پرەزيدەنتى قاسىم-جومارت توقاەۆ مادەنيەت جانە ونەر قىزمەتكەرلەرىن ماراپاتتاۋ راسىمىندە استاناداعى م. گوركي اتىنداعى مەملەكەتتىك اكادەميالىق ورىس دراما تەاترىنا ۇلتتىق مارتەبە بەرۋ تۋرالى شەشىم قابىلدانعانىن مالىمدەدى. تەاتر ۇجىمى بۇل جاڭالىقتى وتاندىق مادەنيەتكە كورسەتىلگەن ۇلكەن قۇرمەت پەن شىعارماشىلىق ۇجىمنىڭ كوپجىلدىق ەڭبەگىنە بەرىلگەن جوعارى باعا رەتىندە قابىلداپ, مەملەكەت باسشىسىنا العىس ايتتى, دەپ حابارلايدى Egemen.kz.
بيىل 125 جىلدىق مەرەيتويىن اتاپ ءوتىپ جاتقان تەاتر ەلىمىزدەگى ەڭ كونە مادەني وشاقتاردىڭ ءبىرى سانالادى. ۇجىم وكىلدەرىنىڭ ايتۋىنشا, ۇلتتىق مارتەبە بەرۋ تۋرالى شەشىم تەاتر تاريحىنداعى ماڭىزدى ءارى تاريحي وقيعا بولدى.
تەاتر ديرەكتورى عاني كارىموۆ پرەزيدەنتتىڭ بۇل شەشىمى ۇجىم ءۇشىن ۇلكەن مارتەبە ءارى زور جاۋاپكەرشىلىك ەكەنىن اتاپ ءوتتى. ونىڭ سوزىنشە, بۇل تەاتر قىزمەتكەرلەرىنىڭ ۇزاق جىلدار بويعى ەڭبەگى مەن شىعارماشىلىق ىزدەنىستەرىنىڭ جوعارى باعالانعانىن كورسەتەدى.
پرەزيدەنت تاپسىرماسى: قىزىلوردادا جاڭا دراما تەاترى مەن زاماناۋي كىتاپحانا بوي كوتەرەدى
بۇگىندە تەاتر قازاق دراماتۋرگياسىنىڭ ۇزدىك تۋىندىلارىن ورىس تىلىندە ساحنالاپ, ۇلتتىق مادەنيەتتى ناسيحاتتاۋعا ۇلەس قوسىپ كەلەدى. رەپەرتۋارىندا «شىڭعىس حان», «حان كەنە», «توميريس – ساق پاتشايىمى», ء«اليا», «ساكەن سەيفۋللين» سەكىلدى تاريحي تۇلعالار مەن ۇلتتىق قۇندىلىقتاردى دارىپتەيتىن قويىلىمدار بار.
سونىمەن قاتار تەاتر قازاقستان مادەنيەتىن حالىقارالىق دەڭگەيدە تانىتىپ كەلەدى. ۇجىم SAMGAU فەستيۆالىنىڭ گران-پري جۇلدەسىن جەڭىپ العان, «رەسەيدەگى كەزدەسۋلەر» جانە «التىن ۆيتياز» فەستيۆالدەرىنە قاتىسقان. تەاتر سەربيا, قىتاي, يسپانيا جانە ۆەنگريا ەلدەرىندە گاسترولدىك ساپارلار جاساپ, شەتەلدىك كورەرمەندەردى قازاقستاندىق تەاتر ونەرىمەن تانىستىردى. 2023 جىلى تەاتر UMAI ۇلتتىق سىيلىعىنىڭ «ۇزدىك درامالىق سپەكتاكل» اتالىمىندا جەڭىمپاز اتاندى.
الماتىداعى تەاترلاردىڭ بىرىنە ءاسانالى ءاشىموۆتىڭ ەسىمى بەرىلدى
تەاتر باسشىلىعىنىڭ پىكىرىنشە, ۇلتتىق مارتەبە شىعارماشىلىق مۇمكىندىكتەردى كەڭەيتىپ, حالىقارالىق ارىپتەستىكتى نىعايتۋعا جول اشادى. بولاشاقتا تەاتر قازاقستاندىق دراماتۋرگتەرمەن ىنتىماقتاستىقتى كۇشەيتىپ, جاس تالانتتاردى قولداۋعا جانە قويىلىمداردىڭ ساپاسىن ارتتىرۋعا باسىمدىق بەرمەك. سونداي-اق حالىقارالىق مادەني بايلانىستاردى دامىتۋ جانە تەاتردىڭ تەحنيكالىق بازاسىن جاڭعىرتۋ جۇمىستارى جالعاسادى.