ءومىر مەن ءولىم ارباسقان التى ساعات

مەديتسينا الەۋەتى

«وپەراتسيا بارىسىندا ءبىر مەزەتتە ەكى كۇردەلى حيرۋرگيالىق ارالاسۋ قاتار ورىندالدى: نەيروحيرۋرگتەر باس ميىنداعى ىسىكتى الىپ تاستاپ, اكۋشەر-گينەكولوگتەر كەسار تىلىگى ارقىلى ءسابيدى دۇنيەگە اكەلدى. جۇكتىلىك كەزىندە نەيروحيرۋرگيالىق دياگ­نوزبەن تۇسكەن ايەلدەر اراسىندا ءارتۇرلى كلينيكالىق جاعدايلار كەزدەسەدى. ورتالىق تاجىريبەسىندە مۇنداي 26 جاعداي تىركەلگەن. ولاردىڭ ءبىر بولىگىندە جۇكتىلىكتىڭ ەرتە كەزەڭىندە وپەراتسيا جاسالىپ, ىسىك الىندى. وپەراتسيادان كەيىن ناۋقاستار جۇكتىلىگىن ءارى قاراي جالعاستىرىپ, بەلگىلەنگەن مەرزىمگە دەيىن جەتكىزىپ, ۋاقىتىندا امان-ەسەن بوسانعان. سونىمەن قاتار 17 جاعدايدا ناۋقاستار بوسانعاننان كەيىنگى كەزەڭدە نەيروحيرۋرگيالىق ەم قابىلداعان. ايتا كەتۋ كەرەك, مۇنداي سيمۋلتانتتى وپەراتسيا ءبىزدىڭ ورتالىقتا العاش رەت 2008 جىلى جۇرگىزىلگەن. ول كەزدە تۇڭعىشىن كۇتىپ جۇرگەن جاس ايەل ارتەريوۆەنوزدى مالفورماتسيا دياگنوزىمەن اۋىر جاعدايدا, كوماعا ءتۇسىپ, ورتالىققا جەتكىزىلگەن ەدى. ناۋقاسقا شۇعىل تۇردە نەيروحيرۋرگيالىق وپەراتسيا جاسالىپ, ءبىر مەزەتتە كەسار تىلىگى ارقىلى بالا دۇنيەگە اكەلىنگەن. بۇگىندە بۇل كىسى – ءۇش بالانىڭ اناسى, باقىتتى وتباسىنىڭ ۇيىتقىسى. اتالعان وپەراتسيالار جوعارى كاسىبي بىلىكتىلىكتى, كوپسالالى مامانداردىڭ ۇيلەسىمدى, جەدەل جۇمىسىن تالاپ ەتەدى».

بۇل – استانا قالاسىنداعى ۇلتتىق نەيروحيرۋرگيا ورتالىعىنىڭ ءباسپاسوز قىزمەتى جاريالاعان اقپارات. ال ءبىز 8 قاڭتاردا كۇن كوكجيەككە تىرمىسا ورلەپ ارقان بويى كوتەرىلگەندە وپەراتسيا بولىمىنە كىرىپ, اسا كۇردەلى احۋالدى كوزىمىزبەن كوردىك.

جاۋاپكەرشىلىك سالماعى

«قاسقىر مەن ءجۋرناليستى اياعى اسىرايدى» دەيتىن تىركەس بار. شەراعاڭ قالام ۇستاعان جۋرناليست قاۋىمدى «ار­قا­­لا­عانى – التىن, جەگەنى – جانتاق» دەپ القالاپ ءوتتى. كوزبەن كورىپ, كوڭىلدەن وتكىزىپ قاعازعا توككەن جاندى, نانىمدى ءارى قونىمدى بولاتىنى انىق. وسىنى مۇرات تۇتىپ, سيمۋلتانتتى وپەراتسياعا قاتى­سىپ, كوزبەن كورىپ جازۋعا ۇسىنىس بىلدىر­دىك. ورتالىقتىڭ كىرەبەرىسىنە سىرت كيىمدى تاپسىرعاندا قاتارىمىز تولىعىپ ۇشەۋ بولدىق. ۇلتتىق نەيروحيرۋرگيا ورتالىعى حالىقارالىق ىنتىماقتاستىق جانە قوعاممەن بايلانىس سەكتورىنىڭ باس مامانى ميرامگۇل جۇبانيازوۆا ۇلت­تىق ارنا ءتىلشىسى مەن وپەراتور ۇشەۋ­مىز­دى ىلەستىرىپ وپەراتسيا زالىنا جول باس­تادى. الدىمەن قولىمىزدى ارنايى سۇيىق­تىقپەن جۋىپ-شايىپ, تاعى دا كيىم اۋىستىردىق.

