فۋتزالدان قازاقستان ۇلتتىق قۇراماسىندا باس باپكەر اۋىستى. بۇعان دەيىن كوماندانى باسقارعان برازيليالىق مامان پاۋلو ريكاردو فيگەيرو سيلۆا (كاكا) قىزمەتىنەن كەتكەننەن كەيىن, ونىڭ ورنىنا جاڭا باپكەر تاعايىندالدى, دەپ حابارلايدى Egemen.kz.
قازاقستان فۋتزال قۇراماسىنىڭ تىزگىنىن ريكاردو كامارا سوبرال, ياعني كاكاۋ قولعا الدى. 54 جاستاعى تاجىريبەلى مامان قازاقستاندىق جانكۇيەرلەرگە جاقسى تانىس. ول 2013–2018 جىلدار ارالىعىندا ۇلتتىق قۇرامانىڭ باس باپكەرى بولىپ, كوماندامەن بىرگە ايتارلىقتاي جەتىستىكتەرگە قول جەتكىزگەن.
كاكاۋدىڭ جەتەكشىلىگىمەن قازاقستان قۇراماسى 2016 جىلعى ەۋروپا چەمپيوناتىندا قولا جۇلدەگە يە بولىپ, ەل فۋتزالى تاريحىنداعى ماڭىزدى ناتيجەگە قول جەتكىزدى.
كەيىنگى جىلدارى ول يتاليانىڭ "ناپولي", رۋمىنيانىڭ "يۋنايتەد گالاتي" كلۋبتارىندا, سونداي-اق كۋۆەيت, يراك جانە بىرىككەن اراب امىرلىكتەرىنىڭ ۇلتتىق قۇرامالارىندا جۇمىس ىستەدى.
كلۋبتىق دەڭگەيدە كاكاۋ الماتىلىق "قايرات" كومانداسىمەن ۇلكەن تابىسقا جەتتى. ونىڭ باسشىلىعىمەن كلۋب 2013 جانە 2015 جىلدارى فۋتزالدان ۋەفا كۋبوگىن جەڭىپ الدى. سونىمەن قاتار, قازاقستان چەمپيوناتى مەن ەل كۋبوگىن بىرنەشە رەت يەلەندى.