كەشە قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ توراعالىعىمەن سولتۇستىك قازاقستان وبلىسىنىڭ الەۋمەتتىك سالاسىن دامىتۋ ماسەلەلەرى قارالدى.
كەڭەسكە الەۋمەتتىك بلوكقا جاۋاپتى سالالىق مينيسترلىكتەردىڭ باسشىلىعى, سونداي-اق وبلىس اكىمى عاۋەز نۇرمۇحامبەتوۆ قاتىستى. دەنساۋلىق ساقتاۋ سالاسى بويىنشا اۋرۋلاردىڭ الدىن الۋ مەن ولاردى ەرتە انىقتاۋ باعىتتارىن كۇشەيتۋ, ونىڭ ىشىندە سكرينينگتىك باعدارلامالاردى دامىتۋ, سونداي-اق حالىق ءۇشىن ستوماتولوگيالىق كومەكتىڭ قولجەتىمدىلىگىن ارتتىرۋ ماسەلەلەرى تالقىلاندى.
ءبىلىم سالاسىندا مەكتەپكە دەيىنگى جانە ورتا ءبىلىم بەرۋدىڭ وزەكتى ماسەلەلەرى, پەداگوگ كادرلاردى دايارلاۋ, سونداي-اق بالالاردىڭ قاۋىپسىزدىگىن قامتاماسىز ەتۋ باعىتتارى قارالدى.
ەڭبەك جانە حالىقتى الەۋمەتتىك قورعاۋ مينيسترلىگى باعىتى بويىنشا الەۋمەتتىك سالانىڭ بىرىڭعاي تسيفرلىق پلاتفورماسىنىڭ جۇمىس تيىمدىلىگىنە تالداۋ جاسالدى.
عىلىم جانە جوعارى ءبىلىم ماسەلەلەرى جەكە بلوك رەتىندە قارالىپ, اتاپ ايتقاندا, ءبىلىم بەرۋ تاپسىرىسىن قالىپتاستىرۋ, كادر دايارلاۋدىڭ پراكتيكاعا باعدارلانۋى جانە ەڭبەك نارىعىنىڭ ناقتى سۇرانىسىنا سايكەستىگى ءسوز بولدى.
سونىمەن قاتار وڭىردە بۇقارالىق سپورتتى دامىتۋ, سپورتتىق ينفراقۇرىلىمنىڭ قولجەتىمدىلىگىن ارتتىرۋ جانە تۋريزم سالاسىن دامىتۋ شارالارى تالقىلاندى.
كەڭەس قورىتىندىسى بويىنشا ايدا بالاەۆا بىرقاتار ناقتى تاپسىرما بەردى.