وزگەلەردى قايدام, ءوزىم ءدال سول مەزەت­تە جاۋاپكەرشىلىكتىڭ سالماعى ارقا­ما باتقانىن سەزىندىم. قازىر مۇندا سوقىر­ىشەكتى كەسىپ الىپ تاستايتىن, بول­ماسا كەمىككە بىتكەن كەسەلدى جونباي­دى. ءدال ءبىزدىڭ كوز الدىمىزدا انا مەن با­لا­نىڭ ءومىرى ءۇشىن ارپالىس باس­تالادى. بۇ­عان دەيىن 4 قىزدى ومىرگە اكەلگەن 33 جاس­تاعى باتىر انا وپەراتسيا توسەگىندە ۇيىق­تاپ جاتىر. بىرەر ساتتە باتىر انانىڭ قۇرساعىن جارىپ بەسىنشى پەرزەنتى جا­رىق دۇنيە ەسىگىن اشادى. ودان كەيىن ۋاقىت ۇت­تىرماي ۇلتتىق نەيروحيرۋرگيا ورتا­لىعىنىڭ بىلىكتى نەيروحيرۋرگتەرى ناۋ­قاستىڭ باس ميىنداعى ىسىكتى سىلىپ تاستاۋعا كىرىسەدى.

«كەڭ دۇنيە, ءتوسىڭدى اش, مەن كەلەمىن!»

ءبىز وپەراتسيا بولمەسىنە جەتكەندە انا مەن بالا ورتالىعىنان كەلگەن اكۋشەر-گينەكولوگتەر بىلەكتەرىن ءتۇرىنىپ, وپەراتسياعا كىرىسىپ كەتكەن ەكەن. تاڭعى ساعات توعىزدان ەكى مينۋت سىرعىعاندا جارىق دۇنيە ەسىگىن تاعى ءبىر ءسابي اشتى. ومىرگە اتۇستار كەلدى! ءتورت اپكەسىنىڭ ىزىنەن ەرەر بالاپاندى اكۋشەرلەر قۇنداقتاپ الدى دا, ەدەل-جەدەل تەكسەرىپ, ارنايى قۇرىلعىنىڭ ىشىنە سالدى. بىرەر ساتتەن كەيىن نارەستەنىڭ ىڭگالاعانى قۇلاعىمىزعا شالىندى. «وۋ, ادامدار, مەن ومىرگە كەلدىم. اناما اپارىڭدار مەنى» دەگەندەي ەستىلدى پەرىشتەنىڭ ءۇنى.

«ناۋقاستى جۇكتىلىكتىڭ 34-35 اپتاسىندا كەسار تىلىگىمەن بوساندىردىق. بۇعان دەيىن ءتورت بالاسىن ءوزى بوسانعان ەكەن. بەسىنشى ءسابيى قۇرساعىنا بىتكەننەن كەيىن باسىندا ىسىكتىڭ پايدا بولعانى انىقتالدى. شىمكەنت قالاسىنان سان­اۆياتسيامەن ەلدورداداعى ۇلتتىق نەيروحيرۋرگيا ورتالىعىنا جەتكىزىلدى. ارنايى كونسيليۋم وتكىزىلىپ, شۇعىل وپەرا­تسيا جاساۋ ارقىلى بوساندىرۋعا شەشىم قابىلدادىق. نارەستەنىڭ جاعدايى قالىپتى, شالا تۋعاندىقتان, بىرنەشە كۇن انا مەن بالا ورتالىعىندا ءبىزدىڭ باقىلاۋىمىزدا بولادى. سالماعى 2,5 كگ, بويى 49 سانتيمەتر دەپ تىركەلدى»,  دەدى انا مەن بالا ورتالىعىنىڭ جاڭا تۋعان نارەستەلەردىڭ جانساقتاۋ ءبولىمىنىڭ دارىگەرى, نەوناتولوگ-رەانيماتولوگ ەۆگەنيا احمەدوۆا.

