ورىس ساحناسىندا ونەر كورسەتىپ, تانىمالدىققا يە بولعان نۇرلان سابۋروۆقا رەسەيگە 50 جىلعا كىرۋگە تىيىم سالىندى. وسى جاعدايعا بايلانىستى ازىلكەش كوپشىلىك الدىندا العاش رەت ءۇن قاتتى. ونەرپاز بۇل ماسەلەمەن زاڭگەرلەر اينالىسىپ جاتقانىن ايتىپ, تەرگەۋ اياقتالعانعا دەيىن ەگجەي-تەگجەيلى تۇسىنىكتەمە بەرۋدەن باس تارتتى, دەپ جازادى Egemen.kz.
ازىلكەشتىڭ مالىمدەمەسى 8 اقپان كۇنى Instagram جەلىسىندەگى پاراقشاسىندا جاريالاندى. ونىڭ سوزىنشە, بارلىق ماسەلە زاڭ اياسىندا شەشىلۋى ءتيىس.
«قالىپتاسقان جاعدايعا قاتىستى پىكىر بىلدىرمەيمىن. بۇل ىسپەن زاڭگەرلەر اينالىسىپ جاتىر, ولار قۇزىرلى ورگاندارمەن ءوز دەڭگەيىندە جۇمىس ىستەيدى. ۋاقىت ءبارىن ءوز ورنىنا قويادى», دەپ جازدى ول.
سونىمەن قاتار نۇرلان سابۋروۆ شىعارماشىلىق جولىنا توقتالىپ, رەسەيدىڭ كاسىبي قالىپتاسۋىنداعى ورنىنا ەرەكشە ءمان بەردى. ايتۋىنشا, ستەنداپتاعى جولى شامامەن 15 جىل بۇرىن ەكاتەرينبۋرگ قالاسىندا باستالىپ, كەيىن ماسكەۋدە جالعاسقان.
«وسى جىلدار ىشىندە رەسەيدىڭ كوپتەگەن قالاسىندا بولدىم, كەيبىرىنە بىرنەشە مارتە باردىم. بارلىق جەردە مەنى جىلى قابىلدادى. شىعارماشىلىق دامۋعا مۇمكىندىك بەرگەن, ونەر ادامى رەتىندە قالىپتاسۋىما جول اشقان ەلگە العىسىم شەكسىز. رەسەيدە دە, ودان تىس جەرلەردە دە كوپۇلتتى اۋديتوريام قالىپتاستى», دەدى ول.
اۋىل ازىلكەشتەرى ەسىڭىزدە مە؟
مالىمدەمەسىنىڭ سوڭىندا نۇرلان سابۋروۆ كورەرمەندەرىنە العىس ايتىپ, جۋرناليستەر مەن بلوگەرلەرگە وتباسىنا قاتىستى تاقىرىپتاردى قوزعاماۋدى ءوتىندى.
«جۋرناليستەرگە, بلوگەرلەرگە جانە باق وكىلدەرىنە جەكە ءوتىنىشىم بار: وتباسىمنىڭ – جۇبايىم مەن بالالارىمنىڭ, اتا-انام مەن جاقىندارىمنىڭ جەكە ومىرىنە قۇرمەتپەن قاراۋلارىڭىزدى سۇرايمىن. بارشاڭىزعا اماندىق تىلەيمىن», دەپ تۇيىندەدى ول.
ايتا كەتەيىك, سابۋروۆتىڭ رەسەي اۋماعىندا جالپى قۇنى 60 ملن رۋبلدەن اساتىن مۇلكى بار ەكەنى انىقتالعان. ول رەسەيدە تاپقان قاراجاتىن دەلدالدار ارقىلى «جىلىستاتتى» دەگەن كۇدىككە ىلىنگەن.