سەنات دەپۋتاتتارى استانا, الماتى, شىمكەنت قالالارىندا جۇرتشىلىقپەن جۇزدەسىپ, جاڭا اتا زاڭ جوباسىنداعى باسىمدىقتار مەن نەگىزگى وزگەرىستەردى كەڭىنەن ءتۇسىندىردى.
سەنات دەپۋتاتى ەۆگەني بولگەرت قازاقستاننىڭ نەمىس جاستارى وداعىنىڭ اكتيۆىمەن كەزدەسىپ, جاستارمەن اشىق اڭگىمە ءوربىتتى. جاڭا كونستيتۋتسيا جوباسىنىڭ ەرەجەلەرى, پارلامەنتتىك رەفورمانىڭ نەگىزگى باعىتتارى, ونىڭ ىشىندە پارلامەنتتىڭ ءبىر پالاتالى ۇلگىسىنە كوشۋ تاقىرىبىنا توقتالدى. سەناتور قاتىسۋشىلارعا بيلىك تارماقتارى اراسىندا وكىلەتتىكتەردى قايتا ءبولۋ, پارلامەنتتىڭ مەملەكەتتىك باسقارۋ جۇيەسىندەگى ءرولىن كۇشەيتۋ, پارلامەنتتىك باقىلاۋ تەتىكتەرىن دامىتۋ, سونداي-اق زاڭ شىعارۋ ۇدەرىسىندە وڭىرلەردىڭ وكىلدىگىن كەڭەيتۋ تۋرالى جان-جاقتى ايتىپ بەردى.
سەناتور ساكەن ارۋباەۆ جامبىل وبلىسى قاراتاۋ قالاسىنىڭ تۇرعىندارىمەن, «Talas Investment Company», «شولاقتاۋ» تاۋ-كەن بايىتۋ كەشەنى, «قازفوسفات» جشس ۇجىمدارىمەن, سونداي-اق №3 ارناۋلى الەۋمەتتىك قىزمەتتەر ورتالىعىنىڭ قىزمەتكەرلەرىمەن كەزدەستى. س.ارۋباەۆ ۇسىنىلعان وزگەرىستەر ادام قۇقىقتارى مەن بوستاندىقتارىنىڭ كەپىلدىگىن نىعايتۋعا, مەملەكەتتىك ينستيتۋتتاردىڭ جاۋاپكەرشىلىگىن ارتتىرۋعا, ادىلدىك پەن پروگرەسس قاعيداتتارىنا نەگىزدەلگەن جاڭا قوعامدىق شارتتى قالىپتاستىرۋعا باعىتتالعانىن ايتتى.
دەپۋتات رۋسلان رۇستەموۆ قىزىلوردا وبلىسىندا يساتاي ابدىكارىموۆ اتىنداعى جوعارى پوليتەحنيكالىق كوللەدج ۇجىمىمەن جۇزدەستى. ول قاتىسۋشىلارعا كونستيتۋتسيالىق وزگەرىستەردىڭ لوگيكاسى, قۇجاتتى دايىنداۋ كەزەڭدەرى جانە ونى ازىرلەۋ كەزىندە ەسكەرىلگەن قوعامدىق ۇسىنىستاردىڭ ءرولىن جان-جاقتى ءتۇسىندىردى.
ال سەنات دەپۋتاتى, كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى, كونستيتۋتسيالىق كوميسسيانىڭ جانە جالپىۇلتتىق كواليتسيانىڭ مۇشەسى نۇرلان بەكنازاروۆ جامبىل, تۇركىستان وبلىستارىندا, سونداي-اق شىمكەنت قالاسىندا بولدى. ول جۇمىس ساپارى بارىسىندا تۇرعىندارمەن, عىلىمي جانە مادەني قوعامداستىق وكىلدەرىمەن, ەڭبەك ۇجىمدارىمەن, ستۋدەنت جاستارمەن كەزدەسۋلەر وتكىزدى.
«جاڭا نەگىزگى زاڭدا جالپىۇلتتىق باعدارلار مەن ۇرپاقتار ساباقتاستىعىن كورسەتەتىن جاڭا كىرىسپەدەن باستاپ ءسوز بوستاندىعىن, عىلىمي, تەحنيكالىق جانە شىعارماشىلىق قىزمەتتى قامتاماسىز ەتۋگە, زياتكەرلىك مەنشىكتى قورعاۋعا, وتباسى جانە نەكە ينستيتۋتىن نىعايتۋعا باعىتتالعان نورمالارعا دەيىنگى زاماناۋي جانە ىرگەلى قۇندىلىقتار بىردەن بەكىتىلەدى», دەدى ن.بەكنازاروۆ.
دەپۋتات ايگۇل قاپباروۆا دا حالىق كونستيتۋتسياسىنىڭ جوباسىن شىمكەنت تۇرعىندارىمەن بىرگە تالقىلادى. ول تۇران اۋدانىندا قازاقستان حالقى اسسامبلەياسىنىڭ وكىلدەرىمەن, اقجار شاعىن اۋدانىنىڭ تۇرعىندارىمەن, №1 شىمكەنت قالالىق اۋرۋحانا ۇجىمىمەن جانە «اتامەكەن» ۇلتتىق كاسىپكەرلەر پالاتاسى كاسىپكەرلەرىمەن كەزدەستى. سەناتور قوعامدىق كەلىسىمدى كونستيتۋتسيالىق بەكىتۋ, ەتنوسارالىق تۇراقتىلىقتى ساقتاۋ جانە ۇلتتىق بىرلىكتى نىعايتۋ ماسەلەلەرىن ەرەكشە اتاپ ءوتتى.
وڭىرلەردەگى مۇنداي كەزدەسۋلەر كونستيتۋتسيالىق قايتا قۇرۋدىڭ ءمانىن تەرەڭىرەك تۇسىنۋگە ىقپال ەتىپ, جاڭا كونستيتۋتسيا جوباسىن بۇكىلحالىقتىق تالقىلاۋ كەزەڭىندە قوعام مەن بيلىك وكىلدەرى اراسىنداعى ءوزارا ءىس-قيمىلدى نىعايتادى.