ول نەيروحيرۋرگيا ورتالىعىنىڭ باسشى, ماماندارى قۇرامىندا اكۋشەر-گينەكولوگتەر, رەانيماتولوگتەر مەن نەوناتولوگتەر بار دارىگەرلەر كومانداسىن جۇكتىلىگىنە 35 اپتا تولعان, باس مي ىسىگى دياگ­نوزى قويىلعان ايەلگە وپەراتسيا جاساۋعا شاقىرعانىن, ەكى وپەراتسيا ءبىر مەزگىلدە جۇرگىزىلگەندىكتەن دە, جاۋاپ­كەرشىلىك ەسەلەنە تۇسكەنىن ءمالىم ەتتى.

«جەكە تاجىريبەمدە بۇعان دەيىن دە وسىنداي وپەراتسيالار بولدى. ۇلتتىق كارديولوگيا ورتالىعىنا دا ءجيى بارامىز. سەبەبى ول جاقتا جۇرەگىندە اقاۋى بار جۇكتى ايەلدەرگە دە وپەراتسيا جاسالادى. سون­دىقتان مۇنداي جاعدايلار ءبىزدىڭ ورتا­لىقتا اراگىدىك ورىن الادى», دەدى ە.احمەدوۆا.

اكۋشەر-گينەكولوگتەردىڭ ءبىر توبى ەدەل-جەدەل باسىپ, ارنايى قۇرىلعىنىڭ ىشىندە قۇنداقتاۋلى جاتقان ءسابيدى انا مەن بالا ورتالىعىنا الىپ كەتكەن سوڭ وپەراتسيا زالىنا قايتا كىردىك. بۇل كەزدە...

مي ىشىندەگى ىسىك

دارىگەر نەيروحيرۋرگ مۇراتبەك تىلەۋبەرگەنوۆ وپەراتسيا الدىندا بىزگە ناۋقاسقا قاتىستى از-كەم سۇحبات بەردى.

«بىرنەشە كۇن بۇرىن ورتالىققا ناۋقاستى جەتكىزدى. شۇيدەسىنىڭ سول جاق بو­لىگىندە ىسىك پايدا بولعاندىعى انىق­تالعان سوڭ وسىندا جاتقىزىلدى. ىسىكتىڭ كولەمى ۇلعايىپ, ورنالاسقان اي­ما­عىندا­عى مي بولىگىن وتە قاتتى قىسىپ تۇر. ناۋقاس­تىڭ جۇكتىلىگىنە 34-35 اپتا بول­عان­دىق­تان, انا مەن بالا ورتا­لىعى­نىڭ اكۋشەر-گينەكولوگتەرىمەن تىزە قوسىپ ەكى, ياعني سيمۋلتانتتى وپەراتسيانى ءبىر مەزەتتە جاساۋعا شەشىم قابىلدادىق. ەڭ الدىمەن نارەستەنى كەسار تىلىگىن جاساپ امان-ەسەن بوساندىرعان سوڭ, اناسىنىڭ باسىنا وپەراتسيا جاسايمىز. ناۋقاس ورتالىققا جەتكىزىلگەننەن كەيىن كونسيليۋم وتكىزىلىپ, ورتالىق باسشىسى سەرىك اقشولاقوۆ, ءبولىم مەڭگەرۋشىسى نۇرجان رىسكەلديەۆ, سەرىك كارىباەۆ, اكۋشەر-گينەكولوگ بەرىك ۇزاقباي ۇلى, نارەستەنى قاداعالاپ قارايتىن نەوناتولوگتەرمەن كەڭەسىپ, سيمۋلتانتتى وپەراتسيا جاساۋعا شەشىم قابىلداندى», دەگەن مۇراتبەك ابدىعالي ۇلى.

