جەڭىسكە باستار جول

كەلەلى كەزدەسۋدە UWW كۇنتىزبەسىندەگى جارىستار قاتارىنا ەلى­مىزدەگى تۋرنيرلەردىڭ ءبىرىن قوسۋ, بۇقارالىق سپورتتى وركەندەتۋدىڭ ماڭىزدى قادامدارى تالقىلاندى. فەدەراتسيا باسشىسى ە.وقاسوۆ الداعى ۋاقىتتا تەك سپورتتىق ناتيجەگە ەمەس, ەلىمىزدى كۇ­رەستىڭ ايماقتىق دامۋى­نا سەر­پىن بەرەتىن, حالىقارالىق ءىس-شارالاردى قابىلداي الاتىن تۇراقتى ورتالىققا اينالدىرۋعا كۇش سالاتىنىن جەتكىزدى. وسى باعىتتاعى بىرقاتار باستامانى اتاپ ءوتتى. سونىڭ ىشىندە UWW-ءدىڭ رەسمي كۇنتىزبەسىنە قازاق جەرىندەگى حالىقارالىق جارىستىڭ ءبىرىن ەنگىزۋ ماسەلەسى قوزعالدى. فەدەراتسيا پرەزيدەنتى ەلىمىزدەگى تۋرنيرلەردىڭ بىرىنە رەيتينگتىك مارتەبە بەرۋ ارقىلى ەلىمىزگە الەمنىڭ ۇزدىك بالۋاندارىن تارتۋعا, باسەكە دەڭگەيىن وسىرۋگە ءارى جارىستاردىڭ حالىقارالىق تارتىمدىلىعىن ارتتىرۋعا بولاتىنىن اتاپ ءوتتى. بۇدان كەيىن سپورتتىق ىنتىماقتاستىقتى عىلىم باعىتىندا كۇشەيتۋ جايى دا ءسوز بولدى. بىرىككەن كۇرەس الەمى ۇيىمىنىڭ باسشىسى نەناد لالوۆيچ استانا قالاسىندا كۇرەس اكادەمياسىنىڭ ىرگەتاسىن قالاۋ, سونداي-اق ونى ورتا ازياداعى حالىقارالىق وقۋ-جاتتىعۋ حابىنا اينالدىرۋ جوباسىن قولدايتىنىن ءبىلدىردى.

مەملەكەت باسشىسى قاسىم-جومارت توقاەۆ 2024 جىلعى پاريج وليمپياداسىنىڭ جۇلدەگەرلەرىمەن كەزدەسۋىندە حالىقارالىق سپورت ۇيىمدارىمەن ارىپتەستىكتى كۇشەيتۋدى, سپورت­شىلارىمىزدىڭ باسەكەگە قابى­لەتتىلىگىن ارتتىرىپ, الەمدىك جارىستاردى وزىمىزدە وتكىزۋگە كۇش سالۋدى تاپسىرعان بولاتىن. وسى تاپسىرمانى ىسكە اسىرۋ ماقساتىندا ەلىمىزگە بەدەلدى حالىقارالىق ۇيىمداردىڭ باسشىلارى ات باسىن بۇرىپ, ءتۇرلى كەلىسسوزدەر جۇرگىزىلدى. مارتەبەلى مەيمانداردىڭ قاتارىندا نەناد لالوۆيچ تە بولدى. بىرىككەن كۇرەس الەمى ۇيىمىنىڭ پرەزيدەنتى استاناداعى سپورت نىساندارىن ارالاپ, ينفراقۇرىلىممەن تانىستى. جاھاندىق دودالاردى وتكىزۋگە قانشالىقتى الەۋەتىمىز جەتەتىنىن باعامدادى.

ەركىن قادىرعالي ۇلى كۇرەس فەدەراتسياسىنىڭ پرەزيدەنتى لاۋازىمىنا بىلتىر جەلتوقسان ايىندا تاعايىندالدى. زور جا­ۋاپكەرشىلىك جۇكتەلگەن مان­ساپتىڭ سالماعى اۋىر. بالۋاندىق ونەر بابامىزدان قانىمىزعا تاراعان دەپ كۇپىنگەنىمىزبەن, گرەك-ريم, ەركىن, ايەلدەر كۇرەسىنەن تاۋەلسىزدىگىمىزدى العان 35 جىلدىڭ ىشىندە وليمپيادا چەمپيو­نى شىققان جوق. جاقسىلىق ۇش­كەمپىروۆ پەن ءشامىل سەرىكوۆتىڭ 46 جىل بۇرىن ماسكەۋ جازعى وليمپياداسىنان ولجالاعان التىن مەدالىن ءالى مەدەت تۇتىپ كەلەمىز. سوندىقتان ارقالار جۇك ءالى دە ءزىلماۋىر.

سپورت تۇرلەرىنىڭ قانشالىقتى وركەندەگەنىنە ولشەم بولار الاڭ – الەم چەمپيوناتى مەن وليمپيا ويىندارى. وكىنىشتىسى, ءبىزدىڭ ەلدىڭ بالۋاندارىنا ءتورت جىلدا اينالىپ كەلەتىن وليمپيادانىڭ التىنى اسۋ بەرمەس اسقارعا اينالىپ تۇر. فەدەراتسيا تىزگىنىن ۇستاعان جاڭا باسشىلىق وسى ولقىلىقتى بۇتىندەي السا – ءۇمىتتىڭ اقتالعانى. حالىقتىڭ كۇتەرى دە, جانكۇيەردىڭ تالابى دا وسى.