الماتىدا الەۋمەتتىك جەلى قولدانۋشىلارى قالا كوشەلەرىنەن ەرەكشە كولىكتى بايقاپ, قىزۋ تالقىعا سالدى. كۋاگەرلەر تۇسىرگەن بەينەجازبالاردا تجم ەمبلەماسى بار Tesla Cybertruck ەلەكتروموبيلى ەۆاكۋاتورعا تيەلىپ, قالا ىشىندە تاسىمالدانىپ بارا جاتقانى كورىنەدى, دەپ جازادى Egemen.kz.
جەلىدە تاراعان كادرلار بىردەن نازار اۋدارتتى. سەبەبى فۋتۋريستىك ديزاينىمەن تانىلعان Tesla Cybertruck قازاقستاندا سيرەك كەزدەسەدى, ال توتەنشە جاعدايلار قىزمەتىنىڭ بەلگىلەرىمەن ءجۇرۋى كوپشىلىكتى تاڭعالدىردى. كەيبىر قولدانۋشىلار بۇل كولىك قۇتقارۋ قىزمەتىنىڭ قاجەتتىلىكتەرىنە بەيىمدەلۋى مۇمكىن دەگەن بولجام ايتتى.
الايدا ازىرگە رەسمي ورگاندار تاراپىنان ەلەكتروموبيلدىڭ تجم قۇرىلىمىندا پايدالانىلاتىنى جونىندە ناقتى اقپارات بەرىلگەن جوق. ءتيىستى ۆەدومستۆولار دا بۇل جاعدايعا قاتىستى تۇسىنىكتەمە جاساعان ەمەس.
ايتا كەتەيىك, Tesla Cybertruck – تولىقتاي ەلەكتر قۋاتىمەن جۇرەتىن, جول تالعامايتىن كولىك. ول جوعارى كورپۋسىمەن, جۇك كوتەرگىشتىگىمەن جانە ەكسترەمالدى جاعدايلارعا توزىمدىلىگىمەن ەرەكشەلەنەدى. وسى قاسيەتتەرى ونى اسكەري, قۇتقارۋ نەمەسە ارنايى قىزمەتتەرگە قىزىقتى كولىككە اينالدىرۋى مۇمكىن دەگەن پىكىرلەر دە ايتىلىپ ءجۇر.