بۇعان دەيىن ءدال مۇنداي كورىنىستى كوگىلدىر ەكراننان – فيلمدەردەن عانا كورگەندىكى مە, جۇرەگىم شايلىققانداي اتقاقتاپ سوعا باستادى. تىسقا شىعىپ كەت­كىم-اق كەلدى. ەگەر كىرگەن ىزىممەن كەرى قايت­سام بىرنەشە ساعاتقا سوزىلاتىن, ءومىر مەن ءولىم ارباسقان ساتتە, ورا­سان زور تاۋەكەلمەن جانكەشتىلىككە بارا­تىن دارىگەرلەردىڭ ەرەن ەڭبەگىن جۇرەگىم­نەن وتكىزە الماس ەدىم. «تاۋەكەلگە بەل بۋ­دىڭ ەكەن, جاراتقاننان جاردەم سۇراپ ناۋقاستىڭ جانىندا تۇر!» دەدىم ىشتەي كۇبىرلەپ دەگبىردى سابىرعا جەڭدىرە.

جەرگە تىرس-تىرس تامعان قاندى دارى­گەر­لەر دەرەۋ ءسۇرتىپ الا قويادى. ادام­نىڭ باس تەرىسى استىنداعى قۇيقاسى مۇنشا­لىق­تى قالىڭ بولار ما؟ شامالاپ ايتقان­دا جارتى سانتيمەترگە جۋىقتايدى. باس سۇيەك­­تىڭ قاتتىلىعى ترەپان اپپاراتىمەن ارا­لاعاندا اڭعارىلدى. ءاپ-ساتتە وپە­را­تسيا بولمەسىنىڭ ءىشىن سۇيەكتىڭ كۇي­گەن ءيىسى الىپ كەتتى. باس سۇيەكتى كەسىپ اشقان­نان كەيىن مەنىڭ دولبارىم تەرىسكە شىق­تى. ىسىك ميدىڭ سىرتىنا جەلىمدەنە بىتكەن شىعار دەپ توپشىلاعام. جوق, ولاي بولمادى. مەرەز سۇعىنا ەنىپ, ميدىڭ ىشىنە كەۋلەپ الىپتى. كۇن وتكەن سايىن ۇل­عايىپ جوندانا بەرگەندىكتەن باستى قىسا تۇسكەن. ميدىڭ بۇل بولىگى تىرەك-قيمىل, كوزدىڭ كورۋ قابىلەتىنە جاۋاپ بەرەدى.

بىلىكتى مامان اسقان ەپتىلىكپەن ميدىڭ سىرتقى قاباتىنداعى جامىلعىسىن تىلمەس بۇرىن قان ساۋلاپ كەتپەسىن دەپ ۇساق تامىرلاردى كۇيدىرىپ الدى. ودان كەيىن ىسىكتى سىلىپ تاستاۋعا كىرىستى.

پويىزدا دا, ۇشاقتا دا كىندىك كەسكەن اكۋشەر

– ءسىز كىم بولاسىز؟ – دەدى تۋ سىرتىمنان شىققان داۋىس. جالت قاراسام, اق حالات كيگەن دارىگەرلەردىڭ ءبىرى ەكەن.

– ءجۋرناليسپىن, وسى ۇدەرىسكە ارنايى قاتىسىپ, ەلىمىزدە ءدال وسىنداي اسا كۇردەلى وپەراتسيا جاسالاتىنىن جاريا­لاۋعا كەلدىم. ءوزىڭىز كىمسىز؟

 – مەن اكۋشەرمىن. ناۋقاستى ءبىزدىڭ كوماندا كەلىپ بوساندىرىپ, نارەستەنى انا مەن بالا ورتالىعىنا الىپ كەتتى. قاسىمداعى ارىپتەسىم ەكەۋمىز وپەراتسيا اياقتالعانشا باقىلاۋ ماقساتىندا بوگە­لىپ وتىرمىز. – بارىنشا اشىق-جارقىن اڭگىمەشىل جان ەكەن. سامبىرلاپ سويلەپ جاتىر. – بۇعان دەيىن پويىزدا اياعى اۋىر كەلىنشەكتى بوساندىرعانىم بار...

– ماسساعان!

