قۇرىلىس كودەكسى: جاڭا قۇجاتقا قانداي قاعيداتتار ەنگىزىلەدى؟

مەملەكەت باسشىسىنىڭ سايلاۋالدى باعدارلاماسىنا سايكەس, ۇكىمەتكە 7 جىل ىشىندە 111 ملن شارشى مەتر تۇرعىن ءۇي سالۋ مىندەتى جۇكتەلگەن. سوڭعى جىلدارى قۇرىلىس قارقىنى ايتارلىقتاي كۇشەيىپ, كورسەتكىشتەر ءۇشىنشى جىل قاتارىنان جوسپاردان اسىپ ءتۇستى.

بيىل ەلىمىزدە 18,5 ملن شارشى مەتر تۇرعىن ءۇي سالىنادى     

2025 جىلدىڭ مامىر ايىندا زاڭناماعا ەنگىزىلگەن وزگەرىستەرگە سايكەس, تۇرعىن ءۇيدى ەسەپكە الۋ جانە ءبولۋ فۋنكتسيالارى اكىمدىكتەردەن «وتباسى بانككە» بەرىلدى. بۇل ينستيتۋت ۇلتتىق دامۋ ينستيتۋتى مارتەبەسىنە يە بولدى.

وتكەن جىلى ازاماتتارعا شامامەن 8 مىڭ جالدامالى تۇرعىن ءۇي جانە 11 مىڭنان استام جەڭىلدىكتى يپوتەكالىق نەسيە بەرىلگەن.

سونىمەن قاتار زاڭنامالىق تۇزەتۋلەر بۇرىن ساتىپ الۋ قۇقىعىنسىز بەرىلگەن جالدامالى تۇرعىن ۇيلەردى جەكەشەلەندىرۋگە مۇمكىندىك بەردى. 2025 جىلى بۇل قۇقىقتى 15 مىڭنان استام ازامات پايدالاندى.

تاعى ءبىر ماڭىزدى قولداۋ شاراسى – جالداۋ تولەمىن سۋبسيديالاۋ. وتكەن جىلى 11 مىڭنان استام ازامات جالداۋ اقىسىنىڭ ءبىر بولىگىن مەملەكەت ەسەبىنەن تولەۋ مۇمكىندىگىنە يە بولدى. بۇل ماقساتقا رەسپۋبليكالىق بيۋدجەتتەن 7,6 ملرد تەڭگە ءبولىندى.

2026 جىلى تۇرعىن ءۇي قۇرىلىسىنا قانشا قارجى بولىنەدى؟

ءمينيستردىڭ ايتۋىنشا, بيىل 1 شىلدەدەن باستاپ جاڭا قۇرىلىس كودەكسى كۇشىنە ەنەدى. قۇجات وسى جىلدىڭ 9 قاڭتارىندا قابىلدانعان.

جاڭا كودەكس شەڭبەرىندە قۇرىلىس ءونىمىنىڭ تولىق ومىرلىك تسيكلىن – جوبالاۋدان باستاپ پايدالانۋعا بەرۋ جانە كادەگە جاراتۋعا دەيىنگى كەزەڭدەردى قامتيتىن جاڭا قاعيدات ەنگىزىلەدى. سونىمەن قاتار قۇرىلىس ساپاسى مەن قاۋىپسىزدىگىن ارتتىرۋعا ەرەكشە نازار اۋدارىلادى.

وسى ماقساتتا ليتسەنزيا يەلەرىنىڭ ەلەكتروندىق ءتىزىلىمى ەنگىزىلىپ, ينجەنەرلەردى سەرتيفيكاتتاۋ كەزەڭ-كەزەڭىمەن جۇزەگە اسىرىلادى.

سونداي-اق حالىقارالىق تالاپتارعا سايكەستەندىرۋ ءۇشىن ۇلتتىق تەحنيكالىق نورمالاۋ ينستيتۋتى قۇرىلادى. جاڭا كودەكس تالاپتارىن ىسكە اسىرۋ ماقساتىندا 138 نورماتيۆتىك قۇقىقتىق اكتىنى جاڭارتۋ جۇمىستارى جۇرگىزىلىپ جاتىر.

قۇرىلىس سالاسىن تسيفرلاندىرۋ باعىتىندا دا بىرقاتار ماڭىزدى جوبا قولعا الىنعان. سونىڭ ءبىرى – Qportal.kz بىرىڭعاي قۇرىلىس پورتالى. بۇل جۇيە قۇرىلىس سالاسىنداعى جوسپارلاۋ, ساراپتاما جانە مونيتورينگتىڭ ءتۇرلى اقپاراتتىق جۇيەلەرىن بىرىكتىرەدى.

سونىمەن بىرگە مەملەكەتتىك قالا قۇرىلىسى كاداسترىنىڭ اۆتوماتتاندىرىلعان اقپاراتتىق جۇيەسى ەنگىزىلدى. قازىرگى ۋاقىتتا بۇل جۇيە ەلدەگى 89 قالانىڭ قالا قۇرىلىسى جوبالارىن, ونىڭ ىشىندە 89 باس جوسپار مەن 644 ەگجەي-تەگجەيلى جوسپارلاۋ جوباسىن قامتيدى. بۇدان بولەك, ينجەنەرلىك ينفراقۇرىلىمنىڭ 94% وسى جۇيەگە ەنگىزىلگەن.

جۇيە ارقىلى اكىمدىكتەر باستاپقى رۇقسات بەرۋ قۇجاتتارى, ەسكيزدىك جوبالاردى كەلىسۋ جانە تەحنيكالىق شارتتار بەرۋ سياقتى 146 مىڭنان استام مەملەكەتتىك قىزمەت كورسەتكەن.

بۇدان بولەك, سالالىق پورتال ارقىلى BIM-تەحنولوگيالار ەنگىزىلىپ, قۇرىلىس نىساندارىنىڭ ەلەكتروندىق 3D-مودەلدەرىمەن جۇمىس ىستەۋگە مۇمكىندىك جاسالعان.

ال 2026 جىلدىڭ ءبىرىنشى توقسانىندا پيلوتتىق رەجيمدە جوبالىق قۇجاتتامانىڭ تولىقتىعىن اۆتوماتتى تۇردە تەكسەرۋ ءۇشىن جاساندى ينتەللەكت قولدانۋ جوسپارلانىپ وتىر.

ولجاس بەكتەنوۆ: اۋىلدىق جەرلەردەگى تۇرعىن ءۇي قۇرىلىسىنا كوڭىل ءبولۋ كەرەك

ءمينيستردىڭ ايتۋىنشا, بۇل وزگەرىستەر قۇرىلىس سالاسىنىڭ اشىقتىعىن ارتتىرىپ, ساپانى كۇشەيتۋگە مۇمكىندىك بەرەدى.

«قۇرىلىس كودەكسى ارقىلى بەكىتىلگەن جاڭا تاسىلدەردى ەنگىزۋ, پروتسەستەردى تسيفرلاندىرۋ, باقىلاۋدى كۇشەيتۋ جانە نورماتيۆتىك بازانى جاڭارتۋ تۇرعىن ءۇي قۇرىلىسىنىڭ تۇراقتى, قاۋىپسىز ءارى اشىق دامۋىنا بەرىك نەگىز قالايدى», دەدى ونەركاسىپ جانە قۇرىلىس ءمينيسترى ەرسايىن ناعاسپاەۆ.