اقمولا وبلىسىندا كەنە شاققان 17 جاستاعى ءجاسوسپىرىم اۋىر حالدە اۋرۋحاناعا جەتكىزىلدى. قازىرگى ۋاقىتتا ستۋدەنت وبلىستىق بالالار اۋرۋحاناسىنىڭ جانساقتاۋ بولىمىندە جاتىر. دارىگەرلەر وعان الدىن الا «كەنەلىك ۆيرۋستى ەنتسەفاليت» دياگنوزىن قويعان, دەپ حابارلايدى Egemen.kz.
مالىمەتكە سايكەس, كەنە بوزبالانى 16 مامىر كۇنى شاققان. الايدا ونىڭ وتباسى بىردەن دارىگەر كومەگىنە جۇگىنبەي, بولعان جاعداي تۋرالى مەديتسينالىق مەكەمەلەرگە حابارلاماعان. ءبىراز ۋاقىتتان كەيىن ءجاسوسپىرىمنىڭ جاعدايى كۇرت ناشارلاعان.
اقمولا وبلىستىق دەنساۋلىق ساقتاۋ باسقارماسىنىڭ حابارلاۋىنشا, ناۋقاستا سانا دەڭگەيىنىڭ بۇزىلۋى بايقالادى. قازىر وعان بارلىق قاجەتتى تەكسەرۋلەر جۇرگىزىلىپ, ءتيىستى ەم تاعايىندالعان.
بيىلعى ماۋسىم باستالعالى اقمولا وبلىسىندا كەنە شاققاننان كەيىن مەديتسينالىق كومەككە جۇگىنگەندەردىڭ سانى 500-گە جۋىقتاعان. ال بۋراباي جانە ساندىقتاۋ اۋداندارىنىڭ ءۇش تۇرعىنىنان كەنەلىك ەنتسەفاليت دياگنوزى راستالعان.
ايتا كەتەيىك, قازاقستاندا بيىل كۇن جىلىنعالى 7 مىڭنان استام ادامدى كەنە شاققان.