– ودان كەيىن ۇشاقتا شەتەل ازاماتشا­سىنىڭ دا بالاسىن اق شاربى بۇلتتىڭ ۇستىندە ومىرگە اكەلىپ, كىندىگىن كەستىم. ەندى مىنە وپەراتسيا توسەگىندە اسا كۇردە­لى دياگنوزبەن تۇسكەن كەلىنشەككە دە وپەرا­تسيانى ءساتتى جاسادىق, – دەدى. اتى-ءجو­نىمىزدى سۇراسىپ تانىسقاننان كەيىن الگى وقيعالاردىڭ جاي-جاپسارىن سۇرادىم.

2021 جىلى اكۋشەر لۋنارا ەرعاليەۆا استانا قالاسىنان ورالعا جەتۋ ءۇشىن پويىزعا وتىرادى. الماتىدان شىققان تەمىرتابان كولىك ۆاگون تولى جولاۋشىلاردى تەربەتىپ دىتتەگەن باعىتتا جۇيتكىپ بارا جاتادى. ءار ماماندىقتىڭ وزىندىك قيىندىعى مەن قىزىعى دا قاتار جۇرەدى. پويىزدا ايى-كۇنى جاقىنداعان جاس كەلىنشەك تە بولعان ەكەن. قىس مەزگىلى بول­عاندىقتان, ۆوكزالدان جۇرەردە جولسە­رىكتەر اياعى اۋىر كەلىنشەكتى اڭعارماسا كەرەك. ايتپەسە جۇكتىلىكتىڭ ءدال مۇنداي مەرزىمىندە جولاۋشىلاپ شىعۋعا كوبىنە رۇقسات ەتىلمەيدى. لۋنارانىڭ ايتۋىن­شا, جول-جونەكەي الگى كەلىنشەكتىڭ تولعاعى قىسىپ, بايبالام باستالادى. «ايتولعاققا كورىنە گور» دەگەن تىلەگى اقتال­ماي, جاس انانىڭ جاتىرىنداعى نارەس­تە جارىق الەمگە شىعۋعا تالپى­نىپ بۇلقىنادى. ەندىگى توقتايتىن ستان­ساعا دەيىن ءالى ساعاتتان اسا ۋاقىت بار. جولسەرىكتەر باستاپ, جولاۋ­شىلار قوستاپ, بارلىعى دا جاراتقانعا جالبارىنىپ دارىگەردىڭ كومەگىنەن ءۇمىت كۇتەدى. الدا تەك تاۋەكەل تۇر. جانى مۇر­نىنىڭ ۇشىنا كەلىپ, تولعاعى بەزەكتەتىپ قينال­عان جاس انا. «مەنىڭ ايتقانىمدى بۇل­جىت­پاي ورىندا!» دەيدى قايراتىن بويى­نا جيىپ بىلەگىن تۇرىنگەن اكۋشەر جولاۋ­شىعا. كۋپەدەگى باسى ارتىق ادامدى تامبۋرعا شىعارىپ, انا مەن بالانىڭ ءومىرى ءۇشىن ارپالىستى باستايدى. ءسۇت ءپىسىرىم ۋاقىت شاماسىندا شار ەتكەن شارانانىڭ ءۇنى ەستىلەدى. ءبارى مارە-سارە. پويىزدىڭ مەيرامحاناسىندا ءسابيلى بولعان اكەسى جولاۋشىلارعا اقسارباس ايتىپ, تويدى باستاپ كەتەدى. كەيىن وسى تاۋەكەلى ءۇشىن اكۋشەر لۋنارا ەرعاليەۆا «جىل ادامى» اتالىمىنا يە بولادى.

ەكىنشى وقيعا اراعا ءۇش جىل سالىپ 2024 جىلى بولعان. اۋەدەگى داڭعىل جولىنا تۇسكەن لاينەردىڭ ىشىندە ستيۋاردەسسا «ارامىزدا دارىگەر بار ما؟ شۇعىل كومەك قاجەت» دەيدى داۋىستاپ. ەشكىم قوزعالا قويمايدى. اقىرى لۋنارا ناۋقاستىڭ جاعدايىن بىلمەككە جاقىنداي تۇسەدى. ىشتەي «اياعى اۋىر بولماسا ەكەن» دەپ تىلەپ ادىمداي باسىپ جاقىنداپ كەلسە... جۇكتىلىكپەن تىركەۋدە تۇرعان جولاۋ­شى ەكەن. شەگىنەرگە جول جوق, اپاتتى جاعدايدا شىعاتىن ەسىكتىڭ ماڭىنداعى كەڭدەۋ ورىنعا جايعاستىرادى دا, تاعى دا تاۋەكەلگە بەل بۋىپ امان-ەسەن بوساندىرادى. ۇشاقتا تۋعان نارەستە بۇگىندە اياعىن نىق باسىپ, ء«وزىنىڭ تىلىندە» شۇلدىرلەپ جۇرگەن بولار.

