بيىلعى قاڭتار ايىنان بەرى مەديتسينالىق-الەۋمەتتىك ساراپتاما ء(ماس) شەڭبەرىندە مۇگەدەكتىكتى بەلگىلەۋگە قاتىستى 9,1 مىڭ ءوتىنىم سىرتتاي فورماتتا قارالدى.
بىلتىر سىرتتاي فورماتتا 113,1 مىڭ ءوتىنىم قارالىپ, كۋالاندىرۋدان وتكەن مۇگەدەكتىگى بار ادامداردىڭ 42,5%-ىن قامتىدى. سىرتتاي پرواكتيۆتى كۋالاندىرۋ بىرقاتار نوزولوگيالىق نىساندا قولدانىلادى. ولاردىڭ قاتارىنا ونكولوگيالىق اۋرۋلار, بارلىق لوكاليزاتسياداعى تۋبەركۋلەز, تۋا بىتكەن, سونىمەن قاتار جۇرە پايدا بولعان اناتوميالىق دامۋ كەمىستىكتەرى, پسيحيكالىق اۋرۋلار, بالالارداعى ءبىرىنشى ءتيپتى قانت ديابەتى, بالالارداعى مۋكوپوليساحاريدوز, سونداي-اق اعزا ترانسپلانتاتسياسىنان كەيىنگى جاعدايلار كىرەدى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بىلتىر نوزولوگيالىق نىساندار تىزبەسى ەداۋىر كەڭەيتىلىپ, گيدروتسەفاليا, اياق-قولدىڭ سالدانۋى سياقتى اۋرۋلار ەنگىزىلدى. وسىلايشا, قازىرگى تاڭدا سىرتتاي فورماتتاعى كۋالاندىرۋ 50-دەن استام نوزولوگيالىق نىساندا جۇرگىزىلەدى.
كەزىندە ۇلتتىق قوعامدىق سەنىم كەڭەسىندە مەملەكەت باسشىسى ق.توقاەۆ ەرەكشە قاجەتتىلىكتەرى بار ادامدارعا بارىنشا قولايلى جاعداي جاساۋدى, ولاردى ينستانتسيالارمەن, قاعازباستىلىقپەن اۋرەلەمەي, كورسەتىلەتىن قىزمەتتى بەرۋشىلەردىڭ قىزمەت الۋشىلارمەن بايلانىسىن بولدىرماۋدى تاپسىردى. تاپسىرمانى جۇزەگە اسىرۋ ماقساتىندا ەلىمىزدە مەديتسينالىق-الەۋمەتتىك ساراپتامانىڭ سىرتتاي فورماتى ەنگىزىلدى. بۇل جاعدايدا ءوتىنىش بەرۋشىگە تەك تىركەلگەن جەرىندەگى مەديتسينالىق ۇيىمعا جۇگىنىپ, قاجەتتى تەكسەرۋدەن ءوتۋ جەتكىلىكتى. قۇجاتتاردى جولداۋدان باستاپ ساراپتامالىق شەشىم شىعارۋعا دەيىنگى بارلىق كەيىنگى كەزەڭ ازاماتتىڭ جەكە قاتىسۋىنسىز, اقپاراتتىق جۇيەلەردىڭ ينتەگراتسياسى ارقىلى جۇزەگە اسىرىلادى. مەديتسينالىق قۇجاتتار ۇيىمداردان ءماس بولىمشەلەرىنە ەلەكتروندىق فورماتتا جولدانادى.
سىرتتاي كۋالاندىرۋعا كوشۋ ناتيجەسىندە اكىمشىلىك, بيۋروكراتيالىق كەدەرگىلەردى جويۋدىڭ مۇمكىندىگى ارتادى. ءماس ساراپتامالىق شەشىمدەرىنىڭ اشىقتىعىن قامتاماسىز ەتەدى. مۇگەدەكتىكتى بەلگىلەۋ مەن مۇگەدەكتىگى بار ادامداردى الەۋمەتتىك قورعاۋ شارالارىن انىقتاۋدى ۇيدەن شىقپاي-اق الۋعا مۇمكىندىك بەرەدى. وسىلايشا, سىبايلاس جەمقورلىق تاۋەكەلدەرى ازايادى.