كونستيتۋتسيالىق رەفورما جونىندەگى كوميسسيانىڭ سەگىزىنشى وتىرىسىندا مەملەكەتتىك كەڭەسشىسى ەرلان قارين مازمۇن, ۇستانىم, ماعىنا, جاڭاشىلدىق, تىلدىك نورما جاعىنان قولدانىستاعى كونستيتۋتسيا مەن جاڭا اتا زاڭنىڭ اراسىنداعى ايىرماشىلىق ءبىرشاما ەكەنىن مالىمدەدى, دەپ حابارلايدى Egemen.kz.
ءوز ءسوزىن كونستيتۋتسيالىق كوميسسيا توراعاسىنىڭ ورىنباسارى رەفورماعا قاتىستى ءتۇرلى حات پەن پىكىر كەلىپ تۇسكەنىنەن باستادى.
ونىڭ پىكىرىنشە, جاڭا اتا زاڭنىڭ قاجەتتىلىگىمەن ماڭىزىن كوپشىلىك دۇرىس قابىلداپ جاتىر ەكەن.
قولداۋ كورسەتكەن بارشا ازاماتتارعا كونستيتۋتسيالىق كوميسسيا اتىنان العىس ايتا وتىرىپ, ەرلان قارين وزگە دە پىكىر ايتۋشىلاردىڭ بارىن جەتكىزدى.
«جاڭا كونستيتۋتسيانى اۋرە بوپ قابىلداۋدىڭ قانداي قاجەتى بار ەدى؟» نەمەسە «ەسكى اتا زاڭ قالا بەرسىن» دەيتىن پىكىرلەر دە كەزدەسىپ جاتىر» دەپ ايتا كەلە ول ءاربىر وتىرىستا قوعاممەن كەرى بايلانىس ورناتىپ, تۋىنداپ وتىرعان سۇراقتارعا ۇنەمى ءۇن قاتىپ جۇرگەنىنە نازار اۋداردى.
مىڭجىلدىق تاريحتىڭ ساباقتاستىعى – جاڭا كونستيتۋتسيا جوباسى ايقىنداپ بەرگەن باعدار
بۇل جولى دا مەملكەتتىك حاتشى تۋىنداعان بىرقاتار سۇراقتارعا جاۋاپ بەرىپ, مىسال رەتىندە 1995 جىلى قابىلدانعان قولدانىستاعى كونستيتۋتسيادان ءبىر ءۇزىندى وقىپ بەردى.
«قازىرگى اتا زاڭنىڭ 13-بابى 1-تارماعىندا بىلاي دەپ جازىلعان: «اركىمنىڭ قۇقىق سۋبەكتىسى رەتىندە تانىلۋىنا قۇقىعى بار جانە ءوزىنىڭ قۇقىقتارى مەن بوستاندىقتارىن, قاجەتتى قورعانىستى قوسا العاندا, زاڭعا قايشى كەلمەيتىن بارلىق تاسىلدەرمەن قورعاۋعا حاقىلى». وسىدان نە تۇسىنۋگە بولادى؟», دەپ سۇرادى ول.
ونىڭ پىكىرىنشە, مۇنى بىرنەشە رەت وقىعان ادام دا, تىڭداعان ادام دا ەشتەڭە تۇسىنبەيدى. ال مۇنداي تۇسىنىكسىز سويلەمدەردى, ۇعىنىقسىز سوزدەردى قولدانىستاعى اتاڭ زاڭنىڭ كوپتەگەن باپتارى مەن تارماقتارىنان كەزدەستىرۋگە بولادى.
جاڭا اتا زاڭنىڭ جوباسى: كونستيتۋتسياعا وزگەرىس ەنگىزۋ تەك بۇكىلحالىقتىق رەفەرەندۋم ارقىلى مۇمكىن بولادى
«اسىرا ايتقاندىق ەمەس, بىراق 1995 جىلى قابىلدانعان قولدانىستاعى ەسكى كونستيتۋتسيا مەن جاڭا اتا زاڭنىڭ اراسىنداعى مازمۇندىق, ۇستانىمدىق, ماعىنالىق, جاڭاشىلدىق, تىلدىك, رەداكتسيالىق تۇرعىدان ايىرماشىلىق ءبىرشاما. جاڭا كونستيتۋتسيانى, ونداعى جاڭا ءماتىندى جاس تا, ۇلكەن دە ءتۇسىنىپ, قابىلداي الاتىن بولادى. ەڭ باستىسى – وسى», دەدى ەرلان قارين.
ءسوز سوڭىندا كونستيتۋتسيالىق كوميسسيا توراعاسىنىڭ ورىنباسارى مۇنداي جاڭاشىلدىقتى جان-جاقتى ءتۇسىندىرۋ كەرەكتىگىن ايتا كەلە, ەلدىك ىستەرگە اقىلمەن, سىندارلى كوزقاراسپەن, ناقتى جۇمىسپەن, جاسامپازدىقپەن كىرىسۋ ماڭىزدى ەكەنىن اتاپ ءوتتى.