– بۇگىن وپەراتسيا توسەگىندە جارىق دۇنيەگە اكەلگەن نارەستەنى ءبىز بىرنەشە كۇن ورتالىقتا باقىلاۋدا ۇستايمىز. اناسى امان-ەسەن ويانىپ, ساۋىققان سوڭ ءسابيىنىڭ قاسىنا كەلەدى, – دەدى اكۋشەر.

سىرتتاي باقىلاپ تۇرعاننىڭ وزىندە قاجىرىڭ قوجىراپ, بەلىڭ تالىپ, تابا­نىڭا كۇش ءتۇسىپ قيپاقتاي باستادىم. قي­مى­لىمدى باعىپ تۇرعان دارىگەرلەردىڭ ءبىرى ورىندىق اكەلىپ بەردى. ال بۇل كەزدە مۇراتبەك تىلەۋبەرگەنوۆ كولەمى ۇلكەن ىسىكتى كەرتىپ-كەرتىپ الىپ, تولىقتاي تازالاپ, ميدىڭ سىرتقى قاباتىن كوكتەي تىگىپ جاتتى. باس سۇيەكتى دە ءدال ورنىنا قويىپ جيەكتەپ تىكتى. پوليگليكول, پوليلاكتيد قىشقىلدارىنان جاسالعان, تىندەردى بىرىكتىرگەننەن كەيىن اعزادا ىدىرايتىن ۆيكريل, سونىمەن قاتار نەيروحيرۋرگيا, وفتالمولوگيا مەن پلاستيكالىق حيرۋرگيادا قولدانىلاتىن, تىندەردى تارتپايتىن, دەفورماتسياعا ءتوزىمدى, تەز ۇيلەسە­تىن پوليپروپيلەن جىپتەرىن قولداندى. سوڭىرا قۇيقانى سۇيەكتىڭ بەتىنە جا­ۋىپ اينالدىرا تىگۋدىڭ اياعىنا جەتكەندە وپەراتسيانىڭ التىنشى ساعاتى سوعىپ جاتتى. تاپجىلماي ەش كىدىرىسسىز تابانداپ تۇرىپ التى ساعاتتان استام ۋاقىت وپەراتسياعا قاتىسىپ, انا مەن بالانىڭ ءومىرى ءۇشىن بارىن سالىپ ەڭبەك ەتكەن ۇجىمنىڭ ماڭداي تەرى قانداي ماراپاتقا دا, قۇرمەتكە دە لايىق.

ەسىمىڭ كىم, نارەستە؟

وپەراتسيادان كەيىن جانساقتاۋ بولى­­مىنە جەتكىزىلگەن ناۋقاس بىرنەشە ساعاتتان كەيىن وياندى. اياق-قولى قوزعالىسقا كەلدى. كۇ­دىك, كۇماننىڭ بۇلتى ىدىراپ ءۇمىت شوعى ماز­داي ءتۇستى. ەندى از كۇندە انا مەن بالا قاۋى­شادى. قانداي ەرەكشە ءسات!

ارادا ەكى كۇن ۇزاعاندا ۇلتتىق نەي­رو­حيرۋرگيا ورتالىعىنا قايىرا بار­دىق. ماقساتىمىز – باتىر انانىڭ جاقىن­دارىمەن تىلدەسۋ. ورەكپىگەن كوڭىل­دەرىن ورنىنا ءتۇسىرىپ, وپەراتسيا­نىڭ ءساتتى وتكەنىن ايتۋ. اعاسى رۋسلان احمەدوۆ شىمكەنت قالاسىنان كەلىپ, قارىن­داسىنىڭ تىلەۋىن تىلەپ ءجۇر. اتالارى كە­زىندە گرۋزيا­نىڭ مەسحەتي ايماعىنان شىمكەنت قالاسىنا كوشىرىلگەن احىسكا تۇرىكتەرى ەكەن.

