اقش پرەزيدەنتى دونالد ترامپ يرانعا قارسى اسكەري وپەراتسيانىڭ سەبەپتەرىن ءتۇسىندىردى. ونىڭ ايتۋىنشا, يراننىڭ ارەكەتتەرى امەريكاعا, شەتەلدەگى امەريكالىق اسكەريلەرگە جانە وداقتاستارعا قاۋىپ توندىرگەن. ترامپ يران يادرولىق قارۋعا يە بولماۋى ءتيىس ەكەنىن ايتىپ, اقش بۇل ماقساتقا جەتۋ ءۇشىن قاتاڭ شارالار قابىلدايتىنىن مالىمدەدى, دەپ حابارلايدى Egemen.kz.
Telegram ارنالارىنىڭ جازۋىنشا, يران 47 جىل بويى امەريكاعا قارسى ۇران ايتىپ, تاياۋ شىعىستا ءتۇرلى قارۋلى توپتاردى قولداپ وتىرعان. دونالد ترامپ 1983 جىلى ليۆان استاناسى بەيرۋتتە امەريكالىق اسكەريلەرگە جاسالعان شابۋىلدى جانە سوڭعى جىلدارى ايماقتا اقش كۇشتەرىنە قارسى بولعان كوپتەگەن شابۋىلداردى ەسكە الدى. سونداي-اق يران قولدايتىن حاماس-تىڭ 7 قازاندا يزرايلگە جاساعان شابۋىلىن مىسالعا كەلتىردى.
پرەزيدەنتتىڭ سوزىنشە, باستى قاۋىپ – يراننىڭ يادرولىق باعدارلاماسى مەن الىس قاشىقتىققا ۇشاتىن زىمىراندار جاساۋ ارەكەتى. ونىڭ پىكىرىنشە, مۇنداي قارۋ بولاشاقتا اقش-تىڭ وداقتاستارىنا عانا ەمەس, ءتىپتى امەريكا اۋماعىنا دا قاۋىپ ءتوندىرۋى مۇمكىن.
ترامپ يران ەشقاشان يادرولىق قارۋعا يە بولماۋى كەرەك ايتتى. ول اقش يراننىڭ زىمىران ءوندىرىسىن السىرەتىپ, اسكەري الەۋەتىنە سوققى بەرەتىنىن جەتكىزدى.
ء«بىز يراننىڭ يادرولىق قارۋعا يە بولۋىنا جول بەرمەيمىز. بۇل – وتە قاراپايىم ۇندەۋ. ولار ەشقاشان يادرولىق قارۋعا قول جەتكىزبەيدى», دەپ قوستى ول.
سونىمەن قاتار, وتكەن جىلى يراننىڭ يادرولىق نىساندارىنا جاسالعان شابۋىلدان كەيىن دە تەگەران يادرولىق باعدارلاماسىنان باس تارتپاعانىن اتاپ ءوتتى. ونىڭ سوزىنشە, اقش بۇل جولى ءوز قاۋىپسىزدىگىن قامتاماسىز ەتۋ ءۇشىن باتىل ارەكەت جاساپ وتىر.
ايتا كەتەيىك, يزرايل 28 اقپان, سەنبى كۇنى تاڭەرتەڭ يرانعا الدىن الا سوققى جاسادى. شابۋىلدى ەلدىڭ قورعانىس مينيسترى يسراەل كاتس راستادى. تەگەران قالاسىندا كەمىندە ءۇش جارىلىس بولدى.
سونداي-اق Air Astana اۋە كومپانياسى 28 اقپاننان باستاپ تاياۋ شىعىس باعىتىنداعى بارلىق رەيستەردىڭ توقتاتىلعانىن مالىمدەدى.