اقمولا وبلىسىنداعى «اقكول–ستەپنوگورسك» اۆتوجولىندا اۋا رايىنىڭ قولايسىزدىعى سالدارىنان جولعا شىققان ازامات قيىن جاعدايعا تاپ بولدى. تايعاق جولدا اۆتوكولىك باسقارۋعا كونبەي, جول جيەگىندەگى قارلى جىراعا سىرعىپ كەتكەن. قالىڭ قارعا باتقان كولىك وزدىگىنەن شىعا الماي قالعان, دەپ حابارلايدى Egemen.kz.
ابىروي بولعاندا, كولىك جۇرگىزۋشىگە وسى باعىتپەن اسكەري تاپسىرمانى ورىنداۋ بارىسىندا كەلە جاتقان قازاقستان رەسپۋبليكاسى ۇلتتىق ۇلانىنىڭ 3517 اسكەري ءبولىمىنىڭ قىزمەتشىلەرى كەزىككەن. اسكەري قىزمەتشىلەر جاعدايدى جەدەل باعالاپ, ارنايى اسكەري تەحنيكانىڭ كومەگىمەن كولىكتى قارلى جىرادان شىعارىپ الدى.
ۇلاندىقتاردىڭ ارقاسىندا اۆتوكولىك جولعا شىعارىلىپ, جۇرگىزۋشى ءارى قاراي قوزعالىسىن جالعاستىردى. كومەك العان ازامات اسكەري قىزمەتشىلەرگە العىسىن ءبىلدىردى.
اسكەري ءبولىم باسشىلىعى مۇنداي جاعدايلار ادام ءومىرى مەن قاۋىپسىزدىكتىڭ ماڭىزىن كورسەتەتىنىن اتاپ ءوتتى. سونداي-اق اسكەري قىزمەتشىلەر ءاردايىم حالىققا كومەك كورسەتۋگە دايىن ەكەنىن جەتكىزدى.