نۇرلان سابۋروۆ دۋبايدا وتكەن كونتسەرتىندە ازىلكەشتەردىڭ ساياسي باسشىلىق قىزمەتتەردە بولۋىنا قاتىستى پىكىر ءبىلدىردى. ول ازىلكەشتەردى ساياساتقا ارالاستىرۋ دۇرىس ەمەس دەپ سانايتىنىن ايتتى, دەپ حابارلايدى Egemen.kz.
ەسكە سالا كەتەيىك, بيىل قاڭتار ايىنىڭ سوڭىندا سابۋروۆقا رەسەيگە كىرۋگە 50 جىلعا تىيىم سالىنعان بولاتىن. سودان كەيىن اقپان ايىندا ول ەلگە ورالىپ, قازاقستاندا تۇرىپ جاتىر. دۋبايداعى كەش بارىسىندا ول وزىنە قاتىستى قىزىقتى ۇسىنىس بولعانىن جەتكىزدى.
«ماعان ستەپنوگورسك قالاسىنىڭ اكىمى بولۋدى ۇسىندى. بىراق, مەنىڭشە, ازىلكەشتى ساياسي جەتەكشى ەتىپ قويۋ – ناشار يدەيا. ويتكەنى مەن بارلىق دوستارىمدى لاۋازىمدى قىزمەتتەرگە تاعايىنداپ جىبەرەر ەدىم», دەپ ازىلدەدى سابۋروۆ.
ەسكە سالا كەتەيىك, ىشكى ىستەر ورگاندارى سابۋروۆقا قاتىستى قىلمىستىق ءىس قوزعالماعانىن, بىراق ۇلتتىق قاۋىپسىزدىك كوميتەتى تەكسەرۋ جۇرگىزىپ جاتقانىن حابارلادى.