سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتىپ, وندا كرەاتيۆتى يندۋستريالاردى قولداۋ جانە دامىتۋ ماسەلەلەرى جونىندەگى زاڭ قارالدى.
دەپۋتاتتار باستاماشى بولعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەاتيۆتى يندۋستريالاردى قولداۋ جانە دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ ۇلتتىق مادەنيەت سالاسىن زامان تالاپتارىنا ساي جاڭعىرتۋدى كوزدەيدى. وتىرىستا اتالىپ وتكەندەي, زاڭدى ماقۇلداۋ مادەنيەت سالاسىنىڭ باسەكەگە قابىلەتتىلىگىن ارتتىرۋعا, سونداي-اق ۇلتتىق مادەني قۇندىلىقتاردى ساقتاۋ مەن ىلگەرىلەتۋگە ىقپال ەتەدى.
«قارالعان زاڭ ەلىمىزدەگى كرەاتيۆتى يندۋستريا سالاسىن رەتتەيتىن زاڭنامانى ودان ءارى جەتىلدىرۋدى كوزدەيدى. اتاپ ايتقاندا, سالانى قولداۋعا باعىتتالعان بىرقاتار جاڭا تەتىكتەر ەنگىزىلىپ وتىر. سونىمەن قاتار وكىلەتتى ورگاننىڭ قۇزىرەتتەرى ناقتىلانىپ, قوسىمشا مىندەتتەر جۇكتەلدى. جالپى, زاڭ ەلىمىزدىڭ كرەاتيۆتى ەكونوميكا سەكتورىنىڭ ودان ءارى دامۋىنا تىڭ سەرپىن بەرەدى دەپ سەنەمىز», دەدى م.اشىمباەۆ.
زاڭ اياسىندا كينەماتوگرافيا ماسەلەلەرى مەن جاستار ساياساتىن رەتتەيتىن سالالىق زاڭدارعا دا قاتىستى وزگەرىستەر ەنگىزىلدى. ماقۇلدانعان زاڭ بىرىڭعاي ساياسات شەڭبەرىندە كرەاتيۆتى يندۋستريالاردى دامىتۋعا, شىعارماشىلىق الەۋەتتى ەكونوميكانىڭ ءبىر بولىگىنە اينالدىرۋعا, مادەني جانە كرەاتيۆتى ونىمدەردىڭ ساپاسى مەن ماعىنالىق تولىقتىعىن ارتتىرۋعا مۇمكىندىك بەرەدى.
بۇل رەتتە جاستاردى شىعارماشىلىق قىزمەتكە تارتۋعا جاردەمدەسۋ, ولاردىڭ وسى سالاداعى باستامالارى مەن جوبالارىن قولداۋ جونىندەگى نورمالار تۋرالى ءسوز بولىپ وتىرعانىن اتاپ وتكەن ءجون.