تبيليسي قالاسىندا قازاقستاندا سينتەتيكالىق ەسىرتكى ءوندىرىسىن ۇيىمداستىردى دەگەن كۇدىككە ىلىنگەن ەرلى-زايىپتى ۇستالدى. وپەراتسيا ىشكى ىستەر مينيسترلىگى مەن گرۋزيا قۇقىق قورعاۋ ورگاندارىنىڭ بىرلەسكەن جۇمىسى اياسىندا جۇرگىزىلگەن, دەپ حابارلايدى Egemen.kz.
ۆەدومستۆو مالىمەتىنشە, 2026 جىلدىڭ ناۋرىز ايىنان بەرى گرۋزيا اۋماعىندا قازاقستان قۇقىق قورعاۋ ورگاندارى ىزدەگەن 15 ادام قولعا تۇسكەن.
تەرگەۋ نۇسقاسى بويىنشا, كۇدىكتى ەر ادام 2023 جىلدىڭ قازانىنان 2024 جىلدىڭ اقپانىنا دەيىن سىبايلاستارىمەن بىرگە الماتى وبلىسى اۋماعىندا ورنالاسقان جاسىرىن زەرتحانادا مەفەدرون ءوندىرىسىن ۇيىمداستىرىپ, حيميك قىزمەتىن اتقارعان.
ونىڭ جۇبايى دا تبيليسيدە ۇستالعان. تەرگەۋ دەرەگىنە سايكەس, ايەل ادام زاڭسىز ەسىرتكى ءوندىرىسىنىڭ قارجىلىق وپەراتسيالارىنا جاۋاپ بەرگەن. بۇل قىزمەت الماتى وبلىسى مەن قاراعاندى وبلىسى اۋماعىندا جۇرگىزىلگەن.
اسا ءىرى مولشەردە قاراجات جىمقىرعان قازاقستان ازاماتى گرۋزيادان ەكستراديتسيالاندى.
قازىرگى ۋاقىتتا ۇستالعانداردى قازاقستانعا ەكستراديتسيالاۋ ماسەلەسى قاراستىرىلىپ جاتىر.
ايتا كەتەيىك, بۇعان دەيىن قازاقستاننىڭ ىشكى ىستەر ءمينيسترى ەرجان سادەنوۆ تبيليسيگە جۇمىس ساپارىمەن بارعان بولاتىن. ساپار بارىسىندا ول گرۋزيا ءىىم باسشىسى سۋلحان تامازاشۆيلي جانە گرۋزيا پرەمەر-ءمينيسترى يراكلي كوباحيدزەمەن كەزدەسكەن.
كەلىسسوزدەر بارىسىندا تاراپتار ۇيىمداسقان قىلمىس, ەسىرتكى ساۋداسى, زاڭسىز كوشى-قون, حالىقارالىق ىزدەۋ جانە كيبەرالاياقتىقپەن كۇرەس ماسەلەلەرىن تالقىلادى.
ەسكە سالايىق, كولىك ساتامىن دەپ حالىقتى الداعان الاياق رەسەيدەن ەكستراديتسيالاندى.