىرى. الەم كۋبوگىنىڭ كەزەڭدەرىن ءاردايىم شۆەيتساريا, گەرمانيا, ءباا, كانادا ەلدەرى جوعارى دەڭگەيدە وتكىزىپ ءجۇر. بيىل دودانى قابىلداۋ قۇرمەتى ەلورداعا بۇيىردى. حالىقارالىق سەمسەرلەسۋ فەدەراتسياسىنىڭ (FIE) الەم كۋبوگىنىڭ ءبىر كەزەڭىن استانادا وتكىزۋ تۋرالى شەشىمى كوپ جايتتى اڭعارتادى. بۇعان دەيىن ورتالىق ازيا ەلدەرىندە سەمسەرلەسۋدەن الەم كۋبوگى تۋرنيرلەرى وتكەن ەمەس. جارىس بارىسىندا ۇلتتىق قۇراما ساپىندا رۋسلان قۇربانوۆ, ەلمير ءالىمجانوۆ, ەرلىك سەرتاي, كيريلل پروحودوۆ, ۆاديم شارلايموۆ سىندى ساڭلاقتار سايىسقا تۇسەدى.