«اكەم كولحوزدىڭ شوپىرى بولدى, انام باعبانشىلىقپەن شۇعىلدانىپ, شالعى تارتىپ, كەتپەن شاپتى. ءوزىمىز قازاق مەكتەبىندە وقىدىق. ۇيدە بەس اعايىن­­دىمىز, كەنجەمىز وسى ديلفۋزا قا­رىنداسىم. ديلفۋزا بالا كۇنىنەن توما­عا-تۇيىق, ءوز ىسىنە مىعىم, بايسالدى بولىپ بويجەتتى. ۇزاتىلىپ, قۇداي قوس­قان جارىمەن شاڭىراق كوتەردى. ومىر­گە ءتورت قىز اكەلدى. ولار دا ىنىلەرىن قات­تى ساعىنىپ كۇتىپ ءجۇر. اكەم مەن شەشەم قارىنداسىما وپەراتسيا جاسايتىن كۇننىڭ تاڭىندا اۋىز بەكىتىپ, اللادان مەدەت تىلەپ دۇعاسىن وقىدى. باۋىرلارىم دا قاتتى ۋايىمدادى. بىراق مەن بارىنە بىردەن ەسكەرتتىم. «وپەراتسيا ءساتتى اياقتالىپ, دارىگەر نەيروحيرۋرگپەن سويلەسكەن سوڭ ءوزىم قوڭىراۋ شالامىن. وعان دەيىن مازالاماڭىزدار», دەدىم. و باستا بەس ساعات مولشەرىندە جاسالادى دەپ ەدى. التى ساعاتتان اسقاندا ۋايىمىمىز كۇشەيدى. سابىرمەن كۇتتىك, ءبارى وڭتايلى بولدى. قارىنداسىم مەن جيەنىمنىڭ ءومىرى ءۇشىن بار بىلىكتىلىگىن سالىپ, وراسان جاۋاپكەرشىلىكپەن وپەراتسيا جاساعان دارىگەرلەر قاۋىمىنا زور العىس ايتامىن. جيەنىمىزدىڭ ەسىمىن دارىگەر نەيروحيرۋرگتىڭ قۇرمەتىنە مۇراتبەك قويساق دەگەن ۇسىنىس ايتتىم. قۇدالارىمىزدىڭ وزدەرى دە نەمەرە­سىنە ات قويۋعا اقىلداسىپ جاتىر», دەدى ر.احمەدوۆ.

بەس بالانىڭ اكەسى اتانعان حانالى سۇلەيمەنوۆ تە تولقىپ ءجۇر. ەكىنشى قىزى ايدانا مەن اسا كۇردەلى وپەراتسيامەن ومىر­گە كەلگەن ۇلىنىڭ تۋعان كۇنى بىر­دەي بولماق – ەكەۋى دە 8 قاڭتاردا دۇنيەگە كەلدى.

«كەلىنشەگىم بالاباقشادا دارىگەر بولىپ قىزمەت ەتەدى. باسىندا ىسىك پاي­دا بولعانىن بەرتىندە اڭعاردىق. ويت­كەنى قيمىل-قوزعالىسى باياۋلاپ, كورۋ قابىلەتى دە كەمي باستادى. دەر كەزىن­دە كومەك كورسەتىپ, شۇعىل وپەراتسيا جاسا­عان دارىگەرلەرگە مىڭ العىس», دەدى ح.سۇلەيمەنوۆ.

استاناعا تۇڭعىش رەت كەلگەن حانالى جولشىبەك ۇلىنا بىرەر جىلدان كەيىن وتباسىمەن قىدىرىپ كەلۋگە جازسىن دەگەن تىلەگىمىزدى ايتىپ اتتاندىق. تۇ­ران داڭ­عىلىمەن بويلاپ, انا مەن بالا ور­تالىعىنان ءوتىپ كەلەمىز. از كۇندە ومىر­دەگى ەڭ قىمبات جاندى اسىعا كۇتىپ جاتقان نارەستەنىڭ ىڭگالاعان ءۇنى ەستى­لەتىندەي.