ورالدا تۇڭعىش رەت قىسقى سپورت تۇرلەرىنەن جالپىحالىقتىق فەستيۆال ءوتتى

ەكى كۇنگە سوزىلعان فەستيۆال جوعارى دەڭگەيدە ۇيىمداستىرىلىپ, وبلىس تاريحىنداعى ايتۋلى سپورتتىق وقيعالاردىڭ بىرىنە اينالدى. فەستيۆال اياسىندا ۇلتتىق, ەكسترەمالدىق جانە ءداستۇرلى قىسقى سپورت تۇرلەرى بارىنشا قامتىلدى. اتاپ ايتقاندا, تازى جارىسى, جامبى اتۋ, اۆتودريفت, ەرلەر مەن ايەلدەر اراسىنداعى شاڭعى جارىسى, بالالارعا ارنالعان سىرعاناۋ, كونكي تەبۋ, كەرلينگ, قىسقى باسكەتبول جانە وزگە دە سپورت تۇرلەرى كوپشىلىك نازارىنا ۇسىنىلدى. سونىڭ ىشىندە ورال وڭىرىندە بۇرىن-سوڭدى ۇيىمداستىرىلماعان تىڭ باعىت – شاڭعىمەن جامبى اتۋ سايىسى دا قىزىقتى ءوتتى.

فەستيۆال اياسىندا قۇسبەگىلىكتەن ەرەسەكتەر اراسىنداعى قازاقستان رەسپۋبليكاسىنىڭ XIX چەمپيوناتى ءوتتى. وعان ەلىمىزدىڭ بارلىق وڭىرىنەن كەلگەن 70-كە جۋىق سايىپقىران قاتىستى. يتەلىگى مەن بۇركىت, قىران مەن قارشىعا باپتاعان قۇسبەگىلەر وسى فەستيۆالدىڭ كوركىنە اينالدى. اقجايىق تورىندە ۇلتتىق سايات ونەرىنىڭ تۋى جەلبىرەدى.

چەمپيوناتتىڭ اشىلۋ سالتاناتىنا قۇسبەگىلىك فەدەراتسياسىنىڭ ۆيتسە-پرەزيدەنتى, وسى سالاعا 30 جىلعا جۋىق عۇمىرىن ارناعان ەتنوگراف باعدات مۇپتەكەقىزى, قۇسبەگىلىكتەن اعا جاتتىقتىرۋشى, فەدەراتسيانىڭ اتقارۋشى ديرەكتورى بازاربەك كۇنتۋعان سىندى ماماندار ارنايى كەلدى. مەيماندارعا باتىس قازاقستان وبلىسى دەنە شىنىقتىرۋ جانە سپورت باسقارماسىنىڭ باسشىسى باقداۋلەت ءسابيتوۆ لايىقتى قۇرمەت كورسەتتى.

العاشقى كۇنى فەستيۆالگە 1000-عا جۋىق قاتىسۋشى تىركەلسە, ەكىنشى كۇنى بۇل كورسەتكىش 4000-نان اسىپ كەتتى. ءبۇلدىرشىن بالادان اقساقال قارياعا دەيىن كەلىپ, سپورت الاڭىنا شىعىپ, قىسقى دۋماننىڭ قىزىعىنا بولەندى. ايرىقشا اتاپ وتەرلىگى, فەستيۆال اياسىنداعى بارلىق سپورت تۇرلەرى قالا تۇرعىندارى ءۇشىن تەگىن ۇيىمداستىرىلدى. بۇل – بۇقارالىق سپورتتى دامىتۋعا, سالاۋاتتى ءومىر سالتىن ناسيحاتتاۋعا باعىتتالعان يگى باستاما بولدى.

سونىمەن, فەستيۆال اياسىندا وتكەن كەرلينگ سايىسىنان گۇلجانات تولەگەن مەن ارمان كەنشەلەكوۆ جۇلدەگەر اتاندى. تازىلار سايىسىندا ەلدار بەگاليەۆتىڭ «كوكجالى» - 1 ورىن السا, جومارت عاپپاروۆتىڭ «ايقاسى» - ەكىنشى, ايبولات تولەگەنوۆتىڭ «سىرتتانى» - ءۇشىنشى ورىنعا لايىق دەپ تانىلدى. ءداستۇرلى ساداق اتۋدان اسەمگۇل عالىمجانوۆا مەن رۋستام امانعاليەۆ ۇزدىك مەرگەن اتاندى. جامبى اتۋ سايىسىنان ارمان جۋلكاليەۆتىڭ جەبەسى نىسانانى ج ۇلىپ ءتۇستى. شاڭعى جارىسىندا 8 جاستاعى قازبولات ەرمانوۆ «ەڭ جاس قاتىسۋشى» اتانسا, بەكەت قۇرمانعازى «ەڭ ۇزدىك تەحنيكا» يەسى اتاندى.

«Oral Winter Fest – 2026» – ۇلتتىق ءداستۇر مەن زاماناۋي سپورتتى ۇشتاستىرعان, قىسقى سپورت مادەنيەتىن جاڭا بەلەسكە كوتەرگەن تاعىلىمدى شارا رەتىندە ەل جادىندا قالارى ءسوزسىز. بۇل فەستيۆال – بىرلىك پەن بەلسەندىلىكتىڭ, سەرگەكتىك پەن سەرپىننىڭ سيمۆولىنا اينالدى. ءارى وڭىردە قىسقى سپورت تۇرلەرىن دامىتۋعا سەرپىن بەرىپ, جاس سپورتشىلاردىڭ شەبەرلىگىن شىڭداۋعا ۇلكەن مۇمكىندىك اشتى», دەيدى باتىس قازاقستان وبلىسى دەنە شىنىقتىرۋ جانە سپورت باسقارماسىنىڭ باسشىسى باقداۋلەت ءسابيتوۆ.