ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ ەقىۇ/دياقب رەفەرەندۋمدى باعالاۋ ميسسياسىنىڭ باسشىسى دۋگلاس بريۋس ۋەيكپەن كەزدەستى. جۇزدەسۋدە ەلدەگى جالپىۇلتتىق ناۋقانعا دايىندىق بارىسى, سايلاۋ ۇدەرىسىنىڭ اشىقتىعى مەن قولجەتىمدىلىگى ءسوز بولدى.
اۋماقتىق جانە ۋچاسكەلىك رەفەرەندۋم كوميسسيالارى رەفەرەندۋمدى وتكىزۋ بارىسىندا اشىقتىققا, زاڭدىلىققا جانە بارلىق ازاماتقا تەڭ جاعداي جاسايدى. كەزدەسۋدە نۇرلان ءابدىروۆ ناۋقانعا دايىندىق بارىسى مەن وتكىزۋ ۇلتتىق سايلاۋ زاڭناماسىنا ءارى بەكىتىلگەن كۇنتىزبەلىك جوسپارعا سايكەس ەگجەي-تەگجەي جۇرگىزىلىپ جاتقانىن ايتتى.
– قولجەتىمدىلىكتى قامتاماسىز ەتۋ ماسەلەلەرى – تۇراقتى باقىلاۋدا. بۇل ورتالىق سايلاۋ كوميسسياسى جانىنداعى مۇگەدەكتىگى بار ادامداردىڭ سايلاۋ قۇقىقتارىن قامتاماسىز ەتۋ جونىندەگى جۇمىس توبىنىڭ وتىرىستارىندا جۇيەلى تۇردە قارالادى. ۇەۇ-نىڭ قاتىسۋىمەن سايلاۋ ۋچاسكەلەرىن مونيتورينگتەۋدەن باستاپ, كوميسسيا مۇشەلەرىن دايارلاۋعا جانە زاماناۋي تەحنولوگيالىق شەشىمدەردى ەنگىزۋگە دەيىنگى كەشەندى شارالار جۇزەگە اسىرىلىپ كەلەدى. سونىمەن قاتار قولدانىلاتىن بارلىق قۇرال مىندەتتى ساراپتامادان ءوتىپ, بەلگىلەنگەن تالاپتارعا سايكەستىگى قامتاماسىز ەتىلەدى, – دەدى ن.ءابدىروۆ.
رەفەرەندۋم ۋچاسكەلەرىندە برايل قارپىمەن جازىلعان داۋىس بەرۋگە ارنالعان بيۋللەتەن ترافارەتتەرى, سونداي-اق اربا پايدالاناتىن ازاماتتار ءۇشىن ىڭعايلى بيىكتىكتە ورنالاستىرىلعان, ۇلكەن قارىپپەن جازىلعان اقپاراتتىق ستەندتەر قاراستىرىلعان. قازىرگى ناۋقاننىڭ ەرەكشەلىگى ءاربىر رەفەرەندۋم ۋچاسكەسىندە جاڭا كونستيتۋتسيانىڭ جوباسى ماتىندىك نۇسقاسىمەن قاتار اۋديو فورماتتا دا قولجەتىمدى بولادى.
تۇرعىنداردى اقپاراتتاندىرۋ ءتۇرلى كوممۋنيكاتسيا ارنالارى ارقىلى جۇزەگە اسىرىلىپ جاتىر. ازاماتتارعا رەفەرەندۋم تۋرالى اقپارات قامتىلعان QR كودى بار دەربەس شاقىرۋ بيلەتتەرى تابىستالۋدا. داۋىس بەرۋ كۇنى ازاماتتاردىڭ داۋىس بەرۋشىلەر تىزىمىندە بار-جوعىن تەكسەرۋ, ۋاقىتشا تىركەۋ بويىنشا ەكى ونلاين-سەرۆيس جۇمىس ىستەيدى.
بۇگىندە 5 مەملەكەت, 3 حالىقارالىق ۇيىمنان 21 بايقاۋشى اككرەديتتەلدى. بۇعان قوسا تاعى 15 مەملەكەت جانە حالىقارالىق ۇيىمدار, سونىڭ ىشىندە تۇركى مەملەكەتتەرى ۇيىمى, شانحاي ىنتىماقتاستىق ۇيىمى, تاۋەلسىز مەملەكەتتەر دوستاستىعى پارلامەنتارالىق اسسامبلەياسى, تۇركى اكادەمياسى وزدەرىنىڭ اككرەديتاتسيالاۋ تۋرالى وتىنىمدەرىن جولدادى.
كەزدەسۋ قورىتىندىسىندا دۋگلاس بريۋس ۋەيك نۇرلان ابدىروۆكە ۇسىنىلعان تولىق اقپارات ءۇشىن العىس ءبىلدىرىپ, ميسسيانىڭ الداعى جۇمىس جوسپارى تۋرالى مالىمەت بەردى.