اقش پرەزيدەنتى دونالد ترامپ يرانمەن اراداعى كەلىسسوزدەر بارىسىندا تەگەراننىڭ يادرولىق قارۋدى تەك ازىرلەمەۋگە عانا ەمەس, ونى قانداي دا ءبىر جولمەن ساتىپ الماۋعا دا كەلىسىم بەرگەنىن مالىمدەدى, دەپ حابارلايدى Egemen.kz.
Fox News ارناسىنا بەرگەن سۇحباتىندا ترامپ باستاپقىدا يراننىڭ يادرولىق قارۋ جاساماۋعا عانا ۋادە بەرگەنىن, الايدا كەيىن بۇل تالاپتىڭ كەڭەيتىلگەنىن ايتتى.
– العاشىندا ولار ء«بىز يادرولىق قارۋ جاسامايمىز» دەدى. مەن «ال ەگەر ونى ساتىپ الساڭىزدار شە؟» دەپ سۇرادىم. سوندىقتان كەلىسىمدە ەندى يراننىڭ يادرولىق قارۋدى ازىرلەمەيتىنى دە, ساتىپ المايتىنى دا كورسەتىلگەن. بۇل ۇلكەن ايىرماشىلىق, – دەدى اقش پرەزيدەنتى.
ترامپتىڭ ايتۋىنشا, ۆاشينگتون مەن تەگەران ءتيىمدى كەلىسىمگە قول جەتكىزۋگە جاقىن. الايدا كەلىسسوزدەر ناتيجە بەرمەسە, اقش اسكەري ارەكەتتەرگە قايتا ورالۋى مۇمكىن ەكەنىن ەسكەرتتى.
– ءبىز وتە جاقسى كەلىسىمگە جاقىنداپ قالدىق. ەگەر وعان قول جەتكىزسەك, بۇل تاماشا بولادى. ال ەگەر مامىلە جاسالماسا, اسكەري ۆەدومستۆونىڭ مۇمكىندىكتەرىن قايتا پايدالانامىز, – دەدى اق ءۇي باسشىسى.
سونىمەن قاتار, ترامپ يران تارابىنىڭ كەلىسسوز جۇرگىزۋدە وتە قاتاڭ ۇستانىمدا ەكەنىن اتاپ ءوتتى. ونىڭ سوزىنشە, تاراپتار ءوز ماقساتتارىنا بىرتىندەپ جاقىنداپ كەلەدى.
ەسكە سالايىق, اقش پەن يزرايل بيىل اقپان ايىنىڭ سوڭىندا يران اۋماعىنداعى نىساندارعا سوققى جاساي باستاعان بولاتىن. كەيىن تاراپتار ءساۋىر ايىندا اتىستى توقتاتۋ تۋرالى مالىمدەگەنىمەن, كەلىسسوزدەر ايتارلىقتاي ناتيجە بەرگەن جوق. سوعان قاراماستان, اسكەري قاقتىعىستاردىڭ قايتا جاندانعانى تۋرالى رەسمي اقپارات جاريالانعان جوق.